Read abua 1 Sạmuel 4 Bible Online

1 Sạmuel 4 - abua bible

1 Sạmuel 4

¹Mem mọ ạmuphe phọ awe aFilistia uukpomoghan ni ọghi ozuom ẹgham bụo Ịzirel kụ awe phọ Ịzirel ọnya ọghi eeghiom ạbidi. Awe phọ Ịzirel ọghi odoghoḍi rugbogo ẹgham mọ ẹpe Ebeniza; kụ bụo aFilistia phọ ọrol ẹpe Afek.

²Awe aFilistia phọ ọghi ozuom Ịzirel kụ bịdi eeghi agey. Awe aFilistia phọ ọkpar opu weye phọ Ịzirel kụ ọze we dị ọghiom ni inya ọonir ẹpe erugh ẹgham mọ.

³Mem dị awe phọ ạbuphe osugha bọ ọghi osi ẹpe arugbogo phọ ạbidi, abuḍiemiom awe phọ Ịzirel ụḅem ni mọ, “Eeghe kụ iḍighi kụ Ọmoogh-we phọ ameera bọ mọ ạbuo aFilistia phọ ọkpar upu iyira? Ịgua ọghi ẹpe Sailo ọsighe Igbe Ịyo kꞌỌmoogh-we phọ oru pịdi ọdi ụdaph ghan iyira ạki, ạḅile ụphel ghan iyira ḍịghaagh ạbumulogh-ḍien phọ ayira.”

⁴Kụ bịdi orom we mọ ọghi ẹpe Sailo ọsighe Igbe Ịyo Ọmoogh-we Oomo Ịikpo phọ oru, ọpo phọ ạrolom bọ ạgada igbogh phọ sịphe ạnyu ạnmuny aghuḍuul kꞌẸnaan phọ. Kụ ịyal phọ ạnmuny phọ Ilai Hofini rꞌạFinehas ọdaphan Igbe Ịyo kꞌẸnaan phọ oru aani.

⁵Kụ mem dị Igbe Ịyo kꞌỌmoogh-we phọ eru bọ esi, awe phọ Ịzirel ụyughuron ni iboom ọyugh iboh dị ade phọ ephiigha.

⁶Awe phọ aFilistia ụnaghan ni ọyugh phọ kụ ọḅem mọ, “Ịnaghan oboom ọyugh dị rọyugh ẹpe arugbogo aHibru phọ! Eeghe kụ remite?” Mem dị bịdi ọwa bọ olegheri mọ Igbe Ịyo kꞌỌmoogh-we phọ kụ iru esi sịphe arugbogo phọ aHibru phọ,

⁷aruugu asiph ni bụo aFilistia phọ, kụ ọḅem mọ, “Eniin ẹmugh meru esi sịphe arugbogo phọ ạbidi! Yira mophe! Ọdo phọ ịphen phọ iyira ki̋mitenaan ghan.

⁸Ạnhian kụ katue bọ ụphel iyira ạsighe esi ịikpo ạrumugh phọ ịphen phọ? Ịpe phọ kụ ạrumugh phọ ẹze bọ weye phọ Ijipt ẹpe ẹdala phọ.

⁹Ịkparami iloghi anyina, weye aFilistia! Ibe ịlo alephiri ạnmuny. Ịduon kụ ílho, pọ yira koḍighi rẹbene aHibru phọ, ịdipho bịdi oḍighi ghan bọ rẹbene ayira. Kụ iḍighi kụ ibe ịlo alephiri ạnmuny.”

¹⁰Kụ bụo aFilistia phọ ee ni agey kụ ọkpar opu we phọ Ịzirel, kụ Ịzirel osumughu ogheleghu kꞌạbidi. Ịbadi awe umuughu ni. Awe Ịzirel dị ọze ụman ni ịraardi ọonir.

¹¹Awe aFilistia phọ oziton Igbe Ịyo phọ kꞌẸnaan ạar, ọḅile ọze ịyal phọ ạnmuny phọ Ilai, Hofini rꞌạFinehas.

¹²Oniin oye ọlo eghun ạBenjamin aghiil kꞌẹpe erugh ẹgham mọ ạghi asi Sailo. Esi oḍeenaan ẹ́ḅaal ologhi phọ ọdi, ọdi ạphanyi ni rụsuoma phọ ọdi kụ ọdi ạsighe ịikpelem azua ẹmhu ọdi.

¹³Oḅio Ilai akaph ni loor esi Igbe Ịyo phọ kꞌẸnaan, kụ ọdi ạrol ọgbal eten phọ agon ghan ọnaghan ịlo rẹki. Oye phọ aleenye ni ọghaaph phọ ẹpe ẹmha phọ kụ oomo awe phọ omiigh emoghi loor esi oghiilaan.

¹⁴Ilai ạnaghan ni ọyugh phọ kụ apuru mọ, “Rọyugh ghan eeghe?” Kụ oye phọ aagborion ạghi ạteeny Ilai ọḅeni ọghaaph phọ.

¹⁵(Mem mọ ạmuen phọ Ilai mạman esughadi rꞌọphaanya ạsia kụ ọdi eten ọ́kar mun ọmiin.)

¹⁶Kụ oye phọ ạḅeni nyọdi mọ, “Mị usuma ẹpe ẹgham mọ kụ aghiil bọ asi ẹphen rodon.” Ilai apuru nyọdi mọ, “Eeghe kụ imite, mọony ạmi?”

¹⁷Otelhedom mọ ạphagharanaan mọ, “Ịzirel mosumughu loor awe aFilistia phọ; bịdi mọkpar upu iyira! Ḅịle kẹn, ạnmuny phọ ạna Hofini rꞌạFinehas, bịdi mọze, kụ Igbe Ịyo kꞌẸnaan phọ bịdi mọsighe!”

¹⁸Mem dị oye phọ agholom bọ Igbe Ịyo phọ, bịn Ilai ameel ẹḅekene sịphe ọdi ạrol bọ atuman ọnhu-aḍibuo phọ. Ịdipho ọdi mạkpo bọ ạḅile ạbugh ekpo iboom, emeel phọ ẹpe phọ iwun ni orum ọdi bịn ọdi amugh. Ọdi aḍiemiom bọ Ịzirel ịman ni inyadi ạsia.

¹⁹Ạnir ạFinehas ọony phọ Ilai ạrol li rꞌeghun kụ mẹkpul dị ọdi kạmar. Mem dị ọdi ạnaghan bọ mọ moziton Igbe Ịyo phọ kꞌẸnaan ọboor, ḅịle kẹn, mọ ọde olhom mọ ọno mamugh, olhom ọno kẹn amugh, oghunughun phọ ọdi amiigh mem mem mọ bịn ọdi ạmar.

²⁰Ọdi rọmar roseere bịn ọdi ramugh, kụ ạnmariir phọ ạbuphe rọloghonaan bọ nyọdi ḍịghaagh phọ ọḅeni nyọdi mọ, “Kpạrami loor ạna! Nạ mạmar olephiri ọony!” Kụ ọlo ọdi ọ́naghan mun, ḅịle kẹn ọ́phagharanaan.

²¹Ọdi aghol mọony phọ mọ Ikabod emeera mọ, “Eegu phọ Ẹnaan mẹḍua Ịzirel.” Ịphen phọ ọdi ạtomaam ghan Igbe Ịyo phọ kꞌẸnaan mọsighe bọ rꞌaḍuugh ọde olhom mọ rꞌolhom mọ ọdi.

²²Kụ ọdi ạḅem mọ, “Eegu phọ Ẹnaan mẹḍua Ịzirel loor esi dị awe mọsighe Igbe Ịyo phọ kꞌẸnaan.”