Read abua 1 Sạmuel 7 Bible Online

1 Sạmuel 7 - abua bible

1 Sạmuel 7

¹Ẹpe kụ esi dị awe phọ ạKiriat Jiarim ọsighe Igbe Ịyo kꞌỌmoogh-we phọ ọpham ọghi otu oniin oye dị oghol mọ Ạbinadab dị arugh ạnyu eegbolom, kụ bịdi owoph Ẹliazar ọony phọ ọdi oselemi mọ aphogh ghan.

²Igbe Ịyo kꞌỌmoogh-we phọ ịrol li ẹpe Kịriat Jiarim ebia iboom, kẹman ni ịyaldi ạsia. Esi oomo ạsia phọ ịphen, awe phọ Ịzirel umoghiom ghan Ọmoogh-we phọ mọ ạloghonaan bụno ḍịghaagh.

³ẠSamuel ạḅeni we phọ Ịzirel mọ, “Eru mạar dị nyina ekiton ni eru esi Ọmoogh-we phọ rꞌoomo iloghi phọ anyina, pọ nyina ẹmoogh oroḅologhi iiruen ạrumugh phọ anyina rꞌịkaaghineen ạraraar ẹya-eru Astarte. Ịḅogh siloor anyina ẹngo Ọmoogh-we phọ, ẹeḅereghi ghan nyọdi bịn, pụruku ọdi kịtagharan inyina ḍịghaagh ạbuo aFilistia phọ.”

⁴Kụ iḍighi kụ awe phọ Ịzirel oroḅologhi ịkaaghineen ạraraar aruru phọ ạbidi aBaal rꞌAstarte, kụ bịdi ọoḅereghi ghan Ọmoogh-we phọ bịn.

⁵Kụ ạSamuel arom ạghiom oomo awe phọ Ịzirel mọ ookpomoghan ẹpe Mizpa kụ ọdi ạḅem mọ, “Mị kakol ẹmhu anyina ạaḅereghi Ọmoogh-we phọ sịphe.”

⁶Kụ awe phọ ookpomoghan ẹpe Mizpa. Bịdi oḍu mụum kụ ozu ọphighironom ẹkia ọngo Ọmoogh-we phọ, kụ bịdi ọkaagh ẹḍogh oomo phọ aḍio phọ. Kụ bịdi ọḅem, “Yira moḍighi ịkaraph esi Ọmoogh-we phọ.” (Ẹpe Mizpa kụ ẹdi ạSamuel ạrol ghan ạghaaphogh sighiton aweye phọ Ịzirel.)

⁷Mem dị awe aFilistia ọnaghan bọ mọ awe Ịzirel mookpomoghan ẹpe Mizpa, oogh phọ ạbudaam mọ aFilistia uḅerenu ni rꞌawe ẹgham ạbidi ọghi ozuom ẹgham bịdi. Awe Ịzirel ụnaghan ni ịphen phọ kụ aruugu asiph Ịzirel,

⁸kụ ọḅeni Sạmuel mọ, “Ḅẹeḅereghi ghan ni Ọmoogh-we Ẹnaan phọ ayira mọ ọdi ụphel iyira ḍịghaagh awe aFilistia phọ.”

⁹Kụ ạSamuel aghiigh ọony oyool-ọga kụ aguom nịan oomo phọ ọdi, ạphighironom ẹkia ạngo Ọmoogh-we phọ. Kụ ọdi ạaḅereghi Ọmoogh-we phọ mọ ạloghonaan ḍịghaagh weye phọ Ịzirel, kụ Ọmoogh-we phọ ạphagharanaan ni ịiḅereghi phọ ọdi.

¹⁰ẠSamuel odi rạpighiron ghan ẹkia phọ kụ awe phọ aFilistia ọghi ozuom ẹgham mọ, pọ kụ amem dị Ọmoogh-we phọ ạrol kꞌạke amoogha. Iḍigh ni ḍiigu esi awe phọ, kụ osumughu.

¹¹Aweye phọ Ịzirel ụḍua ni Mizpa omiteghu kụ ophorogh we aFilistia phọ ọze bịdi tụtu ọghi osi Bẹt Ka.

¹²Kụ ạSamuel ạsighe ḍighiigh ạmeremi igbo aMizpa rꞌaSen, kụ ạḅem mọ, “Ọmoogh-we phọ mụlhoghonaan iyoor ḍịghaagh oomo phọ amem mọ,” kụ ọdi aghol ḍighiigh phọ mọ “Aḍighiigh ọloghonaan ạḍighaagh.”

¹³Kụ iḍighi kụ awe phọ Ịzirel ọkpar opu weye phọ aFilistia, kụ Ọmoogh-we phọ ómeera mun mọ bịdi ozuom ẹgham de phọ Ịzirel oomo ịpe ạSamuel ạrol bọ.

¹⁴Oomo phọ ạramha phọ Ịzirel aweye phọ aFilistia phọ ọsighiogh bọ, rạmha dị ẹrol igbo Ẹkron rꞌạGat, bịdi uḅulemi ni ọngo Ịzirel, kụ Ịzirel ọmoogh de phọ ạbidi ọmadan. Ẹepho kẹn ịrol li igbo awe phọ Ịzirel rꞌawe phọ aKenan.

¹⁵ẠSamuel kụ ạtooghi ghan rạraar sịphe Ịzirel oomo asuḍughul-otu aghuḍum mọ ọdi.

¹⁶Tọrotoro ạlha ọdi kạḍua ni Bẹtel ạki Gịlgal, ạḍua sịphe ạki Mizpa, kụ tọro ẹmha lọ ọdi asi ọdi ạghaaph ghan ni sighiton lọ edi.

¹⁷Kụ ọdi agbi ogheel ẹpe kꞌọdi ẹpe Rama, ẹpe ọdi ạrol ghan bọ aagbo ghan kẹn ni ịiruen. Ẹpe Rama kụ ẹdi ọdi ạkananaan Ọmoogh-we phọ enmeny.