Read anuak Wïlöölö 1 Bible Online

Wïlöölö 1 - anuak bible

Wïlöölö 1

¹Wïlöölö Jwøk maal ki piny acwääe.

²Ni bëët pinynyi jaak ni bäŋ gïrpiny yie; ni piny bëëdö na kut bäre, ni muudhö ena bäät pïï; ni Jwïëc Jwøk bëëdö ni määdö bäät pïï.

³Ni kö Jwøki, ni «Beerra man jït pinynyi ki tar.» Køøre piny aput jïtö ki tar.

⁴Ni ö Jwøki ni joot gø ni tar beeye gïn mo beer. Køøre Jwøk tar ki muudhö apääŋŋe.

⁵Ni ö Jwøki ni cwøl tar ni dïcäŋ, ni cwøl muudhö ni wäär. Ni tïme ni da abøøya ka amöölla. Ni beeye dïcäŋ mana dïkwøŋ.

⁶Køøre Jwøk aköö, ni «Beerra man tïm maalli ni dagø yïthakic pïï nee pïï pääŋŋe ki dïge.»

⁷Ni ö Jwøki ni tïïc maal, ni pääŋ pïï ki dïge moa en piny ko maal ki pïï moa en løø maal løøga. Ni ö gïïögø ni thurge karge.

⁸Ni ö Jwøki ni cwøl kuna en maal ni maal. Ni tïm pinynyi ni da abøøya ka amöölla. Ni beeye riet nïne.

⁹Ni kö Jwøki, ni «Beerra man ö pïïyi moa en ko maalli piny ni cooŋge rege kanya ciel nee piny jïte ki kany mo otal.» Ni ö gïnögø ni thur kare.

¹⁰Køøre Jwøk kanya näk otal acwøle ni piny, ni ö pïïyi moa näk rege ege cooŋ kanya ciel ni cwøl ge ni näm. Ni ö Jwøki ni joot gïnögø na gïn mo beer.

¹¹Ni kö Jwøki, ni «Beerra man tuc bäät pinynyi ki luum, ki gïïa marr bëët mo duunnö ki köödhi, ki jenni mo nyöödö ki nyïëdi mo duunnö ki köödhi. Beerra man jït jenni ki nyïëdi ki køør teeŋ wï jaath man nø bäät piny.» Køøre gïïögø athur karge.

¹²Ni ö pinynyi ni tuue ki luum ki jenni ki gïïa marr bëët. Ni ö teeŋ wï gïna marri man nø ni jïte ki nyïëdi ki køør teeŋ wï tuuŋ man nø. Ni ö jenni ni jïtge ki nyïëdi ki køør teeŋ wï jaath man nø. Køøre Jwøk gïnögø ajoode na gïn mo beer.

¹³Ni tïme ni da abøøya ka amöölla. Ni beeye dää nïne.

¹⁴Køøre Jwøk aköö, ni «Beerra man dee gïï mo tar mo rieny maal kiper nee dïcäŋ ki wäär pääŋge; nee tïmge na nyuuthe kiper nïne, ki cwiiri, ki kwöra näk owäŋŋö yi cwiir.

¹⁵Beerra man bëëtge na tar mo rieny maal kiper nee cïpge ki tar bäät piny.» Køøre gïnögø aput thur kare.

¹⁶Ni ö Jwøki ni cwääc gïïa tar na näk ariiø na døøŋŋø døc. Ni tar mana dwøŋŋa eni beeye mana bëën dïcäŋŋi. Ni ö mana thiinhnhi ni tïme ni wäär bëënna gøøni. Ni ö Jwøki ni cwääc ceer thuwø.

¹⁷Gïïögø acïp Jwøki maal kiper nee cïpge ki tar bäät piny,

¹⁸kiper nee dïcäŋ ki wäär käärge na kare nee tar pääge ki muudhö. Ni ö Jwøki ni neen gïïögø ni joot ge ni beyø.

¹⁹Ni tïme ni da abøøya ka amöölla. Ni beeye ŋweer nïne.

²⁰Køøre Jwøk aköö, ni «Beerra man jït yïth nämmi ki gïï mo thööth mo dëëtge da jwïëy; ni jït maalli bäre ki weny mo määdö yie.»

²¹Ni ö Jwøki ni cwääc lääya døøŋŋø yi naama dwøŋ, ki gïïa näk dëëtge da jwïëy bëët ni wø cäädhi yïth pïï; ni cwääc geni ni thööth na wï tuuŋ man nø. Ni cwääc weny bëët thuwø ki køør wï tuuŋ man nø. Ni ö gïïögø ni jooti ya Jwøki na gïï mo beyø.

²²Ni ö Jwøki ni gwïëth geni ni kööe, ni «Nyöödu, ni nyaayu, ni pääŋŋu yïth näpa døøŋŋø bëët. Beerra man ö wenynyi ni nyaacge bäät piny thuwø.»

²³Ni tïme ni da abøøya ka amöölla. Ni beeye bïï nïne.

²⁴Køøre Jwøk aköö, ni «Beerra man jït pinynyi ki gïï ma teeŋi mo kwøw, teeŋ ka lääc paac, ki gïï mo muulö, ki lääc paap ki køør wï tuuŋ man nø.» Køøre gïnögø athur kare.

²⁵Ni ö Jwøki ni cwääc lääc paap bäät piny na wï tuuŋ man nø, ki lääc paac na wï tuuŋ man nø, ki gïïa näk muulö bäät piny bëët na wï tuuŋ man nø. Ni ö Jwøki ni joot gïnögø na gïn mo beer.

²⁶Køør manøgø nø Jwøk aköö, «Beerra man cwääø ki dhaanhø mo rööma øøni mo kïte caala øøni. Eno bëëdö ni jïre da teek bäät rec naam, ki wec maal, ki lääc paac, këël bäät piny bäre ki gïïa näk muulö bëët bäät piny.»

²⁷Ni ö Jwøki ni cwääc dhaanhø ni röömi ki eni, ni cwääc gøøni ni caala kïte. Ni cwääc geni na dïcwøø ki dhaagø.

²⁸Ni ö Jwøki ni gwïëth geni, ni kööe jïge, ni «Nyöödu ni nyaayu, ni pääŋŋu piny, ni dïïmmu gø, ni bëëdu ni jïïu da teek bäät rec naam ki wec maal ki gïïa näk dëëtge da jwïëy bëët mo bäät piny.»

²⁹Køøre Jwøk aköö, «Ennø, gïïa näk kännö ki nyïëdi bëët moa näk otuy bäät piny bäre acïba jïïu, ki jenni bëët moa näk nyïïge duunnö ki köödhi, kiper nee tïmge na cam jïïu;

³⁰ni cïba gïïa marr bëët na cam jï lääy mo bäät piny bëët, ki wec maal bëët, ki gïïa näk cäädhö bëët na näk dëëtge da jwïëy.» Ni ö gïïögø ni thurge karge.

³¹Køøre Jwøk gïïa tïïe bëët aneene, ni joot ge ni beyø døc. Ni tïme ni da abøøya ka amöölla. Ni beeye bïcier nïne.