Read anuak Wïlöölö 12 Bible Online

Wïlöölö 12 - anuak bible

Wïlöölö 12

¹Wuuö Jwøk acäänö ka Abram, ni kööe, ni «Wec pou ki tuuŋu ki dhi øt wäru, ni ciï yi ŋöömmo nyoodha jïrï.

²«Ïïno tïïa na wï jur mo dwøŋ, ni gwïëdha ïïni, ni tïŋa nyeŋŋï maal, ni jït jiyi ki gwïëth ki køørï.

³Ni jøw wäro gwïëth ïïni, gwïëdha gwïëdhö; ni ŋat wäro cien ïïni, ciena cienø thuwø. 'Ba wïth tuŋi bëët mo bäät piny ogwïëth ki køørï.»

⁴Køøre Abram atïŋŋö kaawat mana caani ya Wuuö Jwøki jïre. Ni ö Løøti thuwø ni aae ki eni. 'Ba kanya tïŋ Abrammi ki yi Aaren, cwiiri moe kar kaaca beege cwiiri ma pïërabïriiø kurbïïc.

⁵Ni ö Abrammi ni lwør cïïe ma Caray, ki ö coki ma Løøt, ki jammi moge bëët moa jootge, ki jiy bëët moa jootge Aaren; ni aacge ni ge cøøa ŋööm Keenan. Køøre gena pïï yi ŋööm Keenan.

⁶Ni ö Abrammi ni pöödhe ki dï ŋöömmögø këël mana pïïe kanya cwøl ni Cekam na en jaadha dwøŋŋi yie mar Mörë. 'Ba yi kar kanyøgø jø Keenan oløny ni bëëdö yi ŋöömmögø.

⁷Kanyøgø Wuuö Jwøk ree anyoodhe jï Abram ni kööe, ni «Aani ŋøøpi ii cïba cïbö jï nyïïkwaayï.» Køøre Abram atïïö ki gïn wø cïp olämme bääte jï Wuuö Jwøk na nyooth ree jïgø.

⁸Køøre ena tïŋŋö ki kaace ni cøøa ri kïdi mana en Bëthël, na en jï løø kur tuul-cäŋ. Ni gur oduŋkaara mare piny, ni Bëthël ee wii jï løø kur pänh-cäŋ, ni Gaay ee wii jï løø kur tuul-cäŋ. Køøre ena tïïö ki gïn wø cïp olämme bääte kaace jï Wuuö Jwøk, ni wøør nyeŋ Wuuö Jwøk.

⁹Ni ö Abrammi ni cäŋ tïŋŋö kaace, ni aae ni coonya kanya cwøl ni Nëgëp.

¹⁰Kanyøgø piny atïmö ni da käc. Køøre Abram aci Ijep nee bëëde kaace na wëëllö, kiper käc atïmö ni dwøŋ døc.

¹¹'Ba kanya tïme ni kare cään ki man pïïe Ijep, ena köö jï cïïe ma Caray, ni «Kawaane ennø, ŋääa ni ïïna dhaagø mo kïte mïërö.

¹²Kanymør no ö jø Ijepi noo jootge ïïni, ge köö, ni ‹Man beeye cïïe;› køøre a 'näkge nääö, ni wecge ïïni niï kwøw.

¹³Beerra man kööï ni ïïna coka, kiper nee bäŋe gïn mo tägi dëëra, naa kwøa ki køørï.»

¹⁴'Ba kanya pïïc Abrammi Ijep, jø Ijep Caray ajootge na dhaagø mo kïte mïërö.

¹⁵Ni ö jø kööre mo Peerø[1] ni jootge nyijøøgø, ni pwøcge gø døc buut Peerø, ni ö nyijøøgø ni käli ni kïthi po Peerø.

¹⁶Ni ö Peerø ni tïïe ki gïn mo beer jï Abram kiper nyijøøgø; ni ö Abrammi ni jïte ki dïëk ki dhäk ka arëëni, ki jø tïïc ma mään ki cwøw, ka arëëni ma mädhi ka athïrööle.

¹⁷'Ba Wuuö Jwøk täwe mo leth døc akïth bäät Peerø ki jø paan dwøŋ mare ki køør Caray cï Abram.

¹⁸Køøre Peerø Abram acwøle, ni kööe, na «?Agïnaŋø na tïïyï dëëra en? ?Aperŋø na ba caanï gø jïra en ni nyijøøgø cïïï?

¹⁹?Aŋø na kööï ni ena coku en, ni puta eni lwør na dhaagø jïra? 'Ba cïïï ennø, lwørï ni aayï ki gø.»

²⁰Ni ö Peerø ni kööm jiye kiper Abram. Ni ö jiye ni jiethge Abram ge ki cïïe ki gïïa en jïre bëët.