Read anuak Wïlöölö 13 Bible Online

Wïlöölö 13 - anuak bible

Wïlöölö 13

¹Køøre Abram aö wøk ki Ijep ki cïïe ki gïïa en jïre bëët, ni aae ni cøøa kanya cwøl ni Nëgëp; ni ö Løøti ni aae ki eni ciel.

²Kar kaace Abram ena dhaanhø mo okwär døc, ni jïre da lääc paac mo thööth ki warkey mo päl.

³Ni ö eni ni tïŋŋe ki Nëgëp ni cäädhe këël mana pïïe Bëthël, kanya kwøŋ twïër mare tïïc yie yaakic Bëthël ki Gaay,

⁴ni beeye kanya kwøŋ tïïö yie ki gïn wø cïp olämme bääte. Køøre Abram nyeŋ Wuuö Jwøk awøøre kaace.

⁵'Ba Løøt na aay ka Abram bëët, jïre da pïïth dïëk ki pïïth dhäk ko oduŋkaare thuwø.

⁶'Ba kaace yi ŋöömma pïge piny yie kär rømø kiperge ki lääy moge bëët; kiper gïïa käärge thööth, ni tïme ni ba løny jïge ki man bëëtge na aciel.

⁷Kanyøgøøni atïmö ni da män yïthakic jø kwaath mo Abram ki jø kwaath mo Løøt. Kar kaaca jø Keenan ki jø Përec oløny ni bëëdö yi ŋöömmögø.

⁸Ni kö Abrammi jï Løøt, ni «Beerra man bëëdø ni bäŋ män yïthakiyø ki ïïni, wala yïthakic jø kwaath 'moa ki jø kwaath moï, kiper øøna tuuŋ.

⁹?Aŋø, piny ba nëëni jïrï ni laac jaak ice? Beerra man paanyï riï buuta; ni näk miï jiera bäät caam, a cøøa bäät cwïïc. Ni näk miï jiera bäät cwïïc, a cøøa bäät caam.»

¹⁰Kanyøgø Løøt wïïe atïŋ maal ni raŋ gool mar Jördan, no ojwøc pïïyi bäre, ni poot caala ajïniina mar Wuuö Jwøk, ni caala ŋööm Ijep mana en buut Dhöär, ni manøgø beeye kanya poode ni Wuuö Jwøk Cødam ki Gømöra poot käre raanynyø.

¹¹Køøre Løøt gool mar Jördan bäre ajiere jïre; ni put Løøti tägö ki wääth ni cøøa jï løø kur tuul-cäŋ. Ni put tïmö ni beeye keethø marge.

¹²Ni ö Abrammi ni put bëëte yi ŋööm Keenan, ni ö Løøti ni bëëde yïth päänye mo gool mar Jördan, ni daaŋ twëëre moe këël mana pïïe buut Cødam.

¹³'Ba jø Cødam bëëdö na jø raay mo tïïö ki gïï mo reyø døc nyïm Wuuö Jwøk.

¹⁴Køøre kanya ö Løøti na pääge ka Abram, Wuuö Jwøk aköö jï Abram, ni «Tïŋ wïïï maal ki kanyo enï yie enø, ni neenï but piny karge bëët ki jï løø kur tuul-cäŋ ki jï løø kur pänh-cäŋ;

¹⁵kiper ŋøøpo nëëni jïrï bëët yøø ocïba jïrï na bäre bäre këël nyïïkwaayï mo ööi køørï.

¹⁶Ni tïïa kwään nyïïkwaayï ni thööth ni caala tør bäät piny; køøre ni näk da dhaanhø mo løny jïre ki man kwaan tør bäät piny, løny thuwø ki man kwaan nyïïkwaayï.

¹⁷Ö maal, ni caathï dï ŋöömmögø bäre; kiper cïba cïbö jïrï.»

¹⁸Køøre Abram twïër mare adaae ni aae ni bëëde buut jera døøŋŋø mo Mamrë na en Keeprön, ni tïïe ki gïn wø cïp olämme bääte kaace jï Wuuö Jwøk.