Read anuak Wïlöölö 15 Bible Online

Wïlöölö 15 - anuak bible

Wïlöölö 15

¹Køør gïïögø bëët dwør Wuuö Jwøk aö bäät Abram ki yïth lääk, ni kööe, na «Abram, kärï lwäyö; aani, aana kwöt leny man wø gëëŋ ïïni; ïïno ŋada ki gïn mo dwøŋ.»

²Ni kö Abrammi, «?Wui Kwäärö Wuuö Jwøk, agïnaŋø noo cïpï jïra? Kiper aani jïra bäŋ nyilaal, ni ŋato dööŋ na lwiidhø wï paara beeye Eliëdher nyï Damacka.»

³Ni cäŋ Abrammi köö, ni «Kiper mana näk a kärï mooø ki nyilaal, neenï, laŋŋa nywøl paara beeye noo dööŋ na lwiidhø wï paara.»

⁴Køøre dwør Wuuö Jwøk aö bääte, ni kööe, ni «Ŋati en ba dööŋ na lwiidhø wï paarï; 'ba ïïno jïti ki dhaanhø mo käla dëërï kiree, ni put dööŋö na lwiidhø wï paarï.»

⁵Ni ö Wuuö Jwøki ni käl Abram wøk ki yi øtø ni kööe, ni «Raŋ maal ni kwaanï ceer, ni näk mo løny jïrï ki man kwaanï ge bëët.» Ni kö Wuuö Jwøki jï Abram, ni «Nyïïkwaayï thuwø otïmö ni caala geni.»

⁶Ni ö Abrammi ni ŋääth Wuuö Jwøk, ni ö Wuuö Jwøki ni jïëc Abram ni ena dhaanhø mo mare beer ki køør ŋäädhe mare.

⁷Ni kö Wuuö Jwøki jï Abram, ni «Beeye aani na Wuuö Jwøk na käl ïïni wøk ki yi Ur po jø Kaldia, kiper nee ŋöömmi cïba jïrï nee tïme na moï.»

⁸Ni kö Abrammi, ni «?Wui Kwäärö Wuuö Jwøk, oŋääa gø nidïï ki man näk tïmö na 'moa?»

⁹Ni kö Wuuö Jwøki jï Abram, ni «Kännï jïra ki dhieŋ mo cwiiye adäk, ka ateea ma maath mo cwiiye adäk, ki nywø røømmø mo cwiiye adäk, ka akuuru mar paac ki mar paap.»

¹⁰Køøre gïïögø bëët akäl Abrammi jï Wuuö Jwøk, ni ŋøør ge ki dïge, ni peeth thääŋ man nø piny ni dïët ki thääŋ maya. 'Ba akuyi käre ŋørø.

¹¹Køøre weny alööny piny nee rïŋ camge, ni ö Abrammi ni riem geni.

¹²Køøre kanya tïme ni cäŋ kwaara piny, Abram nyeŋŋe ajïtö ki niine ni bute døc, ni ö muudhö mo cøl døc ki lwär mo päl ni öge bääte.

¹³Ni kö Jwøki jï Abram, ni «Wär ŋäyï møn ni nyïïkwaayï obëëdö na wëëlle yi ŋöömma näk paa marge, ni tïnyge jøøgø ni gena laaŋe, ni ö nyïïkwaayï ni caari ki cwiiri ma dïpe aŋween.

¹⁴'Ba aani thuwø jø otïnyge ojääla; køøre nyïïkwaayï ööa wøk paanøgø ni jïge da jammi mo thööth.

¹⁵'Ba ïïni, ïïno thøw ni läpï køør kwäyu ni yiï met; ni koony ïïni ni jalø mana jalï ki gø poot beer.

¹⁶'Ba nyïïkwaayï oruu paanøgø këël ŋweer beenhnhe, køøre geno duu kany, kiper raay mo jø Amör[2] poot kär këët kanya manynyi ki man raany ge.»

¹⁷'Ba kanya päth cäŋŋi, piny atïmö ni cøl døc, ni ö maaci mo duuŋ yi dak ka ameet mo liel ni pööthge ki dïër yïthakic thäk lääya näk oŋørø ki dïge.[3]

¹⁸Dïcäŋöca Wuuö Jwøk atudö ki luubö ka Abram, ni kööe, ni «Ŋöömö man acïba jï nyïïkwaayï, ki mano täge ki naam jø Ijep këël mano këët naama dwøŋ, na näk Upareeti,

¹⁹ni beeye ŋøøp jø Këën, ki jø Kënec, ki jø Kadmön,

²⁰ki jø Këth, ki jø Përec, ki jø Rapayim,

²¹ki jø Amör, ki jø Keenan, ki jø Gërgëca, ki jø Jeebuc.»