Read anuak Wïlöölö 16 Bible Online

Wïlöölö 16 - anuak bible

Wïlöölö 16

¹'Ba Caray na näk cï Abram bäŋ obwöre mo ege nywølø ka Abram. 'Ba jïre da laŋŋø ma nyi jø Ijep mo nyeŋŋe cwøl ni Eegar.

²Ni kö Caray jï Abram, ni «Ennø, Wuuö Jwøk aana mäne ki man nyööda ko obwöre. Beerra man ciï baŋ dhaaŋŋa näk laŋŋø mara; kanymør aano jïti ko obwöre ki køøre.» Køøre Abram dwør cïïe ma Caray aleŋe.

³Ni ö Caray cï Abram ni lwør Eegar nyi jø Ijep na näk laŋŋø mare, ni cïp gø jï cwøre ma Abram nee tïme na cïïe. Ni gïnögø tägi ka køør cwiiri apaar moa beet Abrammi yi ŋööm Keenan.

⁴Ni ö Abrammi ni ci baŋ Eegar, ni jït yi Eegarri ki dhaanhø. 'Ba kanya ö Eegarri na joot gø ni yie da dhaanhø, ena tägö ki man raŋ Caray na tïnynye ni ee taaø.

⁵Køøre Caray aköö jï Abram, ni «Bääyö mana baac Eegarri dëëra en, tiere käla baŋï, kiper nyaana näk laŋŋø mara acïba jïrï na cïïï; 'ba kanya joot gø ni yie da dhaanhø, aana raŋŋe naa ee taaø. Beerra man ö Wuuö Jwøki ni ŋøl luubö manøgø yïthakiyø ki ïïni.»

⁶'Ba Abram aköö jï Caray, ni «Kare møn, laŋŋø manøgø ena cerï; gïna caarï ni beerra eni jaak ki jïrï wär tïïyï dëëre.» Køøre Caray laŋŋøgø aput caannø ki caannø mo leth, ni ö nyaanøgø ni put päär wøk buute.

⁷Kanyøgøøni Eegar ajoot nyïïatwielli mar Wuuö Jwøk ni ena buut jøøro dï paap, ni jøøro manøgø ena jööra näk cøøa paana cwøl ni Cur.

⁸Ni kö nyïïatwielli jïre, ni «?Eegar laŋ Caray, ï kälï kaa? ?Ï ciï kaa ŋø?» Ni dwøk gø jïgø, na «A päny wøk ki baŋ Caray ŋata tïnynya.»

⁹'Ba nyïïatwiel Wuuö Jwøk aköö jïre, ni «Døø baŋ Caray na tïnynyï, ni cïpï dëërï jïre ni bëëdï niï ena tiere.»

¹⁰Ni kö nyïïatwiel Wuuö Jwøki jïre thuwø, ni «Nyïïkwaayï otïïa ni thööth, ni nyaacge këël mano tïmge ni ba løny ki kwaan.»

¹¹Ni cäŋ nyïïatwiel Wuuö Jwøki köö jïre, ni «Neenï, yiï oløny ni da dhaanhø; ïïno lwaar ki gø na dïcwøø; ni cagï nyeŋŋe ni Icmiel, kiper Wuuö Jwøk gïïa jwørï bëët awïnynye.

¹²'Ba eno bëëdö na dhaanhø mo caala arëën-paap, ni bëëde na dhaanhø mo manynya leny ki jiy bëët, ni tïm jiyi bëët ni manynya leny ki eni thuwø; 'ba eno bëëdö no opääö ki tuuŋge.»

¹³Køøre Eegar nyeŋ Wuuö Jwøk na cäänö ki eni acaae, ni kööe, ni «Ïïna El-Röi,[4]» ni kööe, na «?Aŋø, ki køør mana jooda Jwøk kany en, a poot bëëdö naa kwøw møn?»

¹⁴Kiper manøgø nø, iith mana en kaace aput cwøl ni Bëër-Laay-Röi;[5] ni iidhøgø ena yaakic Kadëc ki Berët.

¹⁵'Ba Eegar alwaar ki dhaanhø ma dïcwøø ni jït Abrammi ki wääde; ni ö Abrammi ni cak nyeŋ wääde na lwaar Eegarri ki gø ni Icmiel.

¹⁶Kar kanya ö Abrammi na joot wääde ma Icmiel na lwaar Eegarri ki gø, Abram cwiiye oløny na pïërabära ka abïciel.