Read anuak Wïlöölö 20 Bible Online

Wïlöölö 20 - anuak bible

Wïlöölö 20

¹Køøre Eeberam adak kanya bëëde yie, ni aae ni cøøa ŋööm Nëgëp, ni bëëde yïthakic Kadëc ki Cur, ni bëëde na wëëllö yi Gërar.

²Kanya bëëde Gërar, ena köö ni cïïe ma Ceera beeye coki. Kanyøgø Abimëlëk na näk nyeny Gërar ajääk baŋ Ceera ni lwør gø.

³'Ba Jwøk aö bäät Abimëlëk ki yïth lääk ki wäär, ni kööe jïgø, «Ennø, kee ïïna dhaanhø mo othøw kiree, kiper dhaaŋŋøgø na lwørï enøgø beeye dhaagø mo da cwøre.»

⁴'Ba kar kaaca Abimëlëk poot bäŋ gïn mo ee tïïö ki nyijøøgø. Køøre ena köö, «?Aŋø Awuuö, paac diï raanynyø këël na bëëde ni bäŋ gïn ewa baaø?

⁵?Aŋø, paa Eeberam ki dëëre na caan gø jïra, ni ‹Nyaanøgø beeye coka›? Ni ö nyijøøgø thuwø ki dëëre ni caan gø, ni ‹Ena coka.› Gïna tïïa en tïïa ka cwïny mo leer, ni bäŋ gïn mo raac mo yaa tïïö.»

⁶Kanyøgø Jwøk acäänö ki eni ki yïth lääk ni kööe, ni «Kare møn, gïna tïïyï enøgø, ŋääa ni tïïyï ka cwïny mo leer. 'Ba aani thuwø ïïna mäna ki man ba ciï baŋ nyaanøgø, kiper niï ba bääyï dëëra.

⁷'Ba ennø, dwøk cï ŋatøgø jïre, kiper ena nyikuŋ Jwøk; køøre eno lämö kiperï kiper niï kwøwï. 'Ba ni näk nyaanøgø ba dwøgï, wär ŋäyï niï thøw møn, ïïni ki jø paarï bëët.»

⁸'Ba na tïme na amöölla cøøn, Abimëlëk apäny maal, ni cwøl jø døøŋŋø moe bëët, ni caan gïïögø bëët ni wïnyö jïge; ni ö jøøgø ni lwäcge døc.

⁹Køøre Abimëlëk Eeberam acwøle, ni kööe jïgø, «?Aŋø, a teeŋ gïnaŋø na tïïyï dëëtwa en? ?A teeŋ bääyö mo nyïëdi na baaa dëërï en, ni putï kän bääta ki jø paara ki bääyö mo dwøŋ en? Ïïna tïïö dëëra ki gïn mo ba doo maar tïïc cøøn.»

¹⁰Ni cäŋ Abimëlëki köö jï Eeberam, ni «?Tiere aŋøøni na tïïyï teeŋ gïnögø kipere?»

¹¹Ni kö Eeberammi, ni «Ka adïëri møn beeye kiper mana jooda gø ni jøøi ni kany en nëëni keda jiy mo ba lwäär ki Jwøk; ni nëëni keda a 'näkge nääö jaak kiper dhaagø mara.

¹²'Ba ka adïëri møn, nyaanøgø acwøla ni coka, kiper ena nyi wära, 'ba mëëkwa kethe, køøre nø ena put tïmö na cïïa.

¹³Ni ki køør mana ö Jwøki ni wëëk a wääth kwör mo bäyö ki po wära, aana köö jï dhaagø mara, ni ‹Gïno tïïyï cooth ni nyootha mëër mana mëërï ki aani beeye en; kany wäro cøø yie jaak, wärï wø kööï ni aana coku.› »

¹⁴Køøre Abimëlëk akän wøk ki dïëk ki dhäk ki laaŋe ma cwøw ki mään ni mëëk geni Eeberam, ni dwøk cïïe ma Ceera jïgø.

¹⁵Ni kö Abimëlëki, ni «Neenï, ŋöömö mara ni nyïmï bäre enø; bëëdï kanya manynyï na met yiï ki gø jaak.»

¹⁶Ni kööe jï Ceera, ni «Neenï, coku amooa ki gwel ma kuma kiper nee tïme na gïn mo rïëpa luubö manøgø, nee wödö marï nëëne ni mïërö nyeŋ jøøa en buutï bëët, nee ŋäc jiyi thuwø ni bäŋ gïn mo iï baaø.»

¹⁷Køøre Eeberam alämö jï Jwøk; ni ö Jwøki ni køny Abimëlëk ki cïïe ki laaŋe moa näk mään moe, ni ö geni ni nyöötge ko obwöre.

¹⁸Kiper Wuuö Jwøk mään moa en po Abimëlëk bëët ee mänö ki man jïtge ko obwöre kiper mana ö Abimëlëki na lwør Ceera cï Eeberam.