Read anuak Wïlöölö 21 Bible Online

Wïlöölö 21 - anuak bible

Wïlöölö 21

¹'Ba Wuuö Jwøk aö kuna køny Ceera kaawat mana caane, ni ö Wuuö Jwøki ni tïïc gïna kwøŋ buuk jïgø.

²Ni ö Ceera ni jït yie ki dhaanhø, ni lwaare ki gø na dïcwøø, ni jït Eeberammi ki wääde ni eno nø jalø, kar kanya caan Jwøki jïre kiree.

³Ni ö Eeberammi ni cak nyeŋ wääde na nywøl cïïe ma Ceera ni Aydhak.

⁴Køøre Eeberam wääde ma Aydhak adaŋe kanya tïme ni nïre abära wøk, ki køør mana köömmi Jwøki.

⁵'Ba kanya ö Eeberammi na joot wääde ma Aydhak, cwiiye oløny na dïpa.

⁶Køøre Ceera aköö, ni «Jwøk aana wëëk ŋeethø, ni ŋat wäro wïny gø jaak puta ŋeethø kaamar mara.»

⁷Ni cäŋ köö, na «?A ŋata ŋa na doo köö jï Eeberam ni Ceera odhwödhö ki nyilaal? Kiper aana nø lwaar, ni jït Eeberammi ki wääde ni eno nø jalø.»

⁸Ni ö nyilaalli ni døøŋŋe ni mäni ki caak, ni ö Eeberammi ni tïme ka ajwöma mo päl døc dïcäŋa män Aydhak yie ki caak.

⁹'Ba Ceera, wär Eeberam mana nywøle ki Eegar na näk nyi jø Ijep ajoode ni buuö cooth.

¹⁰Ni kö Ceera jï Eeberam, ni «Riem laŋŋøgø ki wääde, kiper nee wääde ba tïme na lwiidhø ki wääda ma Aydhak bëët.»

¹¹Køøre gïnögø atïmö na gïn mo cwïny Eeberam opädhö ki gø døc kiper wääde ma Icmiel.

¹²'Ba Jwøk aköö jï Eeberam, ni «Kär cwïnyï pädhö kiper nyilaal ki menni na näk laŋŋø marï; gïno caan Ceera jïrï jaak, wär leŋï, kiper Aydhak beeye no cwøl nyeŋ nyïïkwaayï ki køøre.

¹³'Ba o nyaana näk laŋŋø marï tïïa tïïö na wï jur thuwø, kiper eni käla dëërï.»

¹⁴Køøre kanya tïme na amöölla cøøn, Eeberam amøøl wøk, ni lwöte ki cam ka agwäy mar pïï ni wëëk geni Eegar, ni jiee gø göön gø, ni cïp nyilaal jïgø, ni wëëk gø wääth. Ni ö Eegarri ni aae, ni wïïre dï paap Bëërcïïba.

¹⁵'Ba kanya nø thum pïïyi moa en ya agwäy ki maath, Eegar nyilaal awii tier abuŋŋö aciel dï paap kaace.

¹⁶Køøre ena aay ni pï piny kany mo bäär mëëth mo bäye caala cuŋ atheerø mo othöörö, kiper mana kööe, ni «Beerra man thøw nyilaalli manøgø ni ba nëëni jïra.» 'Ba na pï piny kaace ni dïët ki nyilaal, ena tägö ki man gööe ko oduuru.

¹⁷Ni ö Jwøki ni wïny dwør nyilaal ni jwöŋö thuwø; ni ö nyïïatwiel Jwøki ni cwøl Eegar ki maal, ni kööe jïgø, «?Eegar, agïnaŋø na tägö dëërï? Kärï lwäyö, kiper Jwøk dwør nyilaal awïnynye ni jwöŋö kanyo en yie enø.

¹⁸Ö maal, ni ciï ni tïŋï nyilaal maal, ni magï gø ki cerï; kiper eno tïïa na wï jur mo dwøŋ.»

¹⁹Kanyøgø nyeŋ Eegar ajap Jwøki ni joot iith; ni cøøe ni pääŋ ya agwäy ki pïï, ni maath nyilaal ki pïï.

²⁰'Ba Jwøk abëëdö ki nyilaal, ni døøŋŋe; ni bëëde dï paap, ni tïme na ŋat mo dwaar ŋääe ka atheerø.

²¹Ni bëëde dï paap Paran; ni nyöömmi ya menni ki dhaagø ma nyi jø Ijep.

²²'Ba kanya tïme na kar kaaca, Abimëlëk aöö ki Piköl ŋata näk kwääy lwaak mare, ni cääne ki Eeberam, ni kööe, ni «Jwøk ena buutï ki ri jammi bëët mo wø tïïyï.

²³'Ba ennø, beerra man kööŋï nyïma ki nyeŋ Jwøk, ki man ba tïïï ka atade dëëra, ki røk wääta këël røk nyïïkwaaya bëët; 'ba ki køør bäth ec mana nyoodha jïrï, bäth ec diï nyoodhø jïra thuwø, këël jï paan bëëdï yie ni ïïna wëëllö enø.»

²⁴Ni kö Eeberammi, ni «Wøp, aana kööŋ.»

²⁵'Ba Eeberam luubö mør mo obøth apare jï Abimëlëk, kiper gïna tïïc jiy mo Abimëlëk na dwøcge iith.

²⁶Ni kö Abimëlëki, ni «Aani ŋata tïïc gïnögø kuua; kiper kärï caanø jïra, ni beeye wïnynye jïra dïcäŋi ennø.»

²⁷Køøre Eeberam alwötö ki dïëk ki dhäk, ni mëëk geni Abimëlëk; ni ö geni karge riet ni tutge ki luubö.

²⁸Ni ö Eeberammi ni cïp nyïïdïëk abïriiø ma rööm ma mädhi kur keerge mo lwøre ri pïïth dïëk moe.

²⁹'Ba Abimëlëk aköö jï Eeberam, na «?Aŋø, nyïïrööm moi na mädhi ni iï cïp kur keerge na abïriiø ii, tiere agïnaŋø?»

³⁰Ni kö Eeberammi, ni «Nyïïrööm moi na abïriiø na mädhi ii lwørï lwørø cera, nee tïme ni beeye nyuudhi kiper iith mana näk yaa koonyø kany, nee ŋäc ni koonya aani.»

³¹Kiper manøgø nø, kaace acwøl Eeberammi ni Bëërcïïba, kiper kaace beeye kanya öge ni kööŋge yie karge riedi.

³²Kanya nø tutge ki luubö Bëërcïïba, Abimëlëk ki Piköl na näk kwääy lwaak mare aö maal ni døøge yi ŋööm Pilitin.

³³Køøre Eeberam apïïdhö ki jaath mo cwøl ni temïr [10] Bëërcïïba, ni wøør nyeŋ Wuuö Jwøk kaace, na näk Jwø wø bëëdö na bäre bäre.

³⁴Ni ö Eeberammi ni bëëde ki nïne mo thööth na wëëllö yi ŋööm jø Pilitin.