Read anuak Wïlöölö 23 Bible Online

Wïlöölö 23 - anuak bible

Wïlöölö 23

¹'Ba cwiiri moa beet Ceera bëët beege cwiiri ma dïpa aciel ki pïërariiø ka abïriiø.

²Køøre Ceera athøø Kiriat-Arba na näk Keeprön yi ŋööm Keenan; ni ö Eeberammi ni jwøk cïïe ma Ceera ni kïmme kipere.

³Køøre Eeberam aö maal ki bäät thøø ni ci baŋ jø Këth, ni cääne ki ge, ni kööe,

⁴ni «Aani a bëëdö buutu kany ni aana wëëllö naa path; cïpu jïra ki ŋøøm buutu kany mo kunynya yie, kiper nee dëër dhaanhø mana thøw ice kana yie, nee ba raŋŋa këët.»

⁵Køøre aløk jø Këthi jï Eeberam, ni köge,

⁶ni «Kwäärö, wïny marwa; ïïna dhaanhø mo karï dwøŋ døc buutwa kany; kan dhaanhø mana näk othøw yi kää mana näk ojierø na beerra eni døc røk kääk moa näk mowa; bäŋ dhaanhø aciel dïwa kany mo kää mare mäne mänö ki ïïni ki man kanï dëër dhaanhø mana näk othøw yie.»

⁷Køøre Eeberam aö maal ni kuul wïïe piny nyïm wëëk ŋøømmi na näk jø Këth.

⁸Ni cääne ki geni, ni kööe, «Ni näk mo uuno jïëy ki man kana dëër dhaanhø mana näk othøw, nee ba raŋŋa këët, wïnynyu mara; pëënynyu Ëprön wär Dhöar jïra,

⁹kiper nee kään kïdi mana näk mare, na en cuŋ pwöthe na en Makpila, nee cïbe jïra nyïmmu kany, kiper nee gäte bäre cïba jïre, nee tïme na kany kunynya yie.»

¹⁰Kar kanyøgø Ëprön nutö dï jø poge ma jø Këth; ni ö Ëprönni nyï Këth ni dwøk gø jï Eeberam ni wïnyö jï jø Këth bëët, ni beege jøøa näk öö kar acooŋa mar pääny poge, ni kööe,

¹¹ni «Kwäärö, beerra man wïnynyï mara; pwödhö manøgø ki kään kïdi mana en yie acïba jïrï bëët. Acïba jïrï møn nyïm jø powa bëët; kan dëër dhaanhø mana näk othøw yie.»

¹²Køøre Eeberam wïïe aput kuul piny nyïm wëëk ŋøømmi.

¹³Ni cääne ki Ëprön ni wïnyö jï wëëk ŋøømmi, ni kööe, ni «Ni näk mo mara wïnynyï wïnynyö nø, doo beer; aani gät pwödhö manøgø cïba cïbö jïrï; jïëyï ki man lwørï gäte baŋa, kiper nee dëër dhaanhø mana näk othøw kana yie kaace.»

¹⁴Ni ö Ëprönni ni løk gø jï Eeberam, ni kööe jïgø,

¹⁵ni «Kwäärö, wïny mara nø; gät thäk ŋøøm moøgø doo rømø ki gwel ma dïpe aŋween keerge. ?Aŋø, da gïn mo ø doo pïëmö ki ïïni kipere cøøn? Kan dëër dhaanhø mana näk othøw yie.»

¹⁶Køøre Eeberam dwør Ëprön aleŋe; ni ö Eeberammi ni put warkey røm nyïm jø Këth kaa mana caani Ëprönni ni wïnyö jïge bëët, ni beege gwel ma dïpe aŋween, ki køør rumi man wø rum jø gathi ki gø.

¹⁷Køøre pwöth Ëprön na en Makpila, na näk dïët ki Mamrë, pwöthögø bäre ki kään kïdi mana en yie, ki jenni moa en yie bëët, aci jï Eeberam,

¹⁸ni put tïmö na mare nyïm jø Këth, jøøa näk oci kar acooŋa bëët mar päänyögø.

¹⁹Køøre nø, Eeberam cïïe ma Ceera akan yi kään kïnna en Makpila na näk dïët ki Mamrë, na näk Keeprön na en yi ŋööm Keenan.

²⁰Ni ö pwöthögø ki kään kïdi mana en yie bëët, ni ci jï Eeberam ni tïme na kany kuny yie buut jø Këth.