Read anuak Wïlöölö 26 Bible Online

Wïlöölö 26 - anuak bible

Wïlöölö 26

¹'Ba meel mør acäŋ tägö bäät piny, køør meel mana kwøŋ tägö yïth nïra beet Eeberammi. Køøre Aydhak aa Gërar po Abimëlëk nyeny jø Pilitin.

²Ni ö Wuuö Jwøki ni nyooth ree jï Aydhak, ni kööe, ni «Kär niï cøøa Ijep; bëëdï yi ŋöömmo caana jïrï en.

³Pï piny yi ŋöömmi, ni bëëdï ni ïïna wëëllö; 'ba aano en buutï ni gwïëdha ïïni, kiper ŋöömö man bäre en ocïba jïrï ki nyïïkwaayï, ni wëëga kööŋ mana kööŋa ki gø jï wäru ma Eeberam thur kare.

⁴Ni tïïa nyïïkwaayï nee nyaacge ni caala ceer mo maal, ni wëëga ŋöömö man bäre en geni; ni ö wïth juurre mo bäät piny bëët ni gwïëdhi ki køørge.

⁵Gïïögø bëët otïïa kiper mana ö Eeberammi na leŋ dwøra ni gwøk luupa, ki ciik 'moa, ki gïïa cema ki pwöc 'moa bëët.»

⁶Køøre Aydhak aput bëëdö Gërar.

⁷'Ba kanya ö jø paanøgø na pëënyge eni kiper cïïe, ena köö, ni «Nyaanøgø beeye coka,» kiper ena lwäyö ki man caan gø ni cïïe, kiper ee caarø ni kanymør jø paanøgø eni 'näkge nääö jaak kiper Rebëëka na kïte mïërö.

⁸'Ba kanya nø bëëde kaace ki kany mo bäär mëëth, Abimëlëk nyeny jø Pilitin alwïthö wøk ki dha awëërnyeŋ, ni joot Aydhak ni kwääk ki cïïe ma Rebëëka.

⁹Køøre Abimëlëk Aydhak acwøle, ni kööe, ni «Ka adïëri møn, nyaani en beeye cïïï. ?Aperŋø na kööï ni ena coku?» Ni kö Aydhaki jïre, ni «Beeye kiper mana caara gø ni kanymør naa di nääö jaak kipere.»

¹⁰Ni kö Abimëlëki, na «?Agïnaŋø na tïïyï dëëtwa en? A kanymør nø, doo da dhaanhø aciel røk jøøi mo ci baŋ cïïï na dhaagø; ni tïme ni beeye ïïni na doo käl ajäla manøgøøni kiree bäätwa.»

¹¹Køøre Abimëlëk jiye bëët aceme, ni kööe, ni «Ŋato gut nyenøgø jaak wala cïïe, ŋatøca wär thøøe.»

¹²'Ba Aydhak apurö yi ŋöömmögø, ni ciek caammi jïre døc cwiinaca. Ni ö Wuuö Jwøki ni gwïëth eni,

¹³ni tïme na kwäärö døc, ni ö kwärri mare ni meet ree, ni put tïmö ni cäätha maal;

¹⁴kiper eni jïre da pïïth dïëk ki pïïth dhäk ki jø tïïc mo thööth. 'Ba jø Pilitin cwïnyge ajïtö ki keec ki eni.

¹⁵Ni ö jø Pilitinni ni dïïrge ïïdhi moa näk okoony jø tïïci mo wänni ma Eeberam yïth nïra beede, ni pääŋge ge ki ŋøøm.

¹⁶Køøre Abimëlëk aköö jï Aydhak, ni «Aayï buutwa kany, kiper atïmö ni teeka ïïni døc ki waani.»

¹⁷Ni ö Aydhaki ni put kaagø wec, ni aae ni tïïc twïër mare yi goor Gërar, ni bëëde kaace.

¹⁸Køøre Aydhak ïïdhi mo pïï moa näk okoonyø yïth nïra beet wänni ma Eeberam acäŋ koonynyø, kiper mana näk odïïr jø Pilitin køør thøw Eeberam; ni cwøl ge ki nyeŋ moa dïkwøŋ na cøøri wänni ki ge.

¹⁹'Ba kanya ö jø tïïci mo Aydhak na kunyge yi gool mana en kaace, gena jïtö ki iith mo cwïër.

²⁰Ni ö jø kwaathi mo Gërar ni pïëmge ki jø kwaath mo Aydhak, ni köge, ni «Pïï moi mowa.» Køøre Aydhak nyeŋ iith manøgø acwøle ni Ëcëk, kiper na pïëm jøøgø ki eni.

²¹Køøre gena cäŋ kunyö ki iith mør, ni cäŋge pïëm kipere thuwø, ni cwøl nyeŋ gø ni Citna.

²²Ni daak ree kaace ni kuny jiye ki iith mør, 'ba ge kär pïëmö kipere këët; ni cwøl nyeŋ gø ni Rööböth, kiper ena köö, ni «Ennø, Wuuö Jwøk acïpö jïïø ki kany mo laac; øøno nyaai yi ŋöömmi nø.»

²³Køøre Aydhak aay kaace ni ci Bëërcïïba.

²⁴Ni ö Wuuö Jwøki ni nyooth ree jïre yi wäänögø kiree, ni kööe, ni «Aana Jwø wäru ma Eeberam; kärï lwäyö, kiper a ena buutï. Ïïno gwïëdha, ni meeda nyïïkwaayï ni nyaacge ki køør dhaanhnha ma Eeberam.»

²⁵Køøre Aydhak atïïö ki gïn wø cïp olämme bääte kaace, ni wøør nyeŋ Wuuö Jwøk, ni gur oduŋkaare moe piny kaace; ni ö jø tïïci moe ni kunyge ki iith kaace.

²⁶Køøre Abimëlëk aö baŋ Aydhak ki paare na näk Gërar, ni bee eni ki nyinyïme ma Aköjath, ki Piköl ŋata näk kwääy lwaak mare.

²⁷Ni kö Aydhaki jïge, na «?Agïnaŋø na öömu baŋa, ni uuno nø männö ki aani, ni riemmu aani buutu?»

²⁸'Ba gena köö, na «Ajootwa møn ka adïëri ni Wuuö Jwøk ena buutï; ni beeye ni köwa ennø, ni beerra man kööŋø yïthakiyø ki ïïni, nee ø tuudø ki luubö ki ïïni,

²⁹kiper nee bäŋe gïn mo raac mo tïïyï dëëtwa, kaawat mana kärwa ïïni gudö ni kärwa tïïö ki gïn mo raac dëërï, 'ba beeye gïn mo beer keere na tïïcwa, këël mana wëëkwa ïïni wääth ki met ec jaak. Ni ennø, ï nëënï ni ïïna dhaanhø mo ogwïëth Wuuö Jwøki møn.»

³⁰Kanyøgø Aydhak cam mo päl ajiiŋŋe jïge, ni cämge ni mäthge.

³¹Køøre na tïme na amöölla cøøn gena päny maal ni kööŋge yïthakicge; ni ö Aydhaki ni wëëk geni wääth, ni putge aay buute ni yïthge met.

³²'Ba na poode na dïcäŋögø kiree, jø tïïc mo Aydhak aö baŋe ni ge køpa gïr iith mana koonyge, ni köge jïre, ni «Iith atuc.»

³³Ni ö Aydhaki ni put nyeŋ iithøgø cwøl ni Cïïba; kiper manøgø nø, nyeŋ pääny mana en kaace poot cwøl ni Bëërcïïba këël dïcäŋi ennø.

³⁴'Ba kanya tïm Icøø ni cwiiye pïëraŋween, ena nyöömmö ki mään ariiø ma nyïï jø Këth, ni beege Judit nyi Bëëri ki Bacimat nyi Ëlön.

³⁵Ni ö gïr nyïgöge ni tïme na pänh cwïny mo dwøŋ jï Aydhak ki Rebëëka.