Read anuak Wïlöölö 27 Bible Online

Wïlöölö 27 - anuak bible

Wïlöölö 27

¹'Ba kanya nø tïm Aydhaki ni dwøŋ, ni nyeŋŋe rääbö ni ba nëënö døøc këët, wääde ma Icøø na näk kanynye acwøle, ni kööe jïgø, ni «Nyie wääda.» Ni kö Icøø jï wänni, ni «Aani en.»

²Ni kö Aydhaki, ni «Ennø, aana nø døøŋŋø ni dïcäŋ man thøøa yie kiree kuua.

³'Ba ennø, beerra man lwørï jap dwaar moï, na näk athëëre moï ka atum marï, ni ciï paap baŋ dwaar ni kännï ki rïŋö jïra;

⁴ni tëënnï aani ki cam mo met døc mo yia met ki gø, ni kälï gø baŋa nee cama, kiper niï gwïëdha kany pooda naa poot kär thøw en.»

⁵'Ba kanya ö Aydhaki na cään wääde ma Icøø, Rebëëka bëëdö ni ïthe ee ciiø ni wïnynya luup moøgø. Køøre kanya nø aa Icøø paap baŋ dwaar nee jïte ki rïŋö mo käl paac,

⁶Rebëëka aköö jï wääde ma Jeekap, ni «Ennø, luubö mør awïnynya dhi wäru ni cäänna coku ma Icøø, ni kööe

⁷ni Icøø känne jïre ki rïŋö, ni thaal gø ni met døc nee came, kiper nee gwïëdhe nyïm Wuuö Jwøk kany poode ni eni poot kär thøw ice.

⁸'Ba ennø wääda, wïny dwøra man caana jïrï en.

⁹Ci kaal kaace ni kännï jïra ki nyïïdïëk ariiø ma atëëe mo beyø, kiper nee thaala na cam mo met døc jï wäru, ni caala man wø met yie ki gø.

¹⁰Køøre nø, kïthï baŋ wäru nee came, kiper niï gwïëdhe kany poode ni eni poot kär thøw ice.»

¹¹'Ba adwøk Jeekapi jï menni ma Rebëëka, ni «Kare møn nø; a coka ma Icøø ka dhaanhø mo dëëre da jïër, ni aani aana dhaanhø mo dëëra pøøth jaak.

¹²Kanymør wära no mul dëëra, eni köö naa pääta gø, ni manøgøøni caana gø naa käla acïëni bääta ni paa gwïëth.»

¹³'Ba menni aköö jïgø, ni «Nyie wääda, acïëni marï bee, oen bääta. Leŋ dwøra keere; ciï ni kälï gïïa caana jïrï baŋa.»

¹⁴Køøre ena aay ni lwør nyïïdïëk, ni put ge kälö jï menni; ni ö menni ni tïïe ki cam mo met døc ni caala man wø met yi Aydhaki ki gø wø bëëde.

¹⁵Ni ö Rebëëka ni lwør abïïk wääde ma Icøø na näk kanynye; ni beege abïïge moa beyø døc na en yi øtø buute, ni røø ge dëër wääde ma Jeekap na thiinh.

¹⁶Ni rïëp pëët nyïïdïëk moøgø ceŋ wääde ki ŋute na pøøth.

¹⁷Ni cïp cama met døc na tïïe cer wääde ma Jeekap.

¹⁸Ni put Jeekapi ö baŋ wänni, ni kööe, na «Awuuö.» Ni kö Aydhaki, ni «Aani en. ?Aŋø, ïïna wääda mane?»

¹⁹Ni kö Jeekapi jï wänni, ni «Aana Icøø na näk kanynyï; gïna caanï jïra atïïa. Ö maal nø, ni camï rïŋö mana käla, naa gwïëthï.»

²⁰'Ba Aydhak aköö jï wääde, na «?Aŋø nyie wääda, iï laar joot yi wäne kawaane en?» Ni kö Jeekapi, ni «Kiper beeye Wuuö Jwøk, Jwøk marï, na tïïc gø nee laar lønyø jïra.»

²¹Køøre Aydhak aköö jï Jeekap, ni «Nyie wääda, beerra man nyänhnhï buuta, nee dëërï mula ki man näk ïïna wääda ma Icøø møn wala paa ïïni.»

²²Ni ö Jeekapi ni put nyiik buut wänni ma Aydhak, ni ö Aydhaki ni mul dëër wääde, ni kööe, ni «Dwøl bëëdö keda dwør Jeekap, 'ba ceŋ beege ceŋ Icøø.»

²³'Ba Aydhak wääde käre ŋiiø, kiper mana tïme ni ceŋŋe da jïër ni caala ceŋ coki ma Icøø. 'Ba kanya tïme ni manynya man gwïëth gø,

²⁴ena cäŋ pëënynyö, ni kööe, «?Ka adïëri møn, ïïna wääda ma Icøø?» Ni kö Jeekapi, ni «Beeye aani.»

²⁵Ni kö Aydhaki, ni «Käl gïna kälï ki paap baŋa nø, nee rïŋ wääda cama, kiper niï gwïëdha.» Ni put cam kälö jï wänni, ni cäme; ni ö Jeekapi ni känne jï wänni ki køøŋ nyïïomøki thuwø, ni mädhe.

²⁶Køøre Aydhak aköö jï wääde, ni «Nyie wääda, beerra man nyänhnhï buuta kany ni nuumï dhaa.»

²⁷Ni ö Jeekapi ni nyiik buute ni nuum dhi gø. 'Ba kanya ŋwääc ŋwääny abïïk wääde, wääde agwïëdhe, ni kööe, ni «Ennø, ŋwääny dëër wääda, ŋwääi keda ŋwääny paap mo ogwïëth Wuuö Jwøki.

²⁸Beerra man ö Jwøki ni wëëk thööy mo maal ïïni, ki lurö mar ŋöömö; ni mooc ïïni ki bëëlö mo päl, ki kwøk nyïïomøki mo thööth;

²⁹beerra man tïm wïth juurre ni tïnynya ïïni, ni këëlge cøŋge piny nyïmï ni wøørge ïïni; ni tïmï ni ïïna kwäärö wïth nyïïmeru, ni ö geni ni këëlge cøŋge piny nyïmï ni wøørge ïïni. Acïëni oen bäät jø ocien ïïni, ni ö gwïëthi ni en bäät jø ogwïëth ïïni.»

³⁰'Ba kanya løny Aydhaki ki gwïëth Jeekap, ni Jeekap onø aa wøk buut wänni ma Aydhak, coki ma Icøø aput pïï ki baŋ dwaar.

³¹Ni tïïe ki cam mo met døc thuwø, ni käl gø baŋ wänni; ni kööe jï wänni, na «Awuuö, ö maal nø, ni camï rïŋ wäädï, naa gwïëthï.»

³²Ni kö wänni ma Aydhak, na «?Aŋø, ïïna ŋa?» Ni kö Icøø, ni «Aana wäädï ma Icøø, na näk kanynyï.»

³³Køøre Aydhak dëëre atïmö ni miel døc, ni kööe, na «?Aŋata ŋa na kwøŋ öö ki rïŋö ya adïëti ni käl gø baŋa, ni cama gø bäre kanya poode niï poot kär öö, ni nø gwïëdha gø? Ni ka adïëri møn, bee eni noo gwïëth.»

³⁴'Ba kanya ö Icøø na wïny dwør wänni, ena köök ki dwøl mo päl døc, ni jwöŋe ni cwïnye ee keeyø døc kiree, ni kööe jï wänni, ni «Wui, Awuuö, gwïëth aani, gwïëth aani thuwø.»

³⁵Ni kö Aydhaki, ni «Coku anø öö ki cwøk, ni ö gwïëthi mana daa ï gwïëdhö ki gø ni ci jïre.»

³⁶Køøre Icøø aköö, na «Aŋø, nyeŋŋe ka Jeekap møn, ni beeye ni put kara manynyø kwöre ariiø en. Dïkwøŋ dööŋö mara akwøŋ lwør; kawaane ennø, gwïëth mana di a gwïëdhö ki gø acäŋ lwørrø.» Ni cäŋ Icøø köö, na «?Aŋø, caana gø ni bäŋ gwïëth mo odööŋ jïra këët nø?»

³⁷'Ba aløk Aydhaki, ni kööe jï Icøø, ni «Ennø, Jeekap atïïa na kwäärö marï, ni cïba jø tuuŋe bëët jïre na jø tïïc moe; ni mooa eni ki bëëlö mo päl, ki køøŋ nyïïomøki. ?Age ennø nyie wääda, agïnaŋø no tïïa kiperï këët ennø?»

³⁸'Ba Icøø aköö jï wänni, na «?Aŋø Awuuö, beeye gwïëth aciel keere na en jïrï? Wui Awuuö, gwïëth aani, gwïëth aani thuwø.» Køøre Icøø aput jwøk døc kiree.

³⁹'Ba aløk wänni ma Aydhak, ni kööe, ni «Ennø, ïïno bëëdö ni karï bäär ki lurö mar ŋöömö, ki thööy mo maal.

⁴⁰Ïïno bëëdö na ŋat tøŋ, ni tïnynyï coku; 'ba kanyo cwat yiï ki bëëtö manøgø, teek mare ojarï wøk bäätï.»

⁴¹Køøre Icøø cwïnye ajïtö ki gïn mo raac ki Jeekap kiper gwïëth mana joode baŋ wänni; ni ö Icøø ni cääne ki cwïnye keere, ni kööe, ni «Nïr kïmmö kiper thøw wära kare aløny ni cään; kar kaaca nø, coka ma Jeekap onääa.»

⁴²'Ba Rebëëka luup moa car kanynye ma Icøø, kanya caani jïre, ena jääk baŋ wääde ma Jeekap na thiinh nee ööe, ni kööe jïgø, ni «Ennø, coku ma Icøø cwïnye ee cïp piny, ni cädö niï nääe nääö.

⁴³'Ba ennø bee, nyie wääda, leŋ dwøra; ö maal ni reŋŋï Aaren baŋ coka ma Leeban;

⁴⁴ni bëëdï buute kaace di turu, këël mano ö gïna lïëth ni en cwïny coku ice noo kwöye,

⁴⁵këël mano aac gootø mar coku mana goote ki ïïni ki gø, ni wïl wïïe ki gïïa tïïyï dëëre. Køøre nø, aano jääŋ baŋï niï duuï ki kunöce. ?Aŋø, wïthu doo dïdö karuriet ki dïcäŋ aciel buuta møn?»

⁴⁶Køøre Rebëëka aköö jï Aydhak, ni «Aana ööl ki bëëtö bäät piny kiper määrögø na nyïï jø Këth yøø. ?Aŋø, ni näk mo Jeekap cäŋa nyöömmö ki dhaagø dëët nyïï jø Këth, na näk wëëk ŋøømmi, ni caala moi ii, ba theemma man thøøa jaak nø?»