Read anuak Wïlöölö 28 Bible Online

Wïlöölö 28 - anuak bible

Wïlöölö 28

¹Køøre Aydhak Jeekap acwøle ni gwïëth gø, ni kööm gø, ni kööe jïgø, ni «Kär niï nyöömmö ki dhaagø røk nyïïakuk Keenan, paan bëëdø yie en.

²Ö maal, ni ciï Padan-Aram, dhi øt kwaru ma Batuël wää meru, ni nyöömmï ki dhaagø kaace dëët nyïï nääru ma Leeban cöök meru.

³'Ba Jwøk na en teeki jïre ïïno gwïëdhe, ni tïïc ïïni niï kännï ki nyïëdi ni nyaayï, ni tïmï ni ïïna lwaa wï jur.

⁴Ni ö Jwøki ni cïp gwïëth mana gwïëth Eeberam ki gø jïrï ki nyïïkwaayï bëët, kiper nee ŋöömmo bëëdï yie ni ïïna wëëllö enø nee lwørï na marï, ni beeye ŋöömma cïp Jwøki jï Eeberam.»

⁵Køøre Aydhak Jeekap awëëk wääth, ni ci Padan-Aram baŋ Leeban o Batuël nyï Aram, na näk cok Rebëëka mii Jeekap ki Icøø.

⁶'Ba ajoot Icøø ni Aydhak Jeekap ee gwïëdhö ni wëëk gø wääth man ci Padan-Aram, nee nyöömme ki dhaagø kaace; ni jooti Icøø thuwø ni Aydhak Jeekap agwïëdhe ni kööm gø ki man ba nyöömme røk nyïïakuk Keenan.

⁷Ni joot gø thuwø ni Jeekap dwør wänni ki menni ee leŋø ni put aa Padan-Aram.

⁸Køøre aput Icøø ŋäc ni wänni ma Aydhak yie raac ki nyïga näk nyïï jø Keenan.

⁹Ni ö Icøø ni ci baŋ Icmiel wär Eeberam, ni nywøm nyi Icmiel ma Maalët cok Nebayöt, ni meet gø bäät määre moa kwøŋ nywøm.

¹⁰'Ba Jeekap atïŋŋö Bëërcïïba ni cøøa Aaren.

¹¹Ni pïïe kany mør dï paap ni but kaace, kiper mana päth cäŋŋi. Ni lwør kïdi aciel røk kïte moa en kaace, ni but piny ni thäänhe ki gø.

¹²Køøre ena lägö kede doo ogat moo cwöth piny mo wïïe okëët maal; ni nyïïatwieli mo Jwøk cøøa maal ni duua piny ki bääte.

¹³Ni kar kanyøgø Wuuö Jwøk cuŋŋa bääte, ni kööe, ni «Aana Wuuö Jwøk, na näk Jwø kwaru ma Eeberam ki wäru ma Aydhak; ŋöömmi bäre ni ïïno but piny yie en, cïba cïbö jïrï ki nyïïkwaayï.

¹⁴Ni tïïa kwään nyïïkwaayï ni caala tør bäät piny, ni nyaayu ni këëtu but piny karge bëët ki jï løø kur tuul-cäŋ ki jï løø kur pänh-cäŋ; 'ba wïth tuŋi bëët mo bäät piny ogwïëth ki køørï ki nyïïkwaayï.

¹⁵Ni ennø, a ena buutï, ni kany oci yie jaak ï gwøa gwøø, ni duua ïïni yi ŋöömmi; kiper ï ba wiia këël mano tïïa gïna caana jïrï en.»

¹⁶Køøre Jeekap apäy ki yïth niine, ni kööe, ni «Ka adïëri møn, Wuuö Jwøk ena kany, 'ba kuua ni ena kany.»

¹⁷'Ba ena lwäyö, ni kööe, ni «Kany beeye kany mo di lwäyö ki yie, ni beeye kar bëëtö mar Jwøk møn kiree, ni man beeye dhi øtjöö mar maal.»

¹⁸'Ba na tïme na amöölla cøøn Jeekap aö maal, ni lwør kïdi mana thäänhe ki gø, ni cwöth gø piny kaace na nyuudhi, ni thii maaw wï gø.

¹⁹Ni ö Jeekapi ni cwøl nyeŋ kaace ni Bëthël;[14] 'ba dïkwøŋ nyeŋ päänya en yi ŋöömmögø cwøl ni Löja.

²⁰Køøre Jeekap akööŋ, ni kööe, ni «Ni näk Jwøk puta en buuta møn, ni gwøk aani ki wääth man caadha en, ni mooc aani ki gïn mo cama, ka abïï mo røøa dëëra,

²¹ni duu aani po wära ni dëëra jööt, Wuuö Jwøk puta bëëtö na Jwøk mara møn.

²²Ni ö kïnni ni yaa cwöth piny na nyuudhi en ni tïme na gïn mo nyootha kar bëëtö mar Jwøk; ni gïï ocïp Jwøki jïra bëët, paac wïthge cïba cïbö jïre thuwø.»