Read anuak Wïlöölö 3 Bible Online

Wïlöölö 3 - anuak bible

Wïlöölö 3

¹'Ba ki dëët lääy bëët moa cwääc Wuuö Jwøki bäät piny, thwöl atïmö ni rieka waŋe. Køøre dhaagø apëënynye ni kööe, «?Aŋø, ka adïëri møn, Jwøk aköö ki uuni ni käru cämö ri nyïïjenni moa en ya ajïniina bëët?»

²Ni kö dhaage jï thwöl, ni «Løny jïwa ki man cämwa ri nyïïjenni moa en ya ajïniina.

³'Ba Jwøk aköö, ni ‹Käru cämö ri nyïï jaath mana en dï ajïniina wala u maara gø gut ki ceŋŋu, kiper nee u ba thøwu.› »

⁴Ni kö thwölli jï dhaagø, ni «Ka adïëri møn, u ba thøw.

⁵Kiper ŋäc Jwøki ni dïcäŋo cämu ri nyïï jaath manøgø, nyeŋŋu rege japge jabø, ni tïmu nou caala Jwøk, ni gïna beer ki gïna raac ŋäyu.»

⁶'Ba kanya ö dhaage na neen jaath na gïn mo orømø ki cam, ni nëëni na gïn mo mïërö ki nyeŋŋe, na jaath mo beer mo døøya waŋ dhaanhø mo riek, ena lwötö ri nyi gø ni cam gø, ni mëëk mør cwøre thuwø; ni ö cwøre ni cam gø.

⁷Køøre ge karge riet nyeŋge rege ajapge, ni putge gø joot ni ge bëëdö ka dëëtge; ni kwönyge dëëtge ki bøøk jenni, ni twöge gø dëëtge.

⁸Kanyøgø tiet Wuuö Jwøk awïnyge ni cäädhö ya ajïniina kany wø kwöc cäŋŋi. Køøre dhaanhø ki cïïe dëëtge akange dï jenni moa en ya ajïniina kiper mana nut Wuuö Jwøki.

⁹Kanyøgø Wuuö Jwøk dhaanhø acwøle ni kööe jïgø, ni «Ï enï kaa ŋø?»

¹⁰Ni kö dhaanhe, ni «Tietï awïnynya ya ajïniina, ni lwäya kiper a bëëdö ka dëëra; køøre raa akana.»

¹¹Ni kö Jwøki, «?Aŋø, ocaana ŋa jïrï niï bëëdö ka dëërï? ?Aŋø, ïïna cämö ri nyïï jaath mana köömma ïïni ki gøøni ni kär camï?»

¹²Ni kö dhaanhe, ni «Dhaagø mana cïpï jïra kiper nee bëëde ki aani, aana mooe ki nyi jaath ni cama gø.»

¹³Kanyøgø Wuuö Jwøk aköö jï dhaagø, na «?Agïnaŋø ni iï tïïö en?» Ni kö dhaage, ni «Aana cøøk thwölli ni cäma.»

¹⁴Køøre Wuuö Jwøk aköö jï thwöl, ni «Kiper mana tïïyï teeŋ gïnögø, acïëni oen bäätï keerï dï lääc paac, ki lääc paap bëët. Ïïno cäädhi ki bäp yiï, ni tïmï niï cama tør ki yïth nïr kwøw moï bëët.

¹⁵Yïthakiyu ki dhaagø omooa ki män, ni mooa yïthakic nyïïï ki nyïïe ki män thuwø. eni wïïï onyadhe, ni ö ïïni ni dwøŋï opuny tiere.»

¹⁶Ni kö Wuuö Jwøki jï dhaagø, ni «Rääm marï omeeda døc ri nyöödö marï; ï jïtö ki rääm ri lwaar marï ko obwöre. Cwïnyï otïmö ni ena køør cwørï, ni tïmï niï bëënna gø.»

¹⁷Ni kö Wuuö Jwøki jï Adam, ni «Kiper mana leŋï dwør cïïï, ni camï nyi jaath mana köömma ïïni ki gø, na kööa, ni ‹Kärï cämö ri gø›, «Ŋøøm aciena kiperï; cam marï ojootï ki køør öölö mo teek døc yïth nïr kwøw moï bëët.

¹⁸Koodhi ki luum otuy bäät piny kiperï; ni tïmï niï cama gïïo tuy yïth ŋøøm.

¹⁹Cam marï ojootï ki køør kwäk marï këël mano tïme ni ŋuuda thøø marï no døøï yi ŋöömö, kiper ï käla ree. Ï käla ri ŋöömö; køøre ï døøa yi ŋöömö.»

²⁰Kanyøgø nø dhaanhø nyeŋ cïïe acaae ni Iip, kiper ena mïïö mar jøøa kwøw bëët.

²¹Ni ö Wuuö Jwøki ni tïïe ki dum pïën jï Adam ki cïïe, ni røø gø dëëtge.

²²Køøre Wuuö Jwøk aköö, «Ennø dhaanhø atïmö ni caala øøni, ni gïna beer ki gïna raac ŋääe. 'Ba ennø, kany mør eni cäŋa lwötö thuwø ri jaadha näk jaath kwøw, ni cam gø, ni kwøe ni bëëde na bäre bäre.»

²³Kiper manøgø nø, Wuuö Jwøk dhaanhø ariem wøk ya ajïniinna en Ëden, kiper nee tïme ni puura ŋøøm moa käl yïthge.

²⁴'Ba kar kanya ö Wuuö Jwøki na riem dhaanhø wøk, eni nyïïatwiet maal mo cwøl ni kirubël, ko opëëllö mo leebe liel ki maac, mo løøŋŋa ree ki kwöre bëët, acïp jï løø kur tuul-cäŋ ya ajïniinna en Ëden, kiper nee jöör jaath kwøw nee koorge.