Read anuak Wïlöölö 32 Bible Online

Wïlöölö 32 - anuak bible

Wïlöölö 32

¹'Ba Jeekap aay ki wääthe na caadhe, ni ö nyïïatwiet Jwøki ni røømge ki gøøni.

²'Ba na ö Jeekapi na joot geni, ena köö, ni «Moi beege lwaa Jwøk.» Køøre nyeŋ kaace acaae ni Maanayim.

³Køøre Jeekap ajääk nyïme ki jiy baŋ coki ma Icøø na en yi ŋööm Cëër po jø Ëdöm.

⁴Ni kööm geni, ni kööe, ni «Wär caannu jï kwääya ma Icøø ni laŋŋï ma Jeekap aköö, ni ‹Aana bëëdö ni aana wëëllö buut Leeban, ni ruua buute këël dïcäŋi en;

⁵ni jïta ki dhäk ka arëëni ki dïëk ki jø tïïc ma mään ki cwøw. 'Ba ennø, aana jääŋ baŋï nee gïïögø caan jïrï, ï na kwääya, kiper naa jïta ki met ec nyïmï.› »

⁶Køøre jøøa jääŋŋi aduu baŋ Jeekap, ni köge, ni «Waana pïï buut coku ma Icøø. 'Ba ennø, eno løny ni ena øtjöö, ni ööa baŋï kiper nou røømmu ki gø, ni eni cäädhi ka jiy ma dïpe aŋween.»

⁷Kanyøgø Jeekap alwäyö, ni tïme ni cädö døc; ni pääŋ jøøa cäädhö ki eni na dhøgi ariiø, ki dïëk ki dhäk ka athïrööle.

⁸Kiper mana caare, ena köö, ni «Ni näk Icøø öö ni tuk lwaak maya, kanymør lwaak maya bøth.»

⁹Ni ö Jeekapi ni läme, ni kööe, ni «Wui Awuuö Jwøk, ï na Jwø kwara ma Eeberam ki wära ma Aydhak, ïïna cäänö ki aani ni kööï, ni ‹Ci døø pou baŋ tuuŋu; 'ba bëëtö marï otïïa ni beer.›

¹⁰'Ba aa na Jeekap, a paa dhaanhø mo orømø ki mëëyï ni wø ba jøøl, ka adïëri marï na nyoothï jïra, aani na näk laŋŋï. Aani dïkwøŋ naam Jördan en aŋøla naa käära athøra keere ki cera. 'Ba ennø, aana tïmö ni jïra da lwaae ariiø.

¹¹Ennø, a kwaya ïïni, Awuuö Jwøk, naa kønyï ki man wëëgï aani bødhø cer coka ma Icøø, kiper aana lwäyö ki gøøni, kiper kanymør eni öö jaak ni tuk aani ki mään ko obwöre.

¹²'Ba ï na Jwøk, ïïna köö ni bëëtö mara tïïyï tïïö ni beer møn, ni tïïyï kwään nyïïkwaaya ni thööth kaamar nyeŋ akwöny naama dwøŋ ni ba thum ki kwaan.»

¹³Kanyøgø Jeekap abut kaace wäänögø. Ni lwöte røk gïïa en jïre bëët kiper nee cïbe jï coki ma Icøø.

¹⁴Ni gïïa lwøre beege atëëe ma dïpe ariiø ma mädhi ki nyöök atëëe ma pïërariiø, ki rööm ma dïpe ariiø ma mädhi ki nyöök rööm ma pïërariiø,

¹⁵ka athïrööle ma pïëradäk mo yïthge da caak ki nyïïge, ki dhäk ma pïëraŋween ma mädhi ki rwädhe apaar, ka arëëni ma pïërariiø ma mädhi ka arëëni apaar ma thwönhi.

¹⁶Ni cïïm geni ceŋ jø tïïc moe ni ee pääŋŋö, ni wï lääy man nø ena kur keere. Ni kööe jï jø tïïc moe, ni «Cou pööthu nyïma nø, ni jäthu yïthakic wï lääy man nø ki wï lääy maya.»

¹⁷Ni ö Jeekapi ni kööm ŋata bwøth maal, ni kööe, ni «Kanyo røømmu ki coka ma Icøø, ni pëëny ïïni, ni kööe, ni ‹?Ïïna dhaanh ŋa? ?Ï ciï kaa ŋø? ?Lääyögø ni en nyïmï yøø a mo ŋa?›

¹⁸wärï kööï, ni ‹Beege mo laŋŋï ma Jeekap, ni beege gïïa jääŋŋe kiper nee cïp jï kwääye ma Icøø; ni eni na näk Jeekap ki dëëre cäädhö køørwa.› »

¹⁹Køøre Jeekap riet dhaanhø ki dääge ki jøøa kwør lääy møga, jøøgø bëët aköömme thuwø, ni kööe, ni «Teeŋ luummögø wär caannu jï Icøø kanyo jootu eni;

²⁰ni kööu thuwø, ni ‹Ennø, laŋŋï ma Jeekap cäädhö køørwa.› » Kiper ena köö, ni «Aani, wa døøa kanya ciel ki Icøø ki køør muuy ni bwøth maal nyïma enø. Køøre nø kanyo røømwa ki gø, kanymør eni jïëy ki mara.»

²¹Kanyøgø Jeekap gïïa näk muuce awëëk bwøth maal nyïme, ni ö eni ki dëëre ni dööŋe twïër dïwäänögø.

²²'Ba ki dïwäänögø ena ö maal ni lwør määre karge riet ki nyïga näk jø tïïc moe ko obwöre moe na näk apaar kurciel, ni kath løøga ki caara mar naam Jabök.

²³Ni jwïëk geni ni kaath geni løø naam løøga ki jammi moe bëët.

²⁴Køøre Jeekap adööŋ keere, ni ö dhaanhe mørri baŋe, ni ŋäpge ki gø këël mana ruu øwi.

²⁵'Ba na jooti ya ŋatøgø ni ba løny jïre ki man bööt Jeekap, eni waŋ ocwii Jeekap agude, ni ö wäl Jeekapi ni pääe ki cuu moe, kanya ŋäpge.

²⁶Køøre ŋatøgø aköö, ni «Wec aani na aa, kiper kar øw aløny ni cään.» 'Ba Jeekap aköö, ni «Ba løny ki man wiia ïïni niï aaï, këël mano gwïëthï aani.»

²⁷Ni kö ŋatøgø jï Jeekap, ni «?Nyeŋŋï aŋa?» Ni kö Jeekapi, ni «Nyeŋŋa Jeekap.»

²⁸Ni kö ŋatøgø, ni «Nyeŋŋï ba cwøl ni Jeekap këët, 'ba ocwøl ni Icriel, kiper ïïna ŋäbö ki Jwøk ni ŋäbï ki jiy thuwø, ni tïme ni käädhö ïïni.»

²⁹Kanyøgø ena pëëny Jeekapi, ni kööe, na «A kwaya ïïni ki man caanï nyeŋŋï jïra.» 'Ba ena köö, na «?Aperŋø ni pëënynyï nyeŋŋa en?» Ni ö ŋatøgø ni gwïëth Jeekap kaace.

³⁰Køøre Jeekap nyeŋ kaace acaae ni Peniël, kiper ena köö, ni «Aani Jwøk ki dëëre møn ajooda, 'ba jwïëya apiem.»

³¹Kanyøgø cäŋ aput tuulö bääte ni poot na kanya kaal Peniël, ni eni cäädhi ni kwömö ni pätha bäät tiere.

³²Kiper manøgø nø, këël dïcäŋi en, jø Icriel ba cämö ki läär moa en waŋ oŋannø, kiper ŋata ŋäbö ki Jeekap läär moa en waŋ ocwii Jeekap na en waŋ oŋannø agude.