Read anuak Wïlöölö 33 Bible Online

Wïlöölö 33 - anuak bible

Wïlöölö 33

¹Køøre Jeekap wïïe atïŋ maal ni lwïthe ni joot Icøø ni cäänhnhö, ni cäädhi ka jiy ma dïpe aŋween. Ni ö Jeekapi ni pääŋ obwöre jï mëëkge na näk Liia, ki Reecal, ki määra näk ariiø na näk jø tïïc.

²Ni kïth määra näk ariiø nyïm ko obwöre moge, ni kïth Liia ko obwöre moe køørge, ni kïth Reecal ki Jocep ya aŋuudi.

³'Ba eni ki dëëre ena pööth nyïm, ni cäädhe ni cøŋŋe këëlle piny ni wïïe kuulle piny kwöre abïriiø, këël mana pïïe kany mo cään ki coki.

⁴Køøre Icøø areŋ baŋe nee røømge ki gø, ni gääm gø, ni määth gø døc, ni nuum dhi gø, ni putge jwøk.

⁵Ni ö Icøø ni tïŋ wïïe maal ni joot mään ko obwöre, ni kööe, «?A moi a jø kaa ni cäädhi ki ïïni en?» Ni kö Jeekapi, ni «Beege obwöre moa cïp Jwøki jïra ki met yie, a na laŋŋø marï.»

⁶Køøre määra näk ariiø na näk jø tïïc ko obwöre moge anyänhnhö, ni këëlge cøŋge piny ni kuulge wïthge piny.

⁷Ni ö Liia ko obwöre moe ni nyänhge, ni këëlge cøŋge piny ni kuulge wïthge piny. Køøre cään Jocep ki menni ma Reecal anyänhnhö, ni këëlge cøŋge piny ni kuulge wïthge piny.

⁸Køøre Icøø aköö, na «?Aŋø, pïïth lään päl bäre ice na røømma ki gø, tiere aŋøøni?» Ni kö Jeekapi, ni «Beeye kiper naa jïta ki met ec baŋï, ï na kwääya.»

⁹'Ba Icøø aköö, ni «Nyie coka, aani jïra dagø mo thööth; beerra man ö moa näk moï ni putge bëëtö jïrï.»

¹⁰Ni kö Jeekapi, ni «Ba løny; ni näk mo yiï met ki aani, a kwaya ïïni ki man lwørï muuy mana cïba jïrï, kiper täärnyïmï ajooda ni waany ni nëëni kaaman wø neen täärnyïm Jwøk; ni pänhnhï aani ki met ec.

¹¹Beerra man lwørï muuy mana käli jïrï, kiper Jwøk aana mooe ki køør met yie, ni jïra dagø mo thööth.» Ni ö eni ni cøk Icøø këël mana jïëe ni lwør gø.

¹²Køøre Icøø aköö, ni «Beerra man tïŋø wääth nee ø aa nø; aano bwøth maalø.»

¹³'Ba Jeekap aköö jïgø, ni «Ŋäyï, ï na kwäärö mara, no obwöre therø, ni ŋäyï ni dïëk ki dhäk moa näk nyoori poot raŋŋa jïra. Ni ni näk mo ge di kwørø døc këël dïcäŋ aciel keere, ge puta thøø bëët.

¹⁴Beerra man ö kwäärö mara ni pööth maal nyïm laŋŋe; 'ba aano ööi mëëth ki køør wääth mano caath dïëki ki dhäk moo en nyïma, ki køør wääth mano caath obwöre thuwø, këël mano pïïa buutï, ï na kwäärö mara, yi Cëër.»

¹⁵Køøre Icøø aköö, ni «Beerra man dööŋ jiya møøki ki ïïni.» 'Ba Jeekap aköö, ni «Bäŋ gïre. Mana manynya keere beeye ki man bëëdï ni yiï met ki aani.»

¹⁶Ni ö Icøø ni put tïŋŋö dïcäŋögø ni døøa Cëër.

¹⁷Ni ö Jeekapi ni aae ni pïïe Cuköt; ni tïny dëëre ki kar bëëtö, ni gëëde ka abïle jï dïëk ki dhäk moe. Kiper manøgønø, nyeŋ kaace acwøl ni Cuköt.

¹⁸'Ba kanya ö Jeekapi ki Padan-Aram, ena pïï ki jööt dëël päänya cwøl ni Cekam, na en yi ŋööm Keenan, ni tïïc twïër mare ŋää pääny.

¹⁹Ni ö Jeekapi ni ŋeew thäk ŋøøm moa näk oduŋkaare moe ee gur piny yie baŋ wäät Eemör na näk wää Cekam, ni ŋeee ka gwel ma dïpa.

²⁰Køøre ena put tïïö ki gïn wø cïp olämme bääte kaace, ni cwøl gø ni El-Elöy-Icriel.