Read anuak Wïlöölö 39 Bible Online

Wïlöölö 39 - anuak bible

Wïlöölö 39

¹'Ba Jocep akïth Ijep. Ni ö nyï Ijepi mo cwøl ni Pötipar, kwääy jø leny man wø tïïö buut Peerø, ni ŋeew Jocep ceŋ jø tuuŋ Icmiel na kïth gø Ijep.

²'Ba Wuuö Jwøk nut buut Jocep, ni ö Jocepi ni jïte ki bëëtö ma wøp. Ni tïme ni bëëdö øt kwääye na näk nyï Ijep.

³Ni jooti ya kwääye ni Wuuö Jwøk nutö buut Jocep, ni jammi bëët moa tïïe cäädhi ni beyø.

⁴Ni ö Jocepi ni jïte ki met ec baŋ kwääye, ni tïny gøøni; ni ö eni ni tïïc Jocep na kwäärö man wø raŋ jap paare bëët, ni cïp teek jïre bäät jap paare bëët.

⁵'Ba kanya tïïc eni na ŋat raŋ jape, ni cïp teek jïre bäät jap paare bëët, gwïëth Wuuö Jwøk aö bäät nyï Ijep manøgø ki køør Jocep, ni ö gwïëth Wuuö Jwøki ni en bäät japa en paare bëët ki moa en pwödhö.

⁶Ni wii jape bëët cer Jocep, ni tïme ni bäŋ gïn lääŋŋe këët kiper jape, 'ba beeye gïr cam mare keere ni wø lääŋŋe. 'Ba Jocep beeye dhaanhø mo kïte wøp døc ni nëëni ni mïërö.

⁷'Ba kanyøgø, cï kwääye waŋe atïmö ni ena baŋ Jocep ni kööe, na «A manynya man butï ki aani.»

⁸'Ba Jocep akweer ni kööe jï cï kwääye, ni «Neenï, kawaane kwääya bäŋ gïn lääŋŋe kiper gïïa en paare bäre kiper aana ŋat tïïe, ni jape bëët ee wii cera.

⁹Bäŋ dhaanhø mo dwøŋŋa eni ki aani paare; ni bäŋ gïn mo odööŋ mo käre cïbö jïra, 'ba beeye ï keerï, kiper ïïna cïïe. ?Aŋø na daa tïïc teeŋ raayøgø ni dwøŋ enø, ni bääya dëër Jwøk?»

¹⁰'Ba këël na bëët nyaanøgø ni cäänö cooth ri Jocep ki yïth nïne bëët, Jocep kär jïëy ki man butge ki gø, këël ki man bëëde buut gø thuwø.

¹¹'Ba dïcäŋ aciel na ö Jocepi na ci yi øtø baŋ tïïc mare ni bäŋ dhaanhø aciel kaace røk jø wø tïïö yi øtø,

¹²ena mak nyaanøgø ka abïï mare, ni kö nyaanøgø, «Butï ki aani.» 'Ba Jocep abïïne awii cer gø ni reeŋe ni päär wøk yi øtø.

¹³'Ba na ö nyaanøgø na raŋ gø na abïï mare ee wii cere ni reŋ wøk ki yi øtø,

¹⁴eni jø wø tïïö yi øtø acwøle ni kööe jïge, «Neennu, nyï Ibaru akäl kany nee ø pääde. Ena ö baŋa ki man bute ki aani; 'ba aana köök ki dwøl mo päl.

¹⁵Køøre na neen gø ni dwøra yaa tïŋ maal naa cwödö, ena reŋ wøk ki yi øtø ni wii abïïne cera.»

¹⁶Køøre nyaanøgø abïï akan buute këël mana ö kwääc Jocepi paayø.

¹⁷Køøre gïnögø acaane jï cwøre ni kööe, «Laŋŋa näk nyï Ibaru na kälï dïwa aö baŋa naa pääde.

¹⁸'Ba na jwöŋa ni dwøra ena maal, ena put reŋ wøk ki yi øtø ni wii abïïne cera.»

¹⁹'Ba na ö kwääc Jocepi na wïny luup bëët moa caan cïïe jïre na kööe, ni «Gïna tïïc laŋŋï dëëra beeye enøgønø,» ena gootø døc.

²⁰Ni ö kwääc Jocep ni lwør Jocep ni kïth gø øt twöc kanya näk jøøa twöc nyeya otwöö yie, ni ö Jocepi ni put bëëtö yi øt twöc manøgø.

²¹'Ba Wuuö Jwøk nutö buut Jocep ni nyooth mëëye mo ba jøøl jïgø, ni tïïc gø na nyïïawäädi ki ŋata en øt twöci cere.

²²Ni ö ŋata en øt twöci cere ni tïïc Jocep na wïth jø twöc bëët, ni kany wø tïme ni da gïn mo di tïïö kaace beeye Jocep ni tïïc gø.

²³Ni ö ŋata en øt twöci cere ni tïme ni bäŋ gïn lääŋŋe kiper gïïa en cer Jocep, kiper Wuuö Jwøk nutö buute, ni ö Wuuö Jwøki ni put tïïe moe bëët gwïëth.