Read anuak Wïlöölö 40 Bible Online

Wïlöölö 40 - anuak bible

Wïlöölö 40

¹Kanyøgøøni na tïme na køør gïïögø bëët, ŋata bëëdö na nyikeenø mar nyeny jø Ijep ki ŋata bëëdö ni tïï dääpe mo nyeya ena cere, gena bääyö dëër kwääcge ma nyeny jø Ijep.

²Køøre Peerø nyeny Ijep agootø ki geni karge riet, ŋata bëëdö ni nyikeenø ki ŋata en tïï dääpe cere,

³ni ö eni ni leeŋ geni øt twöc yi øt kwääy jø leny, ni beeye øt twöc mana en Jocepi yie.

⁴Ni ö kwääy jø leny ni cïp geni cer Jocep, ni ö Jocepi ni gwøk geni, ni bëëtge øt twöc ki kany mo bäär mëëth.

⁵'Ba dï wäär aciel ŋata bëëdö na nyikeenø ki ŋata en tïï dääpe cere, jøøa leeŋ øt twöc, gena lägö bëët karge riet, ni ŋati man nø lääge ena kur keere, ni tier lääk man nø ena kur keere.

⁶'Ba na ö Jocepi baŋge ka aruunnø, gena joode ni cwïnyge opädhö.

⁷Ni pëëny geni, ge na jø tïï Peerø moa näk otwöö ki eni bëët yi øt kwääye, ni kööe, na «?Agïnaŋø na päth cwïnynyu kipere dïcäŋi?»

⁸Køøre gena köö jïre, «Waana lägö ki lääk, ni bäŋ dhaanhø mo caan tiet lääk jïwa.» Ni kö Jocepi jïge, «?Aŋø, løk lääk ba doo käla baŋ Jwøk? Beerra man parru läägu jïra.»

⁹Køøre ŋata bëëdö na nyikeenø, lääk mare apare jï Jocep ni kööe jïre, «Lääk mara bëët ka araŋa jaath omøk,

¹⁰mo ree da bäädi adäk mo okar, ni thiiwge, ni ŋøøkge, ni ö nyïëdi wøk mo ociek ki rege.

¹¹No ogubayu mar Peerø ena cera, ni lwøra nyïïomøki ni biia ge yo ogubany Peerø. Køøre ogubanynyøgø acïba cer Peerø.»

¹²Køøre Jocep aköö jïre, «Tier lääk manøgøøni beeye en, bäädi moøgøøni na adäk yøø beege nïne adäk.

¹³Ki ri dää nïne Peerø ïïno päde, ni dwøk ïïni kar tïïc marï, ni cäŋï ogubany Peerø cïp cere keda mana wara tïïyï dïkwøŋ kanya bëëdï ni ïïna nyikeenø mare.

¹⁴'Ba noo jïtï ki bëëtö mo beer, wär wïïï parï ki aani. Beerra man caanï aani jï Peerø kiper naa käl wøk yi øt twöc man.

¹⁵Ka adïëri møn, aani a kwalla po jø Ibaru, ni bäŋ gïn mo raac mo yaa tïïö pööthi maa doo kïtha øt twöc kipere.»

¹⁶Kanyøgø na jooti ya ŋata en tïï dääpe cere ni lääk moøgø tietge beyø, ena köö jï Jocep, «Aana lägö thuwø, ni lääk 'moa nëëni kere a tïëta gupe adäk ki wïïa mo yïthge da dääpe mo tar.

¹⁷Ni gupa mana en maal yie da wïth dääpe bëët mo onø bul kiper Peerø. 'Ba weny aöö ni camge gø yi gupa mana en wïïa.»

¹⁸Ni løgi ya Jocepi jïre, «Man beeye tier lääk manøgø, gupe moø na adäk yøø beege nïne adäk.

¹⁹Ki ri dää nïne Peerø wïïï oŋul wøk, ni ŋaap ïïni bäät jaath, ni ö dëërï ni cami ya wenynyi.»

²⁰'Ba na tïme na dää nïne, atïmö na kanya lwaarø ki Peerø yie, ni tïme ka ajwöma kiper jø tïïc moe bëët. Ni ö eni ni pät ŋata bëëdö na nyikeenø ki ŋata en tïï dääpe cere dï jø tïïc moe.

²¹Ni dwøk ŋata bëëdö na nyikeenø kar tïïc mare, ni ö eni ni cïp ogubayu cer Peerø.

²²'Ba ŋata en tïï dääpe cere aput Peerø ŋaap bäät jaath kaa mana caani ya Jocepi jïge kanya caan tiet lääk moge.

²³'Ba ŋata bëëdö na nyikeenø wïïe käre parø ki Jocep. Eni wïïe awïl ki gø.