Read anuak Wïlöölö 41 Bible Online

Wïlöölö 41 - anuak bible

Wïlöölö 41

¹'Ba na tïme na køør cwiiri ariiø, Peerø alägö kede eni cuŋŋö bäät naam.

²Ni ö dhäki abïriiø wøk ki yi naamøgø, na dhäk mo nëëni ni beyø mo olør, ni cam marge beeye luum bäp naam.

³Ni ö dhäki abïriiø møøk ki køørge ki yi naam, ni gena dhäk mo odwat døc mo nëëni ni reyø, ni ge ena buut dhäk møga bäät ageela.

⁴Ni ö dhäki moa näk odwat døc ni camge dhääa näk abïriiø na näk olør. Ni ö Peerø ni pääe.

⁵Køøre ena cäŋ butö ni cäŋ lägö ki riet lääk, ni kede da jööth abäy abïriiø mo ee joodø mo døøŋŋø ni beyø døc, ni ge ena ri theeŋŋø aciel.

⁶Ni ö jööthi møøk ma abïriiø wøk ki køørge, mo nyeŋge omat ni geno waaŋ cäŋŋi.

⁷Ni ö jöötha näk odwat ni mwønyge jöötha näk abïriiø na näk døøŋŋø ni beyø døc. Ni ö Peerø ni pääe ni joot gøøni ni beeye lääk.

⁸'Ba na tïme na aruunnø, lääk moi wï Peerø akierge døc. Køøre ena jäägö ni cwøl jiye moa nyeŋge reegø bëët mo Ijep ka ajuuk bëët, ni par lääk moe jïge. 'Ba bäŋ ŋat moo løny jïre ki man caan tier gø jï Peerø.

⁹Køøre ŋata bëëdö na nyikeenø, ena köö jï Peerø, «Aani bääyö mara acaara dïcäŋi.

¹⁰Kanya ö Peerø na goote ki waani na jø tïïe, waana kïth øt twöc ki ŋata en tïï dääpe cere yi øt twöc mana en cer kwääy jø leny mo nyeya.

¹¹Ni öwa ni läkwa bëët ki wäär aciel, aani ki ŋatøgø, ni ŋati man nø tiet lääge ena kur keere.

¹²Ni kaace da nyilaal ma wøp ma nyï Ibaru ma laŋ kwääy jø leny mo nyeya. 'Ba na parwa lääk mowa jïre, eni tiet lääk mowa acaane jïwa, ni caan tiet lääk ŋati man nø jïre ka mana läk gøøni.

¹³Ni gïïa caane bëët aput tïmö na adïëri, ni ööa ni dwøk aani kar tïïc mara, ni ö ŋata en dääpe cere ni nääi ni ŋaabi bäät jaath.»

¹⁴Køøre Peerø ajäägö ni cwøl Jocep, ni ö geni ni laarge eni käl wøk ki yi øt twöc. Ni ö Jocepi ni liel jïëc tïïe, ni wiil abïïe moe, ni ö nyïm Peerø.

¹⁵Køøre Peerø aköö jï Jocep, «Aani, aana lägö ki lääk, ni bäŋ dhaanhø aciel mo caan tiere jïra. 'Ba luubö mør awïnynya kiperï, ni ni näk da lääk mo iï wïnynyö, ni løny jïrï ki man caanï tiere.»

¹⁶Ni løgi ya Jocepi jï Peerø, ni «Manøgøøni ba en jïra; 'ba beeye Jwøk noo løk gøøni na kare jï Peerø.»

¹⁷Køøre Peerø aköö jï Jocep, «Lääk mara beeye en, aani nëëni kede a cuŋŋa bäät ageel naam.

¹⁸Ni ö dhäki abïriiø wøk mo olør mo nëëni ni beyø mo käla yi naam, ni cam marge beeye luum bäp naam.

¹⁹Ni ö dhäki abïriiø møøk wøk ki køørge mo can mo odwat døc mo nëëni ni reyø, mo teeŋge kära kwøŋ joot yi ŋööm Ijep cøøn.

²⁰Ni ö dhääa näk odwati na reyø ni camge dhääa näk abïriiø na näk olør moa kwøŋ ö wøk dïkwøŋ.

²¹'Ba na nø camge ge, atïmö ni nëëni kede kärge camø, kiper ge poot no odwat ni caala mana dïkwøŋ. Køøre aana päy.

²²«Køøre aana cäŋ lägö kede da jööth abäy abïriiø mo otuy ri theeŋŋø aciel mo päŋ ni beyø døc.

²³Ni ö jööth abäy møøk ma abïriiø mo otal mo nyeŋge omat mo owaaŋ cäŋŋi, ni tucge køørge.

²⁴Ni ö jööth abäya näk obäp ni mwønyge abäya beyø na näk abïriiø. Køøre gïnögøøni acaana jï ajuuk, 'ba bäŋ dhaanhø aciel mo oløny jïre ki man caan tier gø jïra.»

²⁵Køøre Jocep aköö jï Peerø, «Lääk mo Peerø beeye lääk aciel. Jwøk nyuunhnha Peerø ki gïno tïïe.

²⁶Dhäk moø na abïriiø ni beyø yøø beege cwiiri abïriiø, ni jööth abäya näk abïriiø na beyø yøø beege cwiiri abïriiø. Tier lääk beeye aciel.

²⁷Ni dhääa näk abïriiø na näk odwat døc na näk nëëni ni reyø na öö køørge beege cwiiri abïriiø mo käc, ni jööth abäya näk abïriiø na näk nyeŋge omat na näk owaaŋ cäŋŋi beege cwiiri abïriiø mo käc manøgø thuwø.

²⁸«Ni manøgøøni beeye kare na caana jï Peerø, ni Jwøk nyuunhnha Peerø ki gïno tïïe.

²⁹Ennø, da cwiiri abïriiø mo öö, ni ciek caammi mo päl yi ŋööm Ijep bäre.

³⁰'Ba ki køør cwiiyøgø, cwiiri abïriiø mo käc oööi, ni wïl wïth jiyi kede bäŋ cam mo päl mo ege kwøŋ joot Ijep. Ni ö käci ni raany ŋöömö bäre.

³¹'Ba ki køør käc manøgø, päl cam mana dïkwøŋ otïmö na gïn mo wïc ba par ki gø këët, kiper käc manøgø dwøŋ døc.

³²Ni lääk manøgøøni aö baŋ Peerø kwöre ariiø, kiper gïnögø onø ŋøl Jwøki piny, 'ba otïïc Jwøki møn ki kany mo cään.

³³«Kiper manøgø nø, beerra man määny Peerø ki dhaanhø mo waŋe riek mo wïïe da acaara, ni tïïc gø na kwäärö bäät ŋööm Ijep.

³⁴Beerra man ö Peerø ni tïïc gïnögøøni, ni ö eni ni määnye ki jø tïïc mo raŋŋa ŋöömö bäre, ni lwötge ka acooŋa aciel dëët acooŋe abïïc moi nø røk caammi moo ciek ni thööth yi ŋööm Ijep yïth cwiiyø na abïriiø yøø.

³⁵Ni ö geni ni cooŋge caammi moo ciek yïth cwiiyø ni beyø no ööi yøø, ni kange ge yïth päänye moa en cer Peerø, ni gwøkge caammi moøgø.

³⁶Ni caammi moøgø kan kaper paac, kiper käc mano ööi ki cwiiyø na abïriiø yøø yi ŋööm Ijep, nee paac ba raany käci.»

³⁷Ni tïm luummögøøni ni nëëni ni beer ki jï Peerø ki jø tïïe bëët.

³⁸Ni kö Peerø jï jø tïïe, «?Aŋø, ø doo jïtö ki dhaanhø mo kaala nyeni na dhaanhø mo päŋ ki Jwïëc Jwøk?»

³⁹Køøre Peerø aköö jï Jocep, «Kaa mana ö Jwøki na nyuunh gïïögø bëët ïïni, bäŋ dhaanhø mør këët mo wïïe leer mo kaala ïïni.

⁴⁰Ïïni nø, teek paara oen cerï, ni ö jiya bëët ni wïnyge luup moï. 'Ba kiper mana näk aana nyeya, aano bëëdö naa dwøŋ, niï kaala ka nyec keere.»

⁴¹Ni kö Peerø jï Jocep, «Ennø, ïïna tïïa na wïth jø Ijep bëët.»

⁴²Køøre Peerø gwel lweedø mare akäl wøk ki lweete ni kïth gø cer Jocep, ni røø abïïe dëëre mo beyø døc, ni kïth warkey jedhe.

⁴³Ni wëëk eni wääth ki yi riet jääne. Ni ö jiyi ni bwøthge maal nyïme ni rëëtge ni köge, ni «Këëllu cøŋŋu piny nyïme.» Gïïögø bëët atïïc Peerø ni cuum Jocep yi ŋööm Ijep bäre.

⁴⁴Køøre Peerø aköö jï Jocep, «Aani aana Peerø. 'Ba bäŋ dhaanhø aciel yi Ijep bäre mo tïïö ki gïrpiny ma aciel ni näk mo ba caana ïïni.»

⁴⁵Ni ö Peerø ni cak nyeŋ Jocep ni Dhapenath-Pania, ni nywøm Acenath jï Jocep, nyi Pötipëëra kwääc lam mar pääny Ön. Ni ö Jocepi ni cäädhe dï Ijep bäre.

⁴⁶'Ba kanya ö Jocepi na täk tïïc man ni dwøŋ en buut Peerø nyeny Ijep, eno løny ni dwøŋ ni cwiiye pïëradäk. Ni ö eni ni ci wøk nyïm Peerø ni cäädhe dï Ijep bäre.

⁴⁷'Ba ki yïth cwiiya näk abïriiø na beyø, piny aciek ki cam mo päl døc kiree.

⁴⁸Ni ö eni ni cooŋ caammi bëët ki cwiiya näk abïriiø na päl cammi yïthge Ijep, ni kïth ge yïth odïï dï mïëri bëët. Ni ö eni ni kïth yi paac man nø ko odek ni kïth caammi yïthge moa ciek yïth pwöth mo paac man nø.

⁴⁹Ni ö Jocepi ni cooŋ beel mo thööth døc mo caala nyeŋ akwöny deŋ naama dwøŋ, gøøc mana dhäthe jïre ki man kwaan ge, kiper ba thum ki kwaan.

⁵⁰'Ba kanya poode ni cwiic käc poot kär öö, Jocep anyöötö ki wääte ariiø ka Acenath nyi Pötipëëra, kwääc lam mar pääny Ëliyöt.

⁵¹Ni ö Jocepi ni cak nyeŋ kanynye ni Maneeca, kiper ena köö, ni «Jwøk aana tïïe ki man wïl wïïa ki gïïa jwøra, ni wëëk wïïa wïlö thuwø ki jø tuuŋwa.»

⁵²Ni cak nyeŋ julle ni Ipariem, kiper ena köö, ni «Jwøk aana tïïe ki man jïta ki nyïëdi yi paana jwøra gïïa leth yie.»

⁵³Ni ö cwiiya näk abïriiø na beyø na päl caammi yïthge yi ŋööm Ijep ni thumge.

⁵⁴Ni ö cwiiya näk abïriiø na näk cwiic käc ni täkge, kaa mana caani ya Jocepi. Ni tïme ni da käc yïth mïëri bëët, 'ba cam dagø yi Ijep bäre.

⁵⁵'Ba na tïm Ijepi bäre ni da käc, jiy ajwöŋö ri Peerø kiper cam. Ni kö Peerø jï jø Ijep bëët, «Cou baŋ Jocep. Gïno caane wär tïïyu.»

⁵⁶Køøre na nyaac käci bäät piny bäre, Jocep odïï mo beel ajabe ni käl beel ni dwøk ge pwödhö jï jø Ijep, ni tïm käci ni päl døc yi Ijep.

⁵⁷Ni ö tiet mïëri bëët ni aage baŋ Jocep Ijep kuna ŋëëwge ki beel, kiper käc atïmö ni dwøŋ døc bäät piny bäre.