Read anuak Wïlöölö 46 Bible Online

Wïlöölö 46 - anuak bible

Wïlöölö 46

¹Køøre Icriel atïŋŋö ni aae ki gïïa en jïre bëët; ni ö yi Bëërcïïba ni cïpe ko olämme jï Jwø wänni ma Aydhak.

²Ni ö Jwøki ni cääne ki Icriel ki wäär ki yïth lääk, ni kööe, «Jeekap, Jeekap.» Ni kö Jeekapi, ni «Aani en.»

³Køøre Jwøk aköö, «Aana Jwøk, Jwøa näk Jwø wäru. Kärï lwäyö ki man ciï Ijep, kiper ïïno tïïa na wï jur mo dwøŋ kunöce.

⁴Aani aano cäädhi ki ïïni kanyo ciï Ijep, ni cäŋa ïïni duuö ki kunöce thuwø, ni ö Jocepi ni ŋen nyeŋŋï ki ceŋŋe kiree.»

⁵Køøre Jeekap atïŋŋö yi Bëërcïïba. Ni ö wääte ni kïthge eni, ko obwöre moge, ki määrge yïth jïëth wø tut okwëënyi moa jääŋ Peerø nee wääge kääri ki ge.

⁶Ni ö Jeekapi ki nyïïkwaaye bëët ni lwørge dhäk moge ki jammi moge, moa jootge yi ŋööm Keenan, ni öge Ijep.

⁷Ni bee eni ki wääte, ki wäät wääte, ki nyïïe, ki nyïï wääte. Ni ö eni ni käl nyïïkwaaye bëët Ijep.

⁸Nyeŋ wäät Icriel, ni beeye Jeekap, ki nyeŋ wäät wääte na ci Ijep beege ii. Nyeŋ kanynye beeye Ruben.

⁹Ni nyeŋ wäät Ruben beege Anök, ki Pallu, ki Eedharan, ki Karmi.

¹⁰Ni nyeŋ wäät Cimien beege Jemuël, ki Jamin, ko Okat, ki Jaakin, ki Dhöar, ki Caul, o dhaaŋŋa näk nyi jø Keenan.

¹¹Ni nyeŋ wäät Libay beege Gërcön, ki Kät, ki Mërari.

¹²Ni nyeŋ wäät Juuda beege Er, ki Önan, ki Ceela, ki Peereth, ki Dheera. 'Ba Er ki Önan, gena thøw yi ŋööm Keenan. 'Ba wäät Peereth beege Eedharan, ki Amul.

¹³Ni nyeŋ wäät Icakar beege Töla, ki Puwa, ki Jööp, ki Cimrön.

¹⁴Ni nyeŋ wäät Dhebulan beege Cërët, ki Ëlön, ki Jaalël.

¹⁵Ruben, ki Cimien, ki Libay, ki Juuda, ki Icakar, ki Dhebulan beege wäät Liia, na nywøle ki Jeekap yi Padan-Aram, ni nyaare ma Dina nywøle ka gø thuwø. Ni kwään jagøgø bëët ki wäätge beege pïëradäk kurdäk.

¹⁶Nyeŋ wäät Gaat beege Dhepön, ka Agi, ki Cuni, ki Ëdhbön, ki Ëri, ka Arödi ka Arëli.

¹⁷Ni nyeŋ wäät Acer beege Yimna, ki Yecuwa, ki Yecuwi, ki Beria; ni nyeŋ cöök jagøgø mana näk dhaagø beeye Cëëra. 'Ba wäät Beria beege Eber ki Melkiël.

¹⁸Gaat ka Acer beege wäät Dhelpa, dhaaŋŋa näk ŋat tïïc na cïp Leeban jï nyaare ma Liia, ni beege wääte na nywøle ki Jeekap; ni kwään jagøgø bëët ki wäätge beege apaar ka abïciel.

¹⁹Wäät Reecal cï Jeekap beege Jocep ki Benjamen.

²⁰'Ba wäät Jocep na nywøle yi ŋööm Ijep beege Maneeca ki Ipariem, na nywølge ka Acenath, nyi Pötipëëra, kwääc lam mar pääny Ön.

²¹Ni wäät Benjamen beege Bëla, ki Bëkër, ka Acbël, ki Gëra, ki Neeman, ka Aki, ki Röc, ki Mupim, ki Upim, ka Art.

²²Jocep ki Benjamen beege wäät Reecal na nywøle ki Jeekap; ni kwään jagøgø bëët ki wäätge beege jiy apaar kurŋween.

²³Nyeŋ o Daan beeye Ucim.

²⁴Ni nyeŋ wäät Naptali beege Jaadhël, ki Guni, ki Jedher, ki Cilëm.

²⁵Daan ki Naptali beege wäät Bila, dhaaŋŋa näk ŋat tïïc na cïp Leeban jï nyaare ma Reecal; ni beege wääte na nywøle ki Jeekap; ni kwään jagøgø bëët ki wäätge beege abïriiø.

²⁶Kwään jiy bëët moa näk jic Jeekap, na näk dhi øde na ö Ijep, beege jiy ma pïërabïciel ka abïciel; 'ba määr wääte kär kwaan dëëtge.

²⁷Ni wäät Jocep na nywøle Ijep beege ariiø. Ni tuuŋ Jeekap bëët na ö Ijep beege jiy ma pïërabïriiø.

²⁸Kanyøgø Jeekap Juuda ajääŋŋe nyïme baŋ Jocep, kiper nee øtjöör Göcën nyoodhe jïge; ni ö geni ni pïïcge yi ŋööm Göcën.

²⁹Kanyøgøøni Jocep jääne ni wø tut okwëënyi ajiiŋŋe ni ci kuna røømge ki wänni ma Icriel yi Göcën; 'ba kanya pïïe buute, wänni agääme ki ŋut gø ni jwöŋe ki kany mo bäär mëëth.

³⁰Ni kö Icrielli jï Jocep, ni «Kawaane kaawat mana jooda täärnyïmï niï poot kwøw, këël a doo thøw køør man nø, bäŋ gïre.»

³¹Køøre Jocep aköö jï uutwänni ki tuuŋ wänni bäre, ni «Aani a cøøa kuna caana gø jï Peerø, ni kööa, ni ‹Nyïïmera ki tuuŋ wära, jøøa en yi ŋööm Keenan, gena ö baŋa.

³²'Ba gena jiy ma dïkwääc dïëk, ni tïïc marge beeye kwaac lääc paac. 'Ba pïïth dïëk moge ki dhäk moge bëët akälge, ki japa en jïge bëët.›

³³'Ba no ö Peerø noo cwøl uuni ni pëëny uuni, ni ‹?Tïïc mana ŋäyu a tïïa ŋø?›,

³⁴wäru kööu, ni ‹Tïïc mar laagï beeye kwaac lääc paac ki mana kälge thïnhö këël kawaane; ni beeye tïïc mana ŋäcwa, këël kwäcwa thuwø.› Kiper ni näk luummögø caannu caannø, løny jïïu ki man bëëdu ŋööm Göcën. Kiper tïï dïkwääy beeye gïn mo raac døc ki baŋ jø Ijep.»