Read anuak Wïlöölö 47 Bible Online

Wïlöölö 47 - anuak bible

Wïlöölö 47

¹Køøre Jocep aci baŋ Peerø ni caan gø jïgø, ni «Wära ki uutwära ki coka gena ö ki yi Keenan ki dïëk ki dhäk moge ki gïïa en jïge bëët; ni kawaane ge ena yi ŋööm Göcën.»

²Køøre Jocep alwötö ki jiy abïïc dï uutwänni ni kïth ge baŋ Peerø.

³Ni kö Peerø jïge, ni «?Tïïc mana ŋäyu a tïïa ŋø?» Ni köge jï Peerø, ni «Waani na laagï, waana dïkwääc dïëk, kaamar kwäcwa.»

⁴Ni cäŋge köö jï Peerø, «Waana ö ki man bëëtwa yi ŋöömö marï; kiper meel atïmö ni dwøŋ yi ŋööm Keenan, ni bäŋ luum mo cam dïëki mowa, wa na laaŋe moï. 'Ba kawaane wa kwaya ïïni ki man ö laagï ni bëëtge yi ŋööm Göcën.»

⁵Køøre Peerø aköö jï Jocep, «Wäru ki uutwäru ki coku aö baŋï.

⁶Ŋööm Ijep ena cerï; mooc wäru ki uutwäru ki coku ki ŋöömö mo beer døc. Beerra man ö geni ni bëëtge yi ŋööm Göcën. 'Ba ni näk da jiy dïge mo ŋäyï mo nyeŋge reegø ki tïïc, geni wär tïïyï na jiy mo lääc paac 'moa bëët ena ceŋge.»

⁷Køøre Jocep wänni ma Jeekap akäl nyïm Peerø, ni ö Jeekapi ni gwïëth Peerø.

⁸Ni kö Peerø jï Jeekap, ni «?Cwiiri moa beetï adïï?»

⁹Ni kö Jeekapi jï Peerø, ni «Cwiiri moa beeda beege cwiiri ma dïpa ki pïëradäk, naa bëëdö naa wïdö jaak. 'Ba cwiiri moa beeda beege cwiiri mo nøk, ni beeda ki bëëtö mo leth; ni cwiiri moøgø nøka geni ki cwiiri moa beet kwäya dïkwøŋ ni ge wïdö jaak.»

¹⁰Ni ö Jeekapi ni gwïëth Peerø, ni aae nyïm gø.

¹¹Køøre Jocep wänni ki uutwänni ki coki amooe ki kar bëëtö, ni mooc ge ki kurge yi ŋööm Ijep, na ŋöömö mo beer døc yi ŋööm Ramcë, kaa mana caani Peerø jïre.

¹²Ni ö Jocepi ni gwøk wänni ki uutwänni ki jic wänni bëët, ni mooc geni ki cam mo orømø kiperge ki nyïïge bëët.

¹³'Ba kar kanyøgøøni ŋööm Ijep bäre atïmö ni bäŋ cam yie, kiper meel atïmö ni dwøŋ døc, ni tïm ŋööm Ijepi ki ŋööm Keenan no ogwäl ki cam kiper meel na päl.

¹⁴Ni ö Jocepi ni cooŋ gwel bëët mo jø Ijep ki jø Keenan na kar beel moa ŋeewge; ni ö Jocepi ni kïth gwel bëët yi øt Peerø.

¹⁵'Ba na ö gwelli bëët na thumge ceŋ jø Ijep ki jø Keenan, jø Ijep bëët aö baŋ Jocep, ni köge, «Mooc wa ki cam. ?Aŋø ni thøwa buutï jaak en? Kiper gwel mowa athum bëët.»

¹⁶'Ba aløk Jocepi jïge, ni «Kiper mana näk mo gwel mou onø thumö, kälu lääc paac mou, nou mooa ki caammi na karge.»

¹⁷Køøre geni lääc paac moge akälge baŋ Jocep, ni ö Jocepi ni mooc geni ki cam na kar okwëënyi moge, ki dïëk moge, ki dhäk moge, ka arëëni moge. Ni ö eni ni mooc geni ki cam na kar lääy moge bëët ki yi cwiinøgø.

¹⁸'Ba na tïme na aŋuun cwiinøgø, gena cäŋ ö baŋe yi cwiir maya ni köge jïre, «Waani bäŋ gïn mo dewa kanø ki kwääcwa, kiper gwetwa athum, ni lääc paac mowa bëët atïmö na mo kwääcwa. Bäŋ gïn mo dööŋ jïwa këët, 'ba beeye dëëtwa ki ŋøøm mowa keere.

¹⁹?Aŋø ni thøwa buutï jaak en, ni räny ŋøøpwa en? Ŋeew waani ki ŋøøm mowa nee wa jïtwa ki cam, kiper nee wa tïmwa na laaŋe jï Peerø, ni tïm ŋøøpwa na moe. Mooc waani ki köödhi, kiper nee wa kwøwa nee wa ba thøwa, kiper nee ŋöömö ba ränynye.»

²⁰Ni ö Jocepi ni ŋeew ŋööm Ijep bäre jï Peerø, kiper jø Ijep bëët pwöth moge aŋeewge, kiper meel atïmö ni päl bäätge, ni dööŋ pwöthi mo Ijep na mo Peerø.

²¹Ni ö Jocepi ni käl jiy yïth päänye ki dï Ijep bäre, ni tägi ki cuŋŋe maya këël cuŋŋe maya.

²²'Ba beeye ŋøøp dïlämme keerge na käre ŋeeø, kiper cam dïlämme wø jootge baŋ Peerø, ni cam marge ena cer Peerø cooth. Ni beeye tiere na kärge ŋøøm moge ŋeeø.

²³Køøre Jocep aköö jï jiy, «Kawaane uuna ŋeea ki ŋøøpu bëët jï Peerø. Källu köödhi en, ni piithu pwöth nø.

²⁴'Ba kanyo tïme na kar kac, bïï thäŋi wär cïpu jï Peerø, ni dööŋ ŋweerge jïïu na köödhi kiper pwöth mou, kiper nee uuni ki tuuŋu ki nyïïu nou jïtu ki cam thuwø.»

²⁵Ni köge jïgø, «Jwïëy mowa agwøgï møn. Beerra man bëët Peerø ni yie met ki waani, ni bëëtwa ni waana laaŋe jïre.»

²⁶Ba ciik mana cïp Jocepi kar kaaca yi ŋööm Ijep atïmö na ciik mo poot nut këël dïcäŋi en. Ni ciik manøgø beeye ni Peerø jïre doo da bïï thäŋi. 'Ba ŋøøp dïlämme keerge kär tïmö na mo Peerø.

²⁷Kanyøgø jø Icriel abëëdö Ijep, yi ŋööm Göcën, ni meetge rege ni nyaayge ni thööth ni kwärge.

²⁸Ni ö Jeekapi ni bëëde Ijep ki cwiiri apaar ka abïriiø; 'ba cwiiri moa beede ni kwøw beege cwiiri ma dïpa ki pïëraŋween ka abïriiø.

²⁹'Ba kanya cään kar thøw Icrielli, eni wääde ma Jocep acwøle ni kööe, «Ni näk iï met ki aani, cïp cerï bäät ääma ni kööŋï ni tïïyï gïn mo beer ma adïëri kipera, ni ba koonyï aani yi ŋööm Ijep.

³⁰'Ba beerra man koonyï aani buut wära ki kwara. Käl aani ni kïthï aani wøk ki yi Ijep, ni koonyï aani kanya koony geni yie.» Ni løk gø jïgø, no «Otïïa kaawat mana caanï enø.»

³¹Ni kö Jeekapi, «Kööŋ ŋëëta.» Ni ö Jocepi ni kööŋ ŋëët gø. Køøre Icriel cøŋŋe akëël piny wï pëëme ni pwøc Jwøk.