Read anuak Wïlöölö 49 Bible Online

Wïlöölö 49 - anuak bible

Wïlöölö 49

¹Køøre Jeekap wääte acwøle, ni kööe, ni «Cooŋŋu rou kanya ciel buuta, kiper nee gïïo tägi dëëtu yi nyïme nee caana jïïu.

²«Beerra man cooŋŋu rou ni cegu ïthu, u na wäät Jeekap; ni leŋŋu mar wääu ma Icriel.

³«Nyie, Ruben, beeye ïïni na kanynya, ni bee ï teek mara, ni ïïna ŋata kwøŋa nywøl dïkwøŋ na näk wïth laaya. Ïïna jïtö ki wödö ki teek mo kaala wääta møga.

⁴'Ba ïïna dhaanhø mo waŋŋi niï caala pïï; karï ba tïmö ni ena maal këët, kiper ïïna døny bäät cï wäru, ni päätï gø ki køør mana ciï baŋe.

⁵«Cimien ki Libay beege nyïïmëëe. Tøøŋi moge atïïcge na gïï nääŋge jiy ki ge jaak.

⁶A ba doo pïïa piny ki geni ciel kany wø cuŋge; ni ba dwäta ki geni kar acooŋa marge, kiper jiy anäkge jaak kanya wëërge, ni ŋørge ojwöc dhäk jaak ki køør dïwït marge.

⁷Acïën Jwøk en bäät wëër marge, kiper gena wëër ki wëër mo teek døc; ni ö ajäla mare ni en bäät wëër marge na raac. Geno pääŋŋa yi ŋööm Jeekap, ni keetha geni dï jø Icriel.

⁸«Ïïni na Juuda, ïïno pwøc nyïïmeru ki uutwäru; cerï oen bäät ŋut nyïïmännï. Nyïïmeru ki uutwäru wïthge okuulge piny nyïmï.

⁹Juuda rööma nyï ŋuu mo teek, ni caala ŋuu mo ö maal no ojäŋ ki rïŋö. Ena gääŋ, ni tïme kaamar ŋuu mo omøør piny. Ni bëëde kaamar ŋuu ma maath. ?Aŋø, aŋa ni ba lwäär ki man jiec gø?

¹⁰Athøc kwär ba aay cer Juuda, ni kwär ba aay dhi øde, këël mano ö ŋat ma athøc kwär dööŋ jïre; ni tïm jiyi bëët ni leŋa ciik moe.

¹¹Arëën mare, man wø cäädhe ki bäät gø, wø twöe twöö ro omøk, ni twöc nya arëën mare ro omøk mana näk nyïëdi moe beyø døc. Abïïe moe penye ka køøŋ nyïïomøki, ni peny abïïe moe ki pï nyïïomøki moa kwaar.

¹²Nyeŋŋe mïërö ni kaala køøŋ nyïïomøki mo tøŋ døc, ni lage tar ni kaala caak.

¹³«Dhebulan obëëdö lak ageel naama dwøŋ, ni tïme na dhi waath jï baabuure, ni keew mare ena jï kuna en Caydan.

¹⁴«Icakar bëëdö kaamar arëën mo teek, mo obut piny jaak yïthakic baae moe moa kääre.

¹⁵Kany wø joot kar jwömö mare ni beer, ni neen ŋöömö ni mïërö, køøre gööge dwøge piny kiper nee kääde ki baae, ni tïme na laŋŋø mo tïïö ka gïti.

¹⁶«Daan otïmö na kwääc løøk mar jø poge, kaa mana bëëde ni ena wï tuuŋ aciel ki røk tuŋi mo Icriel.

¹⁷Daan otïmö kaamar thwöl mo ena øtjöö, na thwöl mo dhee da cïm mo bëëdö thääŋ jöö, ni kac tier okweeny; ni ö ŋata en bäät okweenynyi ni päth piny ŋää okweeny.

¹⁸«'Ba aani, Awuuö Jwøk, a koora køny marï.

¹⁹«Gaat, dïtwïëte ööa paare ni twierge eni; 'ba eno läp køørge ni läw geni twier.

²⁰«Acer, cam mare otïmö ni päl døc, ni jïte ki cam moo rømø man wø cam nyeya.

²¹«Naptali otïmö kaamar purra mo opädö ni cäädhö jaak; ni nyööte ki nyïïe mo beyø.

²²«Jocep otïmö na bat jaath mo kännö ki nyïëdi, na bat jaath mo kännö ki nyïëdi mo ena bäät pïï mo kwödö; ni bäädi moe olaa bäät kal.

²³Nyïïmän moe mo ceŋge da jap leny akëëdö ki eni døc, ni thööcge eni ka athëëre, ni cwaatge yi gø døc.

²⁴'Ba gïr leny mare poot bëëdö ni ee maa ni teek ni kär dak cere, ni bääte ee maa ni teek ni cere rwäänhnhö ri leny; ni teege joode ka køør teek man wø cïp ŋata en teeki jïre, ni beeye Jwø Jeekap, eni na dïkwääy ni wø gwøk jø Icriel.

²⁵Ï na Jocep, teek marï ojootï baŋ Jwøa näk Jwø wäru, Jwø wø køny ïïni, ni beeye Jwøa en teeki jïre ni wø gwïëth ïïni, na ŋato gwïëth ïïni ki gwïëth mo ööi ki maal, ki gwïëth mo käla piny thuwø; ni gwïëth ïïni ni jïtï ko obwöre ki lääc paac mo thööth.

²⁶Gwïëth mo wäru bëëdö ni teeka geni ki kïte moa kwøŋ bëëtö cøøn, ni kaala thuuri mo wø bëëdö na bäre bäre. Beerra man bëët gwïëthi moøgø bäät Jocep, ni tïmge ni ena bääte, eni na näk dwøŋŋa kare ki uutwänni.

²⁷«Benjamen otïmö ni caala orudö mo owär, mo maga lääy ka amöölla ni cam gø ki law ec. 'Ba no tïme na wïthïënhö, jammi moa twiere di pääŋŋö.»

²⁸Jøøgø bëët beege wïth tuŋi apaar kurriiø mo Icriel, ni luupögø beege moa caan wääge jïge kanya gwïëth geni. Gena gwïëdhe ki gwïëth mo orømø ki ŋati man nø.

²⁹Køøre gena köömme ni kööe jïge, «Aani kara cään ki man thøøa. Beerra man koonyu aani buut wära ki kwara yi kään kïdi na en yi pwöth Ëprön nyï Këth,

³⁰ni beeye käänna en kanya cwøl ni Makpila na en buut Mamrë yi ŋööm Keenan. Kää manøgø aŋeew Eeberammi na aciel ki pwöth Ëprön baŋ Ëprön nyï Këth na kany koony ge yie.

³¹Køøre Eeberam akoonyge kaace ki cïïe ma Ceera. Ni kaace beeye kanya koony Aydhak yie ki cïïe ma Rebëëka. Køøre Liia akoonya kaace thuwø.

³²Pwödhö manøgø ki käänna en yie beege moa ŋeew baŋ jø Këth.»

³³'Ba na ö Jeekapi na lønye ki kööm wääte, eni tiete adwøk maal bäät pëëm, ni nyaaŋ ree piny, ni put jwïëy ka aŋuudi, ni thøøe, ni läp køør jø poge.