Read anuak Wïlöölö 5 Bible Online

Wïlöölö 5 - anuak bible

Wïlöölö 5

¹Man beeye luum nyïïkwaac Adam. Dïcäŋa ö Wuuö Jwøki na cwääc dhaanhø, eni dhaanhø acwääe ni rööma Jwøk.

²Ni cwääc geni na thwønh ki maath, ni gwïëth geni, ni cwøl geni na jiy dïcäŋa cwääc geni yie.

³Kar kanya tïm cwiic Adammi na dïpa ki pïëradäk, ena nyöötö ki wääde mo rööma eni mo ee caalø, ni cak nyeŋ gø ni Cëth.

⁴Ni cwiiri moa beet Adammi kanya nø nywøl wääde ma Cëth beege cwiiri ma dïpe abära; ni cäŋ nyöödö thuwø ki wääte ki nyïïe møøk.

⁵'Ba cwiic Adam bëët moa beede beege cwiiri ma dïpe abïŋween ki pïëradäk. Køøre ena thøw.

⁶Ni ö Cëthi ni bëëde ki cwiiri ma dïpa ka abïïc, ni nywøl wääde ma Ënöc.

⁷Køør kanya ö Cëthi na nywøl wääde ma Ënöc, ena cäŋ bëëtö ki cwiiri ma dïpe abära ka abïriiø, ni nyööde ki wääte ki nyïïe møøk.

⁸'Ba cwiiri bëët moa beet Cëthi beege cwiiri ma dïpe abïŋween ka apaar kurriiø. Køøre ena thøw.

⁹Ni ö Ënöci ni bëëde ki cwiiri ma pïërabïŋween, ni nywøl wääde ma Keenan.

¹⁰Køør kanya ö Ënöci na nywøl wääde ma Keenan, ena cäŋ bëëtö ki cwiiri ma dïpe abära ka apaar kurbïïc, ni nyööde ki wääte ki nyïïe møøk.

¹¹'Ba cwiiri bëët moa beet Ënöci beege cwiiri ma dïpe abïŋween ka abïïc. Køøre ena thøw.

¹²Ni ö Keenanni ni bëëde ki cwiiri ma pïërabïriiø, ni nywøl wääde ma Maalalel.

¹³Køør kanya ö Keenanni na nywøl wääde ma Maalalel, ena cäŋ bëëtö ki cwiiri ma dïpe abära ki pïëraŋween, ni nyööde ki wääte ki nyïïe møøk.

¹⁴'Ba cwiiri bëët moa beet Keenanni beege cwiiri ma dïpe abïŋween ka apaar. Køøre ena thøw.

¹⁵Ni ö Maalalelli ni bëëde ki cwiiri ma pïërabïciel ka abïïc, ni nywøl wääde ma Jaret.

¹⁶Køør kanya ö Maalalelli na nywøl wääde ma Jaret, Maalalel abëëdö ki cwiiri ma dïpe abära ki pïëradäk, ni nyööde ki wääte ki nyïïe møøk.

¹⁷'Ba cwiiri bëët moa beet Maalalelli beege cwiiri ma dïpe abära ki pïërabïŋween ka abïïc. Køøre ena thøw.

¹⁸Ni ö Jareti ni bëëde ki cwiiri ma dïpa ki pïërabïciel kurriiø, ni nywøl wääde ma Inøk.

¹⁹Køør kanya ö Jareti na nywøl wääde ma Inøk, ena cäŋ bëëtö ki cwiiri ma dïpe abära, ni nyööde ki wääte ki nyïïe møøk.

²⁰'Ba cwiiri bëët moa beet Jareti beege cwiiri ma dïpe abïŋween ki pïërabïciel kurriiø. Køøre ena thøw.

²¹Ni ö Inøki ni bëëde ki cwiiri ma pïërabïciel kurbïïc, ni nywøl wääde ma Mathucala.

²²Køør kanya ö Inøki na nywøl wääde ma Mathucala, ena cäŋ bëëtö ki cwiiri ma dïpe adäk ni bëëde ni caatha køør Jwøk, ni nyööde ki wääte ki nyïïe møøk.

²³'Ba cwiiri bëët moa beet Inøki beege cwiiri ma dïpe adäk ki pïërabïciel kurbïïc.

²⁴Ni ö Inøki ni bëëde ni caatha køør Jwøk, ni kär kare joodø, kiper ena lwør Jwøki.

²⁵Ni ö Mathucala ni bëëde ki cwiiri ma dïpa ki pïërabära ka abïriiø, ni nywøl wääde ma Lamek.

²⁶Køør kanya ö Mathucala na nywøl wääde ma Lamek, ena cäŋ bëëtö ki cwiiri ma dïpe abïriiø ki pïërabära kurriiø, ni nyööde ki wääte ki nyïïe møøk.

²⁷'Ba cwiiri bëët moa beet Mathucala beege cwiiri ma dïpe abïŋween ki pïërabïciel ka abïŋween. Køøre ena thøw.

²⁸Ni ö Lameki ni bëëde ki cwiiri ma dïpa ki pïërabära kurriiø, ni nyööte ki wääde.

²⁹Køøre nyeŋ gø acaae ni Nöa, ni kööe, ni «Ŋati en beeye ŋato jïtø ki cøm cwïny ki køøre ri öölö marø mana joodø ki køør tïïc mana leth kany wø puurø ŋöömö mana cien Wuuö Jwøki.»

³⁰Køør kanya ö Lameki na nywøl wääde ma Nöa, ena cäŋ bëëtö ki cwiiri ma dïpe abïïc ki pïërabïŋween kurbïïc, ni nyööde ki wääte ki nyïïe møøk.

³¹'Ba cwiiri bëët moa beet Lameki beege cwiiri ma dïpe abïriiø ki pïërabïriiø ka abïriiø. Køøre ena thøw.

³²Ni ö Nöa ni bëëde ki cwiiri ma dïpe abïïyö; køøre Cëm ki Kaam ki Jaapeth anywøle.