Read anuak Wïlöölö 50 Bible Online

Wïlöölö 50 - anuak bible

Wïlöölö 50

¹Kanyøgøøni Jocep apäth nyïm wänni ni jwöŋe bäät gø, ni nuum dhi gø.

²Ni ö Jocepi ni kööm jø tïïc moe mo wø ŋäc tïï akïïm ki man jiiŋge dëër wänni kiper nee ba kwääe; køøre jøøgø dëër Icriel ajiiŋge.

³'Ba tïïc manøgø manynya nïne ma pïëraŋween ki man jiiŋ dëër dhaanhø mo othøw. Kanyøgøøni jø Ijep Icriel ajwøkge ki nïne ma pïërabïriiø.

⁴'Ba na thum nïne moa jwøkge eni ki gø, Jocep acäänö ki jic Peerø ni kööe, «Kawaane ni näk mou mëër ki aani, caannu jï Peerø ni kööu,

⁵ni ‹Jocep aköö ni wänni acäänö ki eni ni kööe, ni «Aani kar thøwa acäännö; wär aani koony yi käänna jiiŋŋa kipera yi ŋööm Keenan.» Ni ö Jocepi ni kööŋe ki man tïïc gïnögø. 'Ba kawaane eni kwaya ïïni ki man ci kunöce nee wänni koonye. Køøre eno duui.› »

⁶Ni løgi ya Peerø, ni «Ciï ni koonyï wäru kaa mana caane jïrï na kööŋï.»

⁷Køøre Jocep aci kuna koony wänni, ni eni cäädhi ki jaae mo Peerø, ki jø tïïc moe, ki jaae mo ŋööm Ijep bäre.

⁸Ni lööbe ki jø paare, ki coki ki uutwänni, ki tuuŋ wänni bëët. 'Ba obwöre keerge, ki pïïth dïëk moge, ki dhäk moge awiige piny ni dööŋge yi Göcën.

⁹Ni ö jø okwëënyi ki jïëth wø tut okwëënyi ni aacge ki eni thuwø na aciel. Ni ö lwaaki moa cäädhö ki eni ni tïmge ni thööth døc.

¹⁰'Ba na pïïcge yi laara kar dïn mana en Atöt, na en løø Naam Jördan løøga, gena göö ko oduuru mo dwøŋ døc kaace, ni kïïnge gïr wää Jocep ki nïne abïriiø.

¹¹'Ba na ö wëëk ŋøømmi, ni beege jø Keenan, na jootge kïmmö mar jøøgø yi laara kar dïn mana en Atöt, gena köö, «Man beeye kïmmö mo dwøŋ døc jï jø Ijep.» Køøre nyeŋ kaace acwøl ni Abël-Midhirayim, ni tiere beeye kar kïmmö mar jø Ijep; ni kanyøgø ena løø Naam Jördan løøga.

¹²Ni ö wäät Icrielli ni tïïcge gïnögø kiper wääge kaawat mana kööm geni.

¹³Ni käärge wääge ni kïthge gø yi ŋööm Keenan, ni koonyge gø yi kään kïdi yi pwötha en Makpila, na en buut Mamrë; ni beeye käänna ŋeew Eeberammi na aciel ki pwöth Ëprön baŋ Ëprön nyï Këth, na kany koony eni yie.

¹⁴'Ba na løny Jocepi ki koony wänni, eni ki coki ki uutwänni ki jøøa aay ki eni bëët kuna koonyge wänni, gena døø Ijep.

¹⁵'Ba kanya neeni ya uutwää Jocepi ni wääge othøw, gena cäänö yïthakicge keerge ni köge, ni «Kanymør Jocep gïïa reyø bëët na tïïø dëëre coole coolø dëëtø ni männe ki øøni.»

¹⁶Køøre gena jääk baŋ Jocep ki dwøl ni köge, ni «Wäru dwøre acaane kanya poode ni eni poot kär thøw ni kööe,

¹⁷ni ‹Caannu jï Jocep ni wäru kwaya ïïni ki man weyï bääyö mar uutwäru ki gïïa reyø na tïïcge dëërï, këël na bëëde ni geno bääyö dëërï.› 'Ba ennø, wa kwaya ïïni ki man wëënnï bääyö marwa, waani na laak Jwø wäru.» Kanyøgø Jocep ajwöŋö kiper mana caange gïnögø jïre.

¹⁸Køøre uutwänni aöö ni leeŋge dëëtge piny nyïme ni köge, «Neenï, kawaane waana laagï.»

¹⁹'Ba Jocep aköö jïge, «Käru lwäyö. ?Aŋø, aana tïmö naa ena kar Jwøk?

²⁰Ki jïïu mana caarru ki cwïnynyu beeye ki man tïïu ki gïn mo raac dëëra, 'ba ki køør mana en cwïny Jwøk, gïnögø atïïe na gïn mo beer, kiper nee jiy mo thööth kwøwge kaawat man bëëde dïcäŋi en.

²¹Kiper manøgø nø, käru lwäyö. Uuno gwøa ki nyïïu moø ni therø yøø.» Gïnögø acaane jïge ki luup mo met ni cøma cwïnyge.

²²Kanyøgø Jocep ki jø po wänni bëët gena bëëdö Ijep. Ni cwiic Jocep moa beede ni eni kwøw beege cwiiri ma dïpa ka apaar.

²³Ni ö Jocepi ni joot nyïïkwaac wääde ma Ipariem këël mana pïïe ri dää beenhnhe; ni ö wäät nyikwaare ma Makir o Maneeca ni cïp geni bäät ääme.

²⁴Ni kö Jocepi jï coki ki uutwänni, ni «Aani kar thøwa aløny ni cään, 'ba Jwøk ööa baŋu kuna køny uuni, ni käl uuni wøk yi ŋöömmi, ni kïth uuni yi ŋöömma kööŋe kipere jï Eeberam, ki Aydhak, ki Jeekap.»

²⁵Køøre Jocep acäänö ki wäät Icriel ni kööe, ni «Jwøk ööa baŋu kuna køny uuni. Kar kaaca cuu 'moa wär kwanynyu kany ni källu geni.» Ni ö Jocepi ni wëëk geni kööŋ ki man tïïcge gïnögø.

²⁶Køøre Jocep athøw ni cwiiye dïpa ka apaar. Ni jiiŋge dëëre ni kïthge gø ya acanduk yi Ijep.