Read anuak Wïlöölö 6 Bible Online

Wïlöölö 6 - anuak bible

Wïlöölö 6

¹'Ba kar kanya tïm jiyi ni ge nyaay bäät piny, ni jïge da nyïïge ma nyïïakuue mo ege nywølø,

²jiy moa näk wäät Jwøk, nyïï jiy møga ajootge ni mïërö, ni ö ŋati man nø ni lwør mana jiere jaak, ni nywømge dëëtge.

³Køøre Wuuö Jwøk aköö, ni «Jwïëy 'moa ba doo bëëdö ri dhaanhø na bäre bäre, kiper ena dëël jaak. 'Ba aŋuun cwiiri moe tïmö na dïpa ki pïërariiø.»

⁴Kar kaaca jiy møøk mo cwøl ni Nëpilim bëëdö ni nutö bäät piny, ni bëëtge ni ge poot nutö thuwø yïth nïra ö jøøa näk wäät Jwøki na cige na nywømge nyïï jiy møga, ni nyöötge ko obwöre ki geni. Jøøgø beege jiy moa teek moa nyeŋge ŋäc cøøn dïkwøŋ.

⁵Ni ö Wuuö Jwøki ni joot rääö mar dhaanhø no opällö bäät piny, ni gïï wø caar dhaanhe bëët ki cwïnye beege gïï mo reyø keerge.

⁶Ni ö Wuuö Jwøki ni päth cwïnye døc kiper mana cwääc dhaanhø bäät piny, ni bëëde ni cwïnye kïmmö.

⁷Ni kö Wuuö Jwøki, «Aani dhaanhø mana cwääa raanynya raanynyø bäät piny, ki mano täge ki dhaanhø këël mano këët ri lääy, ki gïï wø muuli, ki wec maal bëët; kiper cwïnya apädhö kiper mana cwääa geni.»

⁸'Ba Nöa beeye ŋata tïm yi Wuuö Jwøki ni met ki gøøni.

⁹Man beeye luum nyïïkwaac Nöa. Nöa beeye dhaanhø mo mare beer ri jøøa bëëdö kar kaaca, ni bäŋ gïn mo jøøŋŋi ri bëëtö mare. Ena bëëdö ni caatha køør Jwøk.

¹⁰Ni ö eni ni nyööde ki wääte adäk; ni nyeŋge beege Cëm ki Kaam ki Jaapeth.

¹¹'Ba kar kanyøgøøni piny atïmö ni päŋ ki raay nyïm Jwøk, ni tïm pinynyi ni päŋ bäre ki gïï mo leth mo wø tïïc jiyi.

¹²Ni ö Jwøki ni neen bäät piny, ni joot gø ni päŋ ki raay; kiper jiy bëët jöör bëëtö marge ege raanynyø bäät piny.

¹³Køøre Jwøk aköö jï Nöa, «Aani, aŋuun bëëtö mar jiy bëët anø ŋøla; kiper piny apäŋ ki gïï mo leth ki køør gïïa tïïcge. 'Ba ennø, ge raanynya raanynyø ki piny bëët na aciel.

¹⁴Beerra man tëëŋŋï dëërï ki jääy ri jaadha cwøl ni göper; ni tïïï ki uudi yi jääy, ni rwøthï yie ki ŋääe wøk bäre ki dwøø.

¹⁵Ni jöö mano tïïyï jääy ki gø beeye en; bär mar jääy wär näk ma gööye ma dïpe adäk, ni päl yie beeye gööye ma pïërabïïc, ni ö bär mar wïïe maal ki piny ni tïme na gööye ma pïëradägö.

¹⁶Køøre wï jääy wär mooyï ki rëëbi, ni wëënnï yïthakic wïïe maal ki kööre piny ki gööyö aciel. Ni kølï dhi jääy tier-buute. Ni tïïyï yi jääy ni yïthe adäk, ni maya ena piny, ni rietge ena bääte maal, ni dääge ena maal bäätge.

¹⁷Ennø, aani jwïïö jääŋŋa jääŋŋö bäät piny, kiper nee gïn ma dëël jaak mo ree da jwïëy mo kwøw bäät piny nee raanynya. Ni ö gïïa kwøw bëët moa en bäät piny ni putge thøø.

¹⁸'Ba aani aano tudö ki luubö ki ïïni. Ïïno ci yi jääy, ïïni, ki wäätï, ki cïïï, ki määr wäätï bëët na aciel.

¹⁹Ri gïïa näk dëëtge da jwïëy bëët na kwøw, wärï kädï ka ariiø ri wï tuuŋ man nø ni kïthï ge yi jääy, kiper nee bëëtge ni kwøw buutï. Beerra man kälï geni na thwønh ki maath.

²⁰Røk weny ri wï tuuŋ man nø, ki røk lääy ri wï tuuŋ man nø, ki røk gïï wø muuli bäät piny ri wï tuuŋ man nø, geno ö baŋï no oriewi riewi ni öge baŋï yi jääy, nee kwøwge buutï.

²¹'Ba ïïni wärï kädï ki cam jïrï røk caammi bëët mo wø cam. Ni cooŋï gø kanya ciel kiper dëërï, ni tïme na cam jïrï ki jïge thuwø.»

²²Ni ö Nöa ni tïïc gïïögø; ni put gïïögø tïïc ki køør luup bëët moa köömmi ya Jwøki ki geni.