Read anuak Wïlöölö 7 Bible Online

Wïlöölö 7 - anuak bible

Wïlöölö 7

¹Køøre Wuuö Jwøk aköö jï Nöa, ni «Ïïni ki jø paarï bëët, cou yi jääy, kiper beeye ïïna ŋata jooda keere ni mare beer ri beenhnhø man bäre.

²Beerra man kädï jïrï røk lääy moa beyø ki thwönhi abïriiø ki mädhi abïriiø, ni kädï røk lääy moa ba beyø no oriewi riewi na thwønh ki maath.

³Ni kädï thuwø røk wec maal ki thwönhi abïriiø ki mädhi abïriiø, kiper nee nyïëdi moge bëëtge ni kwøw buutï bäät piny bäre.

⁴Kiper køør nïne abïriiø aani køth jääŋŋa jääŋŋö bäät piny, ni pädhe ki cääŋŋe ma pïëraŋween ki wärre ma pïëraŋween; ni ö gïïa cwääa bëët na näk kwøw ni puta geni raanynyø bäät piny.»

⁵Ni ö Nöa ni tïïc gïnögø ki køør luup bëët moa köömmi ya Wuuö Jwøki ki geni.

⁶'Ba kar kanya ö jwïïö na mac bäät piny, cwiic Nöa kar kaaca beege cwiiri ma dïpe abïciel.

⁷Ni ö Nöa ki wääte ki cïïe ki määr wääte ni cige yi jääy na aciel ki eni, kiper nee bøthge ki jwïïö.

⁸Ni ö teeŋ lääy moa beyø ki teeŋ lääy moa ba beyø ki teeŋ weny ki teeŋ gïï wø muuli bëët bäät piny,

⁹ni cige yi jääy baŋ Nöa no oriewi riewi na thwønh ki maath, kaawat mana ö Jwøki na kööm Nöa.

¹⁰'Ba na tïme na køør nïne abïriiø moa wäŋ Jwøki, jwïïö aput ö bäät piny.

¹¹Kanya tïm cwiic Nöa na dïpe abïciel, ni nïr dwääy mo riet dwäde apaar ka abïriiø, dïcäŋöca piny bäre aput mudö ki jwïïö, ni ö maalli ni put dhee jap,

¹²ni ö køthi mo päl døc ni pädhe bäät piny bäre ki cääŋŋe ma pïëraŋween ki wärre ma pïëraŋween.

¹³Ni ö Nöa ki cïïe, ki wääte na näk Cëm ki Kaam ki Jaapeth, ki määr wääte dääi ni putge ci yi jääy dïcäŋöca kiree,

¹⁴ni beege geni ki teeŋ wïth lääc paap bëët, ki teeŋ wïth lääc paac bëët, ki teeŋ wïth gïï wø muuli bëët bäät piny, ki teeŋ wïth weny bëët.

¹⁵Ni ö gïïögø na näk dëëtge da jwïëy bëët ni cige yi jääy baŋ Nöa no oriewi riewi,

¹⁶na thwønh ki maath, kaawat mana ö Jwøki na kööm Nöa. Ni ö Wuuö Jwøki ni cïëk jääy bäät Nöa.

¹⁷Ni ö jwïïö ni put nyaay bäät piny ki nïne ma pïëraŋween, ni ö pïïyi ni meetge rege, ni tïïcge jääy ni thäärö, ni tïme ni kare bäär ki piny.

¹⁸Ni ö pïïyi ni kathge døc, ni meetge rege ni thaar bäät piny bäre, ni tïm jääyi ni thäärö bäät pïï.

¹⁹Ni ö pïïyi ni cäŋge kadhø døc bäät piny; ni ö kïte moa bäyö bëët dï piny bäre ni mwønyi ya pïïyi.

²⁰Ni ö pïïyi ni nyänh maal, ni dööŋ kïte piny tiet pïï, kany mo ni rømi jïtö ki rumme ma apaar kurbïïc.

²¹Køøre gïïa näk kwøw bëët ni wø cäädhi bäät piny athøw; ni beege weny ki lääc paac ki lääc paap ki gïï wø muuli bëët bäät piny, ki jiy bëët.

²²Ni ö gïïa kwøw na en bäät piny bëët na näk dëëtge da jwïëy ni thøwge bëët.

²³Ni ö Jwøki ni raany gïïa kwøw bëët bäät piny, ki mana täge ri dhaanhø, këël mana këët ri lääy ki gïï wø muuli ki wec maal; gïïögø bëët araanynyi bäät piny. Ni ö Nöa keere ni dööŋe, ki jøøa en buute yi jääy.

²⁴Køøre pïï abëëdö bäät piny ni piny ee maaø ki nïne ma dïpa ki pïërabïïc.