Read anuak Wïlöölö 9 Bible Online

Wïlöölö 9 - anuak bible

Wïlöölö 9

¹Køøre Jwøk Nöa agwïëdhe ki wääte, ni kööe jïge, ni «Nyöödu ni nyaayu ni pääŋŋu piny.

²Ni ö lääyi mo bäät piny bëët ki wec maal bëët këël gïï wø muuli bäät ŋøøm bëët ki rec naam bëët ni bëëtge ni lwäär ki uuni, ni tïmge ni ge böö ki uuni. Geno bëëdö ni ena ceŋŋu.

³Gïï wø cäädhi na kwøw bëët otïmö na cam jïïu. Gena cïba jïïu kaawat mana cïba gïïa näk otuy na marr bëët jïïu.

⁴«'Ba rïŋö mo remø mare poot ena dëëre kär cammu, kiper remø beeye jwïëy moe.

⁵Ka adïëri møn, kwör rem kwøw maru coola coolø dëët lääy bëët. Ni coola gø thuwø dëët jiy bëët. Kwör rem kwøw mar dhaanhø coola coolø dëër ŋati man nø.

⁶«Ŋat mo kønynya rem dhaanhø piny jaak, remme okøny dhaanhe mørri piny thuwø; kiper Jwøk dhaanhø acwääe ki kïdö mo caala mare.

⁷'Ba uuni, jïtu ki nyïëdi ni nyaayu, ni pääŋŋu piny nou thööth døc ni nyaayu yie.»

⁸Køøre Jwøk acäänö ki Nöa ki wääte na en buute, ni kööe,

⁹ni «Ennø, aani a tudö ki luubö ki uuni ki nyïïkwaayu moo ööi køøru.

¹⁰Ni tuuda gø thuwø ki gïïa kwøw bëët na en buutu, ni beege weny ki lääc paac ki lääc paap bëët na en buutu, na näk gïïa ö wøk bëët ki yi jääy ki uuni na aciel, këël mana këët ri lääc bäät piny bëët.

¹¹Luubö mara tuuda tuudö ki uuni. Køør man en nø gïïa kwøw bëët bäät piny ba doo ränynyö këët ki jwïïö, ni doo bäŋ jwïïö mo duui këët mo caala man mo raanynya piny bäre.»

¹²Ni kö Jwøki, ni «Man beeye nyuudhi mar luumma tuuda yaakiyø ki uuni ki gïïa näk kwøw bëët na en buutu, kiper beenhnhø bäre thuwø mano ööi yi nyïme.

¹³Aani daanø mara acïba yi pöölö maal, nee tïme na nyuudhi mar luumma tuuda yaakicwa ki piny.

¹⁴Køøre kany wäro käla pøøl bäät piny, daanø puta nëënnö yïth pøøl.

¹⁵Ni ö aani ni para wïïa ki luumma tuuda na en yïthakiyø ki uuni ki gïïa kwøw bëët, ni pïï ba cäŋ duuö këët na jwïïö kuna raany gïïa kwøw bëët.

¹⁶Kany wäro tïme ni daanø ena yi pöölö maal, eni neena neenø, ni puta wïïa par ki luumma tuut na näk bäŋ cuŋŋe na en yïthakicwa, a na Jwøk, ki gïïa näk kwøw bëët na en bäät piny.»

¹⁷Ni kö Jwøki jï Nöa, ni «Man beeye nyuudhi mar luumma tuuda na tïïa nee bëëde yïthakicwa ki gïïa näk kwøw bëët na en bäät piny.»

¹⁸'Ba wäät Nöa na ö wøk ki yi jääy kar kaaca beege Cëm ki Kaam ki Jaapeth. Ni ö Kaammi ni tïme na wää Keenanni.

¹⁹Ni jøøgø na adäk yøø beege jøøa näk wäät Nöa, ni jiy moa nyaay bäät piny bëët käla rege.

²⁰Køøre Nöa na näk ŋat puur atägö ki man piith pwöth omøki.

²¹Kanyøgø ena mädhö ki køøŋ nyïïomøki ni meere, ni käl abïïe wøk dëëre, ni dööŋe ki dëëre yo oduŋkaara mare.

²²Ni ö Kaammi na näk wää Keenanni ni raŋ jï wänni jaak ni bëëdö ka dëëre, ni døø wøk ni caan gø jï nyïïmenni riet.

²³'Ba Cëm ki Jaapeth alwötö ka abïï ni kïthge gø göökge, ni cääthge ni ŋäthge ege løø, ni cige ni rïëpge wääge na näk bëëdö ka dëëre; ni løøge nyïmge wøk kiper nee wääge na näk bëëdö ka dëëre nee ba neenge.

²⁴Kanya ö Nöa na pääe ni lëëny wïïe ki meec køøŋø, gïna tïïc wääde mana thiinh dëëre awïnynye.

²⁵Køøre ena köö, na «Acïëni oen bäät Keenan, ni tïme ni kadha laŋ mare dï laaŋe mo nyïïmenni.»

²⁶Ni cäŋ köö thuwø, ni «Pwøc oen jï Wuuö Jwøk, na näk Jwø Cëm; beerra man tïm Keenanni na laŋŋø mare.

²⁷Beerra man ö Jwøki ni wëëk Jaapeth nyaay, ni bëëde yïth oduŋkaare mo Cëm, ni tïm Keenanni na laŋŋø marge.»

²⁸'Ba Nöa abëëdö ki cwiiri ma dïpe adäk ki pïërabïïc køør jwïïö.

²⁹Ni cwiiri moa beet Nöa bëët beege cwiiri ma dïpe abïŋween ki pïërabïïc. Køøre ena thøw.