Read anuak 2 Camiel 1 Bible Online

2 Camiel 1 - anuak bible

2 Camiel 1

¹'Ba ni Cøøl onø thøø ri leny, Deebit aduuö ki kuna dïïr wïth jø Amalëk, ni duu pääny mare Ciklak, ni bëëde ki nïne ariiø.

²'Ba na tïme na dää nïne, ka adïëri møn, nyen mør aöö ki twïër mar Cøøl na abïïe moe ee jeeyø ni wïïe ee jööpö ki tør ki pänh cwïny. 'Ba kanya pïïe baŋ Deebit, cøŋŋe aput këël piny ni kuul wïïe piny ni määtha gø.

³Køøre Deebit aköö jïgø, ni «?Ï kälï kaa?» Ni kö nyenøgø jï Deebit, ni «Aani, a rïŋŋi ki twïër mar jø Icriel.»

⁴'Ba Deebit aköö jïgø, ni «?Leny bëëde nidïï? Caanï jïra nø.» Ni kö nyenøgø, ni «Jiy abwøk kanya tïme na ri leny, ni ö jiyi mo thööth thuwø ni thøwge; këël Cøøl ki wääde ma Jönathan gena thøw thuwø.»

⁵Kanyøgønø, Deebit aköö jï nyena caan luummögø jïre, «?Aŋø, iï ŋääö nidïï ni Cøøl ki wääde ma Jönathan geno thøw?»

⁶'Ba nyenøgø aköö, ni «Aana cwöp ri Kïn Gilböa; 'ba ka adïëri møn, Cøøl ajooda no oööl døc ni ree ee piemø ki thiir tøŋ mare. 'Ba kar kaagø, jïëthe mo wø tut okwëënyi, ki jø wø rïïŋi ki bäät okwëënyi, ge ŋwieya køør Cøøl ni karge oløny ni cään ki gø døc.

⁷'Ba kanya ö Cøølli na lwïthe ŋääe, aana joode ni cwøl aani. 'Ba aana köö, ni ‹Aani en.›

⁸«Køøre aana pëënynye ni kööe, ni ‹?Ïïna ŋa?› «Ni løøa gø jïre, ni ‹Aana nyï Amalëk.›

⁹«Ni cäŋ köö ki aani, ni ‹Nyie, nyänh buuta ni 'nägï aani, kiper dëëra oløny ni da ŋwellø mo leth døc, maa ba laar 'näk.›

¹⁰Kanyøgønø, aana put nyiik buute ni nääa gø kiper yaa nø ŋäc ni eni ba kwøw këët ki køør gïna leth na pïï dëëre. Ni ö aduda na en wïïe ko ogut na en bade ni wø nyooth nyec mare, ni lwøra ge, ni beege ni käla baŋï ennø, ï na kwäärö mara.»

¹¹Køøre Deebit abïïe moe na en dëëre aput jeeyø ki pänh cwïny, ni ö jiyi moa en buute kaagø ni putge abïïe moge jeeyø thuwø.

¹²Kanyøgønø, gena kïmmö ni jwöŋge ni putge kweer ki cam këël mana tïm pinynyi na wïthïënhö. Gïnögø atïïcge kiper thøw Cøøl, ki wääde ma Jönathan, këël jic Wuuö Jwøk, ni beege jø leny mo jø Icriel, kiper mana ö jøøgø bëët na nääi ri leny.

¹³'Ba Deebit aköö jï nyena öö na wääny eni, ni «?Ïïna nyï kaa?» Ni løgi ya nyenøgø, ni «Aana nyï Amalëk o nyena bëëdö na jur po jø Icriel.»

¹⁴Køøre Deebit aköö jï nyenøgø, «?Aperŋø na kärï lwäyö ki man 'nägï nyeya na näk otïïc Wuuö Jwøki nee wïïe thïïmmi ki maaw?»

¹⁵Kanyøgønø, Deebit nyen mør røk jiye aput cwøl ni kööe, ni «Ö maal ni 'nägï nyenøgø.» Ni ö nyenøgø ni put nyï Amalëk manøgø cwøp ni 'näk gø.

¹⁶Køøre Deebit aköö jï nyï Amalëk mana thøw enø, ni «Beeye ï na käl thøø manøgø bäätï keerï, kiper mana ö wøk ki dhiï beeye na käl ajäla manøgø bäätï, ki køør mana kööï, ni ‹Aani, nyeya na näk otïïc Wuuö Jwøki nee wïïe thïïmmi ki maaw anääa.› »

¹⁷Køøre Deebit duut man acaae ni wär gø ni jwøga Cøøl ki wääde ma Jönathan,

¹⁸ni caan gø nee jø tuuŋ Juuda rege pwönyge ki duut manøgø; 'ba ka adïëri møn, duut manøgø nut no ogöör piny yi wëëlö mana cwøl ni Jacar. 'Ba duut man awär Deebiti ni kööe,

¹⁹«Wui, Icriel, dïbwöthe moa jiem ï ki køørge athum ki thøø kwöra en maal bäät thuuri moï. Ka adïëri møn, jø leny moa teek døc athøw ri leny.

²⁰«Beerra man ö luubö manøgø ni ba caani Gëth, ni ö awaaci manøgø ni ba gøøi piny nyeŋ jïëthe mo Ackelön; kiper ni näk mo wïny määr jø Pilitinni wïnynyö, ge kanynyø døc, ni tïm yïthge ni met, ge na määr jøøgø ni Jwøk kucge ni kär daŋø yøø.

²¹«Wui, ï na Kïn Gilböa, beerra man tïme ni bäŋ thööy wala køth bäätï, ni ö pwöthi moa en bäätï ni bäŋe caammi mo ciek yïthge. Kiper kööde mo leny mo jøøa teek adööŋ piny bäätï kaace no onipäät jaak, ni ö kwöt leny mar Cøøl ni käri wïïrö ki maaw këët.

²²'Ba atheeny Jönathan ko opëël Cøøl bäŋ wø duui jaak ni bäŋ rem jiy mo ege køny piny, ni kär gutö ki rïŋ dëët jøøa teek.

²³«Ka adïëri møn, Cøøl ki wääde ma Jönathan gena bëëdö ni di mëërö ki ge, ni yïth jøw met ki ge; 'ba na tïme na ri thøø, gena thøw na aciel. Gena jiy mo rïïŋö døc ni kaala olwiith mana näk agweec, ni ge teek døc ni kaala cïgïï ŋuu.

²⁴Wui, u na määr jø Icriel, jwøgu Cøøl døc, na tïïc uuni nou ruu ka abïïe mo mïërö mo perge leth, na tïïc uuni na abïïe mou dëëtge kïthi ki jap mïërö mo tïïc ka warkey.

²⁵«Wui, ka adïëri møn, jø leny moa teek døc athøø ri leny, ni ö Jönathanni ni nääi kwöra en maal bäät thuuri moï.

²⁶Nyie coka ma Jönathan, a jwöŋö naa keeya yia kiperï; ïïna bëëdö ni perï leth jïra. Mëër marï ki aani, beeye mëër mo pere leth døc ni kaala mëëc mïïö.

²⁷Wui, ka adïëri møn, jø leny mo teek døc athøø ri leny, ni ö jap leny moge ni putge dööŋŋe piny jaak ni bäŋ gïn mo kønyge.»