Read anuak 2 Camiel 10 Bible Online

2 Camiel 10 - anuak bible

2 Camiel 10

¹'Ba køøre cään gïna tägö, nyeya mar jø Amön athøw, ni ö wääde ma Anun ni ci kar wänni na nyeya.

²Køøre Deebit aköö, ni «Aani mëër mara nyoodha nyoodhø jï Anun o Naøc, kaawat mana ö wänni na nyooth mëër mare jïra.» Kanyøgønø, Deebit aput jääk baŋ Anun ki jiy nee cwïny Anun cømge kiper thøø mar wänni. 'Ba kanya ö jic Deebiti na pïïcge yi ŋööm jø Amön,

³jø Amön moa kwörge døøŋŋø aköö jï nyenyge ma Anun, na «?Aŋø, ki jïrï ni Deebit wøøra wäru, na jääŋ baŋï ki jiy mo cøm cwïnyï? ?Aŋø, Deebit jiye ba jääŋŋe baŋï kaper nee pääny raŋge ni marge lïëw nee tukge yi nyïme?»

⁴Kanyøgønø, Anun, jic Deebit aput mak ni liel thäk jïëc tïkge, ni ö abïïe moge moa näk caala jalabiiye ni ŋøør ge ni cëëgö ni ena dhøk wödhi, ni wëëk ge wääth.

⁵Køøre jøøgø atïŋŋö ni cääthge ni wïthge olääö døc kiree. 'Ba kanya caan gïnögø jï Deebit, ena jääk baŋge ki jiy nee ge jøli, ni kööe jï jøøa jääŋŋi, ni «Caannu jïge, ni ‹Putu bëëte Jerikö këël mano tuc jïëc tïgu; køøre nø, uuno duui.› »

⁶'Ba kanya ö jø Amönni na jootge gø ni geno nø tïmö ni caala gïn mo ŋwäänynye raac ki jï Deebit, gena jäägö ki jiy nee määnyge ki jø leny mo këëdi jïge ki gwel, ni jøøa jääkge baŋge beege jø Aram moa bëëdö Bëëth-Reyap ki moa bëëdö Dhöba, ni jïtge ki jø leny mo wø cäädhi ki tietge ma kume ma pïërariiø, ki nyeny Maika ki jø leny moe ma kuma aciel, ni jïtge ki jø leny ma kume apaar kurriiø baŋ jø Thöp.

⁷'Ba kanya ö Deebiti na wïny gïnögø, eni Jöap ki jø leny moa teek bëët ajääŋŋe.

⁸Ni ö jø Amönni ni öge wøk ni cïïmge rege kiper leny dhi kiir mar pääny marge. 'Ba jø leny mo jø Aram moa käl Dhöba ki moa käl Reeyöp, ki jø leny moa käl Thöp, ki moa käl Maika, ge ena kur keerge dï pwöla.

⁹'Ba kanya ö Jöapi na joot gø ni leny oløny ni ööa bääte ki nyïme ki ŋääe, ena jëëdö ki jiy moa teek røk jø leny mo Icriel, ni cïïm ge na dhøgi nee këëtge ki jø Aram.

¹⁰'Ba jø leny moa dööŋ acïp cer coki ma Abicay, ni ö Abicay ni cïïm ge na dhøgi nee këëtge ki jø Amön.

¹¹Køøre Jöap aköö jï coki ma Abicay, «Ni näk mo jø Aram tïmö ni ge teek bääta, a wär kønyï; 'ba ni näk mo jø Amön tïmö ni ge teek bäätï, ï kønya kønyø.

¹²Mak riï nø, ni këëdø ni ø teek kiper jø pøø ki päänye mo Jwøk marø. Beerra man ö Wuuö Jwøki ni tïïc mana beerra eni ki jïre.»

¹³Kanyøgønø, Jöap ki jø leny moe na en buute, gena ci baŋ leny ki jø Aram, ni ö jø Arammi ni bwøkge nyïm Jöap.

¹⁴'Ba kanya ö jø Amönni na jootge gø ni jø Aram obwøk, gena put bwøk thuwø nyïm Abicay, ni dønyge yi pääny. Køøre Jöap aput duuö ki baŋ leny mana këël ki jø Amön ni duu Jerucalem.

¹⁵'Ba kanya ö jø Arammi na jootge gø ni gena nø bööt jø Icrielli, rege acooŋge kanya ciel.

¹⁶Køøre Adadëdher ajäägö ki jiy nee jø Aram moa en løø Naam Upareeti løøga öge, ni öge kanya cwøl ni Ëlam; 'ba Cöbak kwääy lwaa leny mar Adadëdher beeye eni na bwøth geni.

¹⁷'Ba kanya ö gïnögø na caani jï Deebit, Deebit jø leny mo jø Icriel bëët acooŋ kanya ciel, ni aacge ni ŋutge løø Naam Jördan løøga, ni öge Ëlam. 'Ba jø leny mo jø Aram rege acïïmge na dhøgi ni këëtge ki Deebit.

¹⁸'Ba jø Aram gena bwøk nyïm jø Icriel, ni ö Deebiti ni nääe ki jø Aram ma dïpe abïriiø mo wø këëdi ki bäät jïëthe mo wø tut okwëënyi, ki jø leny ma kume ma pïëraŋween mo wø cäädhi ki bäät okwëënyi, ni cwøp Cöbak kwääy lwaa leny mar jø Aram, ni put Cöbaki thøø kaace.

¹⁹'Ba kanya ö nyeye bëët moa en tier Adadëdher na jootge gø ni geno nø bööt jø Icrielli, gena tudö ki luubö nee bëëtge ki bëët mëër ki jø Icriel, ni bëënge jø Icriel. Kanyøgønø, jø Aram gena put lwäyö ki man kønyge jø Amön këët.