Read anuak 2 Camiel 12 Bible Online

2 Camiel 12 - anuak bible

2 Camiel 12

¹'Ba dïcäŋ aciel Wuuö Jwøk, Nathan na näk nyikuŋ Jwøk ajääŋŋe baŋ Deebit. Ni ö Nathanni ni ci baŋ Deebit ni cääne ki eni ki luup mo keda leer, ni kööe jïgø, ni «Da jiy ariiø mo bëëdö paac aciel; dhaanhø aciel okwär, ni dhaanhø maya can.

²'Ba ŋata no okwär jïre da pïïth dïëk ki dhäk mo thööth.

³'Ba ŋata can bäŋ gïrpiny jïre, 'ba beeye nyi diel aciel keere ma røømmø ma nyakøø mo poot thiinh, mo ee ŋeeø ni piith gø; ni ö nyidierøgø ni put piith na aciel ko obwöre moe. 'Ba gïn wø cam ŋatøgø beeye wø cam nyidierøgø, ni ge mädhö ki gïrpiny aciel. 'Ba nyidierøgø bëëdö kööre,

⁴«'Ba dïcäŋ aciel ŋat mo käla jöö apïï na wëëllö po ŋata no okwär. 'Ba ŋatøgø no okwär enø, yie kär met ki man lwöte ri pïïth dïëk wala ri dhäk moe, kiper nee jiiŋŋe na cam jï ŋata käl jöö na pïï baŋe na wëëllö. 'Ba gïna tïïe, nyidier ŋata can alwøre ni jiiŋ gø na cam jï ŋata pïï paare na wëëllö.»

⁵Køøre Deebit aput wëër døc ki gïr ŋatøgø, ni kööe jï Nathan, ni «Ŋëët Wuuö Jwøk kiree, ka adïëri møn, ŋata tïïc gïnögø enø, rømi ka 'näk.

⁶'Ba ŋatøgø nyidier ŋata can dee coolø ki dïëk aŋween, kiper gïnögø atïïe ni cwïnye kär pädhö.»

⁷'Ba Nathan aköö jï Deebit, ni «Beeye ï ŋateca. Man beeye dwør Wuuö Jwøk, Jwø Icriel, ena köö, ni ‹Beeye aani na tïïc ïïni nee wïïï thïïmmi ki maaw naa røønya ïïni na nyeya mar jø Icriel, ni beeye aani na piem ïïni cer Cøøl.

⁸Aani thuwø, po nyeya marï ma Cøøl ki määre acïba jïrï nee neetï; ni ö jø Icrielli bëët, këël tuuŋge ma jø tuuŋ Juuda, ni cïba ge cerï. 'Ba doo na moøgø nøk kiperï, daa meedø jïrï ki møøk mo perge leth mo kaala moøgø.

⁹?Aperŋø nø, na taagï dwøra, a na Wuuö Jwøk, ni tïï ki gïn mo nëëni ni raac ki jïra? Ïïni, Uria nyï Këth anø 'nägï ri leny, ni nø kälï cïïe, ni tïme na cïïï; 'ba Uria anääï ri leny møn ni jääk jaak, ni beeye leny mana këëllu ki jø Amön.

¹⁰'Ba ennø, thøw tøŋ ree ba paanye dhi ødï, kiper aana taagï, ni nø kälï cï Uria nyï Këth, ni tïïyï gø na cïïï.›

¹¹«Man poot na dwør Wuuö Jwøk, ena köö, ni ‹Ka adïëri møn, aani, a känna bäätï ki gïn mo leth, ni ŋato tïïc gø käla ri jø dhi ødï. Këël määrï kiree, paanya paanyø buutï ni cïba ge jï dhaanhnhï mør, ni ö ŋatøgø ni ci baŋ määrï ni bute ki ge ko okaan cäŋ.

¹²Bääyö marï, atïïyï ni tiere ba nëëni; 'ba gïno tïïa, tïïa tïïö ko okaan cäŋ ni nëënö jï jø Icriel bëët.› »

¹³Køøre Deebit aköö jï Nathan, ni «Aana nø bääyö dëër Wuuö Jwøk møn.» 'Ba Nathan aköö jï Deebit, ni «Wuuö Jwøk thuwø bääyö marï anø wëënne. Ïïni, ï ba thøw.

¹⁴'Ba kiper gïna baayï ni dwøŋ enø, na taagï Wuuö Jwøk, nyilaal marï kiree mana lwaar dhaagø manøgø ki gø puta thøø.»

¹⁵Kanyøgønø, Nathan aput døø paare. Køøre Wuuö Jwøk nyilaal mana lwaar cï Uria ki gø jï Deebit, atïïe nee mak täwi, ni put nyilaalli tïmö ni tuu døc.

¹⁶Kanyøgønø, Deebit Jwøk akwaaye kiper täw nyilaal; 'ba Deebit aput kweer ki cam, ni but piny yïth ŋøøm jaak ki dïwäär bäre.

¹⁷'Ba jø døøŋŋø moa en paare kaagø, gena öö ni cuŋge buute nee eni tïŋge maal ki yïth ŋøøm nee cäme ki geni; 'ba ena kweer.

¹⁸'Ba gïna tägö, na tïme na bïriet nïne, nyilaal athøw. Ni ö jø tïïci mo Deebit ni lwäcge ki man caange gø jï Deebit ni nyilaal othøw, kiper gena köö, ni «Ka adïëri møn, kanya poot nyilaalli ni kwøw, øøna cäänö ki Deebit, ni käre döötø leŋø. ?'Ba ennø, ocaanø gø jïre nidïï ni nyilaal athøw? Kiper dëëre tïïe tïïö ki gïn mo leth.»

¹⁹'Ba kanya jooti ya Deebiti ni jø tïïc moe wïthge ege kuur kanya aciel ni ge muuŋö, aput ŋäc ni nyilaal othøw. Kanyøgønø, Deebit aköö jï jø tïïc moe, «?Aŋø, nyilaal athøw?» Ni løgi ya jøøgø ni köge, ni «Yaa, athøw.»

²⁰Kanyøgønø, Deebit aput ö maal ki yïth ŋøøm, ni lwøk dëëre, ni wïïr dëëre ki maaw, ni wiil abïïe moa en dëëre; ni put ci kar lam mar Wuuö Jwøk ni läme. Køøre ena duu paare, ni pëëe ki cam, ni ö jøøgø ni putge cam cïp nyïme, ni cäme.

²¹Køøre jø tïïc moe aköö jïgø, «?Wui nyeya, a teeŋ gïnaŋø na tïïyï en? Kanya bëëde ni nyilaal poot kwøw, ïïna kweer ki cam ni jwöŋï; 'ba kanya thøw nyilaalli, ïïna ö maal ni cämï.»

²²'Ba aløk Deebiti ni kööe, ni «Kanya bëëde ni nyilaal poot kwøw, aana kweer ki cam ni jwöŋa møn; kiper aana cädö, ni kööa, no ‹Oŋäya ŋa, kanymør Wuuö Jwøk met ec mare nyoodhe nyoodhø jïra, ni wec nyilaal nee put bëëtö ni kwøw.›

²³'Ba ennø, nyilaal anø thøw. ?Agïnaŋø noo kweera ki cam kipere këët nø? ?Aŋø, nyilaal løny jïra ki man tïŋa gø maal ki yi thøø? Beeye aani noo läp køøre, 'ba eni ba løny ki man duu wøk baŋa këët.»

²⁴Køøre Deebit cwïny cïïe ma Bathcïba acøme; 'ba ena ci baŋ gø ni bute ki gø; køøre Bathcïba ajïtö ki dhaanhø ni lwaare ki gø na dïcwøø, ni ö Deebiti ni cak nyeŋ nyilaal ni Cølöman. 'Ba Wuuö Jwøk mëër ki nyilaarøgø.

²⁵'Ba kiper mana ö Wuuö Jwøki na mëëre ki nyilaarøgø, dwøre ajääŋŋe ki dhi nyikuŋ Jwøk ma Nathan, ni cak nyeŋ nyilaal ni Jididiya, ni tiere beeye ni ŋata mëër Wuuö Jwøki ki gø.

²⁶'Ba Jöap acäŋ këëdö ki jø Amön moa en Raaba, ni mac thääŋ pääny manøgø. 'Ba Raaba beeye pääny mana dwøŋ mar jø Amön ni wø bëët nyeya marge yie.

²⁷Ni ö Jöapi ni jääk baŋ Deebit ki jiy, ni kööe, ni «Aana nø këëdö ki jøøa bëëdö Raaba; këël kar pïï marge mana en dï pääny anø maa thuwø.

²⁸'Ba ennø, cooŋ jø leny moa no odööŋ ni ööu ki ge ni tugu pääny man, nee tïme ni maya ïïni; kiper ni näk maya aani, tïmö ni wïnya nyeŋŋa jaak.»

²⁹Kanyøgønø, Deebit jø leny moa no odööŋ aput cooŋ ni ci Raaba, ni këëde ki jøøa bëëdö yie, ni put pääny manøgø mac.

³⁰Køøre Deebit aduda mar nyeya mar jøøgø aput lwør wï gø. 'Ba aduda manøgø tïïc ka warkey mo peek døc ma rumi ma kikar aciel, ni yie da waŋ kïdi mo pere leth. Ni ö aduda manøgø ni puti kïth wï Deebit. 'Ba Deebit gïïa twiere pääny manøgø beege gïï mo thööth døc.

³¹Deebit thuwø jøøa bøth yi pääny manøgø amaae, ni kïth ceŋge ki lïge ki teeŋ jap tïïc mo tïïc ka nywïëny, nee ge tïïge ki ge, ni tïïc møøk na mo wø budö ki thuube. Ni ö Deebiti ni tïïc teeŋ gïnögø dëët jøøa en yïth päänye bëët mo jø Amön. Køøre Deebit ki jø leny moe bëët gena put døø Jerucalem.