Read anuak 2 Camiel 15 Bible Online

2 Camiel 15 - anuak bible

2 Camiel 15

¹'Ba na tïme na køøre cään, Abëcëlöm amäänyö ki jääy man wø tut okweenynyi, ko okwëënyi, ni määnye ki jiy ma pïërabïïc nee bëëtge na jiy mo wø rïïŋi nyïm jääy mare man wø tut okweenynyi.

²'Ba Abëcëlöm wø laara päny maal ka amöölla cøøn, ni ci waŋ jöör kar løøk ni cuŋŋe kaace. 'Ba kany wø näk da dhaanhø mo öö mo lööŋŋö baŋ nyeya, Abëcëlöm ŋateca wø pute ka cwøl, ni kööe jïgø, «?Aŋø, ïïno käla yi päänye mane?» 'Ba ŋateca wø puta köö, «Wui o nyeya, aana dhaanhø aciel røk wïth tuŋi mo jø Icriel.»

³Køøre Abëcëlöm wø köö jï ŋateca, ni «Neenï, luubö marï beer ni tiir. 'Ba bäŋ dhaanhø aciel mo cega ïthe ki marï røk jø wø ŋøl luup jï nyeya.»

⁴Køøre thuwø, Abëcëlöm wø köö, ni «Doo na aano tïïö na dïŋut luup yi paani en, doo beer. Ŋata wø doo öö ni jïre da luum løøk, doo na ööa baŋa. Køøre aani luum ŋateca wø daa puta ŋøl ni tiir kiree.»

⁵'Ba gïn wø tägi, kany wø näk mo da dhaanhø mo ööa buute ni manynya man këël cøŋŋe piny ni kuul wïïe piny nyïme ni määtha eni, eni cere wø pute ka rwaak baŋ ŋateca ni gääm gø ni nuum dhi gø.

⁶'Ba Abëcëlöm aput bëëtö ni tïïya teeŋ tïïc manøgø jï jø Icriel bëët mo wø ö kar ŋøl luup mar nyeya; ni ö Abëcëlömmi ni put cwïny jø Icriel løø baŋe.

⁷'Ba na tïme na køør cwiiri aŋween, Abëcëlöm aköö jï nyeya, na «A kwaya ïïni naa cøøa Keeprön, nee kööŋ mara mana nø kööŋa kipere jï Wuuö Jwøk, nee wëëga thur kare.

⁸Kiper aano kööŋ jï Wuuö Jwøk kanya bëëda Gëcur na en Aram, ni kööa, ‹Ni näk mo Wuuö Jwøk a dwøge Jerucalem ni dëëra jööt, ka adïëri møn, a puta ci Keeprön ni cïpa ko olämi jï Wuuö Jwøk.› »

⁹Køøre nyeya aköö jï Abëcëlöm, ni «Ciï ki jööt dëël.» Kanyøgønø, Abëcëlöm aput tïŋŋö ni aae ni ci Keeprön.

¹⁰'Ba Abëcëlöm jiy ajääŋŋe ki piny ni cige baŋ wïth tuŋi mo jø Icriel bëët, ni kööe, ni «Kanyo wïnynyu dwør tuuŋ kiree ennø, wäru putu kwöŋŋö ni kööu, ni ‹Abëcëlöm atïmö na nyeya yi Keeprön.› »

¹¹'Ba kanya tïŋ Abëcëlömmi ki yi Jerucalem, eni cäädhi ki jiy ma dïpe ariiø mo ee cwølø kiper cam kar lam, ni jøøgø cäädhi ni bäŋ gïn lääŋge, ni bäŋ gïn mo ŋäcge na bäre kiper acaara mar Abëcëlöm.

¹²'Ba kanya bëëde na Abëcëlöm cïpö ko olämme, ena jääk baŋ Akithöpël poge Gilø, ni beeye nyen wø køny nyeya ma Deebit ka acaare. 'Ba ageem manøgø aput tïmö ni teek, kiper jiy moa caath køør Abëcëlöm rege ameetge ni tïmge ni ge thööth.

¹³Køøre dhaanhø mør mo di jääŋŋö aö baŋ Deebit, ni kööe, ni «Jø Icriel cwïnyge anø løøge baŋ Abëcëlöm.»

¹⁴Kanyøgønø, Deebit aköö jï jø kööre moe bëët moa bëëdö ki eni Jerucalem kaagø, ni «Laaru ö maal, ø waa reeŋø; kiper ni näk mo ø ba reŋi, bäŋ ŋat mo bøth dëëtø ki gïno tïïc Abëcëlömmi. Läädu; kanymør eni laara rïŋŋö ni maa øøni kany, ni put tïïö ki gïn mo leth dëëtø, ni put jiy mo thööth 'näk dï pääny jaak.»

¹⁵Køøre jø kööre mo nyeya aköö jï nyeya, «Neenï, wa na jiyï, dëëtwa ewa nø jek ki gïno jierï jaak, ï na nyeya marwa.»

¹⁶Kanyøgønø, nyeya adøny wøk, ni jøøa en paan dwøŋ bëët cäädhi ka eni. 'Ba nyeya, määre apaar awiie nee paan dwøŋ koorge.

¹⁷Ni ö nyeya ni døny wøk, ni jiy bëët moa en buute cäädhi ka eni; 'ba kanya pïïcge buut øtø mana en deŋ kiir, gena cuŋŋö.

¹⁸'Ba Deebit jø kööre moe bëët atïïe nee pöönhge ki nyïme; këël jø leny bëët mo wø koor eni, ni beege jø Kelita, ki jø Pelita, ki jø leny moa näk dïpe abïciel moa cäädhe ki geni kanya ööe ki Gëth, atïïe nee pöönhge ki nyïme thuwø.

¹⁹Køøre nyeya aköö jï Itay nyï Gëth, «?Aŋø, ïïni thuwø, ï aay ki waani? Døøgï ni bëëdï ki nyeya ma Abëcëlöm, kiper ïïna jur ni pou iï nø wec. Døøgï nø ni pïï piny kar bëëtö marï.

²⁰?Aŋø, ï ba ööï ka awääre jaak en? ?A aani, dïcäŋi ennø a doo köö niï wïdö ki waani na aciel, ni mara thääyö jaak? Ennø, døøgï ki jø tuuŋu ni pïïu piny paac; Jwøk mëër mare ni wø ba jøøl ka adïëri mare obëëdö ki ïïni.»

²¹'Ba aløk Itay jï nyeya, ni kööe, ni «Ŋëët Wuuö Jwøk, ki ŋëëtï ï na nyeya; ka adïëri møn, kanyo bëëdï yie, ï na nyeya mara, niï bëëdö ki bëët kwøw wala bëët thøø, aano bëëdö yie thuwø, a na dhaanhnhï.»

²²Køøre Deebit aköö jï Itay nyï Gëth, «Wøp, pöödhï nø.» Ni ö Itayi ni put pöödhö ni cäädhi ka jiye bëët këël mään ko obwöre moge bëët.

²³'Ba kanya ö nyeya na tïïc jiy bëët moa cäädhö ki eni nee pöönhge ki nyïme, jiy bëët moa en yi pääny kaagø ge bëëdö ni ge göö ko oduuru. 'Ba nyeya thuwø aput läp køørge ni ŋølge naam mana cwøl ni Kidaran, ni ö jiyi bëët ni putge aay ni ge cøra jööra näk coonya dï paap.

²⁴'Ba kar kaagø, Dhadök ka Abiethaar na näk Dïlämme Moa Døøŋŋø, ge nut kaagø ki jø tuuŋ Libay bëët; ni jø tuuŋ Libay acanduk man wø nyooth luumma tuut Jwøki ki jiy käärge käärö. 'Ba geni acanduk mar Jwøk acïpge piny, ni bëët acanduki kaagø këël mana thum jiyi bëët ki ööny wøk ki yi pääny.

²⁵Kanyøgønø, nyeya aköö jï Dhadök, na «Acanduk mar Jwøk dwøk yi pääny. Kanymør Wuuö Jwøk met ec mare nyoodhe nyoodhø jïra, ni cäŋ aani duu kany, ni cäŋ a tïïyö na acanduk mare ki kar bëëtö mare jooda.

²⁶'Ba ni näk mo eno köö ni yie ba met ki aani, ka adïëri møn, a nutö; beerra man ö Wuuö Jwøki ni tïïc gïna manynye dëëra.»

²⁷Ni cäŋ nyeya köö jï Dhadök na näk Kwääy Lam Mana Dwøŋ, na «?Aŋø, ï paa ŋat wø joot jammi ki køør man wø nyooth Jwøki? Ïïni ki wäädï ma Akimaath ki Jönathan wär Abiethaar døøu pääny ki jööt dëël.

²⁸Neenï, aani, a kurö dï paap bäät naam kanya näk dïët ki caara këël kanyo dee dwøl mo wïnynya wïnynyö baŋï.»

²⁹Kanyøgønø, Dhadök ka Abiethaar, acanduk mar Jwøk aputge dwøk yi Jerucalem ni putge bëëtö kaace.

³⁰'Ba Deebit aput aay ni cør jöör Kïn Ølip, ni cäädhi ni jwöŋö, ni wïïe ee loobø, ni cäädhi ka thäny tiete jaak. Køøre jiy bëët moa cäädhö ki eni, ŋati man nø wïïe aput loop, ni cääthge ni ge jwöŋö.

³¹'Ba acaan dhaanhe mørri jï Deebit ni kööe, na «Akithöpël, ena dhaanhø aciel røk jøøa tuut dhøkge bäätï na no odwätö ka Abëcëlöm.» Kanyøgønø, Deebit aput lämö jï Jwøk ni kööe, «Wui, Wuuö Jwøk, akwaya ïïni, tïïc acaara mar Akithöpël ni bäŋ tiere.»

³²'Ba gïna tägö, kanya tïme ni Deebit pïï wï kïdi, buut kany wø wøør Jwøk yie, ka adïëri møn, gena put røømmø ki Ucay nyï Arki, na abïï mare ee jeeyø, ni wïïe ee jööpö ki tør ki pänh cwïny.

³³'Ba Deebit aköö jï Ucay, «Ni näk miï cäädhö køøra ni aayï ki aani, ï tïmö niï caala tëër mo peek kipera.

³⁴'Ba ni näk miï døøa yi pääny, ni cäänï ka Abëcëlöm, ni kööï, ‹Wui, nyeya, aani a manynya man tïma ni aana dhaanhnhï; kaawat mana bëëda ni aana dhaanh wäru ki yïth nïra pöödhö, ennø a manynya man tïma ni aana dhaanhnhï møn;› køøre nø, otïmö ni løny jïrï ki man kønyï aani, ni tïïyï acaara mar Akithöpël nee ba thur kare.

³⁵?A Dhadök ka Abiethaar na näk Dïlämme Moa Døøŋŋø, u ba bëëdö ka geni paac kunece? Kanyo dee gïn mo wïnynyï wïnynyö jaak paan dwøŋ mar nyeya, ï doo puta cøø ni caanï gø jï Dhadök ka Abiethaar na näk Dïlämme Moa Døøŋŋø.

³⁶Neenï, wäätge karge riet nut buutge paac kunece, ni beege Akimaath o Dhadök ki Jönathan wär Abiethaar; 'ba gïno wïnynyï jaak løny jïrï ki man cïbï dwøl maneca dhøkge ni jääŋŋï geni baŋa.»

³⁷Kanyøgønø, Ucay nyawat Deebiti aput døø yi pääny. 'Ba kar kaagø, Abëcëlöm aput pïï paac yi Jerucalem.