Read anuak 2 Camiel 16 Bible Online

2 Camiel 16 - anuak bible

2 Camiel 16

¹'Ba kanya ö Deebiti na løøc piny ki wï Kïn Ølip, Dhiba ŋat tïïc mar Mepiböcëth onø møør piny nee røømge ki Deebit ni eni käädö ka arëëni ariiø mo ee jiiŋŋø nee cäädhö ki bäätge, ni dïŋäthge ee töönynyö ki jammi; ni jammi moa en bäätge beege dääpe ma dïpe ariiø, ki nyïïomøki moa no otal mo omiiø na dhøgi ma dïpa, ki teeŋ nyïï jenni møøk mo otal mo omiiø na dhøgi ma dïpa, ki køøŋ nyïïomøki mo ena ya agwäy.

²Kanyøgønø, nyeya aköö jï Dhiba, «?Aŋø, gïï bëët ii kïthï ge kaa?» 'Ba Dhiba aköö, na «Arëëni beege kiper jø paarï, ï na nyeya, nee ge cääthge ki bäätge. 'Ba dääpe ki nyïï jenni beege kiper jaay moa cäädhö ki ïïni nee camge. 'Ba køøŋ nyïïomøki beeye kiper ŋato ööl waŋjöö dï paap nee mäthe.»

³'Ba aløk nyeya jï Dhiba ni kööe, na «?Aŋø, Mepiböcëth, nyikwaar ŋata bëënnï, en kaa?» Køøre Dhiba aköö jï nyeya ma Deebit, ni «Ka adïëri møn, ena dööŋ Jerucalem, kiper ena köö, ni ‹Yïth nïri, jø Icriel nyec mar wära dwøkge kare jïra.› »

⁴Kanyøgønø, nyeya aköö jï Dhiba, ni «Ka adïëri møn, jammi bëët mo Mepiböcëth cøøa jïrï.» 'Ba Dhiba aköö, «Wui nyeya, aana dhaanhnhï møn; beerra man bëët iï ni met ki aani.»

⁵'Ba kanya ö nyeya ma Deebit na pïïe buut Baurim, ka adïëri møn, nyen mør mo nyeŋŋe cwøl ni Cimiy o Gëra, mo käla ri jø dhi øt Cøøl, aput ö wøk ki kaace, ni cäädhi ni janynya Deebit.

⁶'Ba eni, Deebit ki jø kööre moe bëët athööye ki kïte; 'ba kar kaagø, jø leny bëët ge cäädhi ni nyeya ege kïth dïër, ni jøw møøk ena bäät cwïïc ni møøk ena bäät caam.

⁷'Ba luup moa car Cimiy kanya jany Deebit beege ii, ena köö, «Nyie dïnääy, ŋata wïïe raac, ciï, put aay nø.

⁸Kwör rem jiy moa køny piny acool Wuuö Jwøki dëërï, ni beege jiy moa käl ri dhi øt Cøøl na läwï kare na tïmï ni ïïna nyeya. 'Ba ennø, Wuuö Jwøk nyec marï anø cïbe jï wäädï ma Abëcëlöm. 'Ba ka adïëri møn, ï ränynyö ennø, kiper ïïna dïnääy.»

⁹Kanyøgønø, Abicay o Dheruya aköö jï nyeya, na «?Aŋø, nyen caal gwök mo othøw en jany ï aperŋø? Wëëk a naa cøøa baŋe kaace, nee wïïe ŋula wøk.»

¹⁰'Ba aløk nyeya jï Abicay ni kööe, «?Nyie wäät Dheruya, agïnaŋø noo tïïa ki uuni nø? Këël eni doo jädö, kanymør caana Wuuö Jwøki jïre, ni ‹Ci jany Deebit.› ?Aŋø, aŋa noo köö ki eni, ni ‹?Ï tïmmï ŋø ki gïn?› »

¹¹'Ba Deebit acäŋ köö jï Abicay ki jï jø kööre moe bëët, ni «Neennu, këël wääda na käl dëëra kiree manynya man raany jwïëya. ?A nyï tuuŋ Benjamen man, kääŋe ki man tïïe ki gïrpiny dëëra nidïï? Wiiu eni kare nee jäde; kanymør caana Wuuö Jwøki jïre.

¹²Kanymør thuwø Wuuö Jwøk caannø man caan a ki gø en di neenø ni tïïe ki gïn mo beer jïra na kar ajaany man jany aani ki gø dïcäŋi en.»

¹³Kanyøgønø, Deebit ki jiye gena put aay; 'ba Cimiy aput aay ni cäädhi ka deŋ kïdi ni dïët ki Deebit. 'Ba eni cäädhi ni janynya Deebit, ni di thööyö ki kïte, ni di jørø ki ŋøøm.

¹⁴Køøre nyeya ki jiy bëët moa cäädhö ki eni, gena pïï kanya cige yie ni geno ööl. Køøre Deebit dëëre ajwöme kaace.

¹⁵'Ba Abëcëlöm ki jø Icriel bëët moa näk ee käl dëëre, gena pïï Jerucalem. 'Ba kar kaagø, Akithöpël ena dï jøøgø thuwø.

¹⁶'Ba kanya ö nyawat Deebiti ma Ucay nyï Arki na ö baŋ Abëcëlöm, ena köö jï Abëcëlöm, ni «Nyeya puta bëëtö na bäre bäre!»

¹⁷'Ba Abëcëlöm aköö jï Ucay, «?Aŋø, beeye mëër man wø nyoothï jï nyawadu enø obëëde? ?Aperŋø na ba aayï ki nyawadu?»

¹⁸'Ba Ucay aköö jï Abëcëlöm, ni «Ba løny. Kiper ŋat mo ojier Wuuö Jwøki, ki jøøi, këël jø Icriel bëët, beeye ŋat ena løøe, ni puta bëëtö ki eni.

¹⁹?A aani, aana da tïnynya ŋa cøøn? ?Aŋø, paa o nyeya mara cøøn na da tïnynyö? Kaawat mana tïnynya wäru, ennø, a puta bëëtö ki ïïni thuwø.»

²⁰'Ba kar kaagø, Abëcëlöm acäänö ka Akithöpël kiper bëët paac ni kööe, na «?Agïnaŋø noo tïïø ennø? Caan acaara marï.»

²¹'Ba Akithöpël aköö jï Abëcëlöm, ni «Ci baŋ määr wäru, moa no odööŋ ni ge koora paac, ni buudï ki geni; køøre wïny jø Icrielli bëët wïnynyö ni ïïni riï iï nø tïïc kaamar gïn mo ŋwäänynye raac jï wäru. Køøre nø, jiy moi bëët ni bëëdö ki ïïni en, ge puta tëënnö thuwø.»

²²Kanyøgønø, oduŋkaara aput maa piny jï Abëcëlöm wï øtø maal, ni ö Abëcëlömmi ni ci baŋ määr wänni ni buude ki geni ni nëënö jï jø Icriel bëët.

²³'Ba ki yïth nïrögø, acaare mo wø cïp Akithöpëlli di jïëö ni nëëni keda luubö mo opëënynyö baŋ Jwøk. 'Ba Deebit ki wääde ma Abëcëlöm ge ŋäätha acaare mo Akithöpël.