Read anuak 2 Camiel 20 Bible Online

2 Camiel 20 - anuak bible

2 Camiel 20

¹'Ba da nyen mo wïïe raac mo nut Gëlgela kaace mo nyeŋŋe Cïïba o Bëkri nyï Benjamen. Eni tuuŋ akoodhe ni kööe, «U jø Icriel bëët, ŋati man nø døø paare. Kiper øøni ø ba en ri Deebit, ni øøni bäŋ kurø dëëre, eni na o Jeci enø, kiper eni paa tuuŋø.»

²Kanyøgønø, jø Icriel bëët køør Deebit aputge wec ki caath, ni tïme ni ge caatha køør Cïïba o Bëkri; 'ba jø tuuŋ Juuda keerge, gena put bëëtö ri nyeya marge ma Deebit, ki mana tïŋge ki Naam Jördan këël mana pïïcge Jerucalem.

³Køøre nyeya ma Deebit apïï paare Jerucalem, ni lwør määre karge paari na näk ee wiiø nee paac koorge, ni tïïc ge nee ge koor, ni ge di caamø; 'ba nyeya kär ci baŋge na mään. Kanyøgønø, gena put bëëtö ni bäŋ dïcwøø mo ci baŋge këël mana päŋ nïr thuunhnhi moge, ni ge bëëdö kaamar määr thuunhnhi.

⁴Køøre nyeya aköö jï Amaaca, ni «Ï cøø ni cwølï jø tuuŋ Juuda jïra ki yïth nïne adäk keerge. 'Ba ïïni ki dëërï thuwø, ï doo nut kany.»

⁵Kanyøgønø, Amaaca aay nee jø tuuŋ Juuda cwøle; 'ba ena ruu ni kaal nïne moa no okwaan nyeya jïre.

⁶'Ba Deebit aköö jï Abicay, ni «Neenï, ennø Cïïba o Bëkri manynya man tïïe ki gïn mo leth dëëtø ni kaala mana tïïc Abëcëlömmi. Lwør jø leny 'moa, a na nyeya marï, ni reŋŋï køør Cïïba, kiper nee ba jïte ki päänye moa no ogeerø ni teek ni tïme ni ba løny mak jïïø.»

⁷Kanyøgønø, Abicay aput aay ki jø leny moa käär Jöapi, ki jø leny mo wø koor nyeya, ni beege jø Kelita ki jø Pelita, këël jø leny bëët moa teek. 'Ba gena put tïŋŋö ki Jerucalem ni aacge ni ge ŋwieya køør Cïïba o Bëkri.

⁸'Ba kanya enge ri kïnna dwøŋ na en Gibien, Amaaca aputge joot ni cäänhnha baŋge. 'Ba kar kaagø, Jöap jap leny ee twöö dëëre, no opëëllö ee twöö ri kaw piere ni ena yi købe. 'Ba kanya cääth nyïme, opëëllö apäth piny ki yi køp, ni kwany gø.

⁹Kanyøgønø, Jöap, Amaaca amäädhe, ni kööe, «?Dëël jööt nø, omara?» Ni ö Jöapi ni tïme ni keda nuuma dha Amaaca ni mak jïëc tïï gø.

¹⁰'Ba kar kaagø, Amaaca bäŋ gïn ee caarø kiper opëëllö mana en cer Jöap. Ni ö Jöapi ni put Amaaca cwøp ko opëëllö ki yi gø, ni 'näga gø, ni put cïïre øc piny yïth ŋøøm. 'Ba Jöap, Amaaca käre cäŋ cwøpø këët. Køøre Jöap ki coki ma Abicay gena put pöödhö ni ge ŋwieya køør Cïïba o Bëkri.

¹¹'Ba da nyen ma dhaanh Jöap mo odööŋ ni cuŋŋö bäät Amaaca ni cäänö ni dwøre ee tïŋ maal ni kööe, «Ni näk mo da ŋat mo yie met ki Jöap ni manynya man bëëde na dhaanh Deebit, beerra man caath køør Jöap.»

¹²'Ba Amaaca bäädö dï jöö kaagø ni dëëre ogääbö ki remø. 'Ba kanya ö nyenøgø na joot jiy ni ge poot cuŋŋö kaagø, Amaaca aput daak dï jöö, ni jwaa gø thääŋ jöö ni rïëp gø ka abïï.

¹³'Ba kanya nø paany dëër Amaaca dï jöö, jiy bëët moa cuŋŋö kaagø aput läp køør Jöap, ni ge ŋwieya køør Cïïba o Bëkri.

¹⁴'Ba Cïïba onø aay ni caath bäät wïth tuŋi mo jø Icriel bëët, ni pïïe Abël-Bëëth-Maika ni cøra dï jiy bëët moa bëëdö Bërët; ni ö jø paanøgø ni putge rege cooŋ ni tïmge ni ge caatha køøre thuwø.

¹⁵'Ba Jöap ki jø leny bëët, Cïïba aputge maa Abël-Bëëth-Maika, ni putge deŋ kiir wïr, ni tïïge ri kiir ki gïrpiny man ethge ki gø. Ni ö jø lenynyi bëët moa cäädhö ki Jöap ni putge tägö ki koony tier kiir nee pädhe.

¹⁶Køøre dhaagø mo waŋe riek acwötö ki yi kiir, ni kööe, «Nyie, nyie, wïnynyu gïn. Akwaya uuni, caannu jï Jöap nee ö kany naa cääna ki gø.»

¹⁷Kanyøgønø, Jöap aput nyiik buut kanya dïët ki dhaagø manøgø, ni kö dhaagø manøgø, «?Beeye ï Jöap?» Ni kö Jöapi, «Yaa, beeye aani.» Køøre ena köö jï Jöap, ni «Cek ïthï ki dwøra, a na dhaanhnhï.» Ni kö Jöapi, ni «Ïtha yaa ciiø.»

¹⁸Køøre dhaagø manøgø acäänö ni kööe, na «Acääŋŋe jiy wø köö, ni ‹Cou baŋ jø Abël ni pëënynyu geni ka acaara mo beer›, 'ba acaara maneca wø puta thur kare.

¹⁹Aani, aana dhaanhø aciel røk jø bëëdö yi pääny man en, ni wa wø manynya bëët-mëër ni waano ŋäädhö dï Icriel. 'Ba ennø, ï manynya man raanynyï pääny man ni caal mïïö dï Icriel en. ?Aŋø, jic Wuuö Jwøk putï ka thöör ennø møn?»

²⁰'Ba Jöap mare aløøe ni kööe, ni «Beerra man tïm kara ni bäär ka acaara manøgø. A ba ööi kiper nee jiy thööra, wala nee pääny raanynya.

²¹Manøgø paa tier gïna ööa kipere. 'Ba nyen ma nyï paac aciel røk mïëya en bäät kïte na en kur jø tuuŋ Ipariem, mo nyeŋŋe Cïïba o Bëkri, atïmö ni gëëmö ki nyeya ma Deebit. Cïpu eni keere jïra. Køøre nø, a puta tïŋŋö ni wiia pääny man.» Kanyøgønø, dhaagø manøgø aköö jï Jöap, ni «Ka adïëri møn, wïïe lëëŋa baŋï ki bäät kiir.»

²²Køøre dhaagø manøgø aay ni cïpe ka acaara mo beer jï jø poge bëët. 'Ba geni wï Cïïba o Bëkri aputge ŋul wøk ni leeŋge gø baŋ Jöap. Kanyøgønø, Jöap tuuŋ aput tïïc nee kooth, ni ö jø lenynyi ni putge keethø buut kiir manøgø, ni ö ŋati man nø ni døø paare. Køøre Jöap thuwø adøø Jerucalem baŋ nyeya.

²³'Ba Jöap beeye kwääy lwaa leny bäre mar jø leny mo jø Icriel, ni Benaya o Jööda beeye kwääy lwaak mar jø leny mo wø koor nyeya, ni beege jø Kelita ki jø Pelita.

²⁴'Ba Adöram beeye ŋata no ocuumö na wïth jø wø tïïö ni mak ka teek, ni Jøcapat wär Akilut beeye nyikugö.

²⁵'Ba Ceraya beeye ŋat wø göör luup akwöma piny, ni Dhadök ka Abiethaar beege dïlämme moa døøŋŋø.

²⁶'Ba Ira nyï Jayer ena dïlämi thuwø mar Deebit.