Read anuak 2 Camiel 21 Bible Online

2 Camiel 21 - anuak bible

2 Camiel 21

¹'Ba kanya bëët Deebiti na nyeya, da käc ma atägö ni bëëde ki cwiiri adäk. Køøre Deebit alämö ni pëëny Wuuö Jwøk kiper käc manøgø. 'Ba aløk Wuuö Jwøki ni kööe, ni «Cøøl ki dhi øde bäätge da ajäl kwör rem jiy; kiper Cøøl jø Gibien anääe.»

²'Ba jø Gibien ge paa jø Icriel; gena jø Amör moa no odööŋ ni kwøw. 'Ba kar kaace, jø Icriel geno tudö ki luubö ki jø Gibien nee jø Gibien ba 'näkge. 'Ba Cøøl apääre ki man dïïr wïthge ki køør këëny mana en cwïnye ki geni, ni ge näänne jø Icriel ki jø tuuŋ Juuda.

³Kanyøgønø, nyeya ma Deebit jø Gibien aput cwøl ni cääne ki geni ni kööe, na «Agïnaŋø noo tïïa jïïu ennø? ?Agïne noo wïïra kwör ki gø nø, nee tïme ni løny jïïu ki man gwïëthu jic Wuuö Jwøk, ni beege jø Icriel?»

⁴'Ba jø Gibien aköö jï nyeya, ni «Waani, bäŋ gïn manywa ri warkey wala gwel-bïrö mar Cøøl wala mar jø dhi øde, ni ba løny jïwa ki man 'näkwa ki dhaanhø røk jø Icriel.» 'Ba nyeya aköö, «Caannu gïna manynyu jaak; tïïa tïïö jïïu.»

⁵Kanyøgønø, gena köö jï nyeya, ni «Ŋata many waani nee wa thööre na dïïr wïthwa, nee bäŋe dhaanhø mo dööŋ ni kwøw røkwa dï Icriel,

⁶beerra man ö cwøw abïriiø røk jø dhi øde ni wëëgï waani, nee ge lïërwa nyïm Wuuö Jwøk yi Giba, pääny mar Cøøl, ni beeye Cøøl na näk ojier Wuuö Jwøki na nyeya.» Køøre nyeya aköö jïge, ni «Aani, ge cïba cïbö jïïu.»

⁷'Ba nyeya, Mepiböcëth o Jönathan nyïkwaar Cøøl awiie ni kwøw, kiper kööŋ mana kööŋe ki gø nyïm Wuuö Jwøk na en yïthakicge ki Jönathan o Cøøl.

⁸Kanyøgønø, nyeya wäät Ricpa nyi Aya karge riet, na nywølge ki Cøøl, ni beege Armöni ki Mepiböcëth mør, ki wäät Mërap nyi Cøøl karge bïï, na nywølge ka Adariel o Bardhilay nyï Meyöla, aput lwør.

⁹Ni ö nyeya ni cïp ge ceŋ jø Gibien, ni ö jø Gibienni ni lïërge geni bäät kïdi nyïm Wuuö Jwøk. Kanyøgønø, jøøgø na abïriiø yøø, gena put thøø na aciel; 'ba geni, ge 'näk ka kany wø täk beek wø cwøl ni gäbci[10] ki kac yie.

¹⁰'Ba Ricpa nyi Aya keeca alwøre, ni aae ki gø ni peeth gø piny bäät kïdi kanya en dëët jiy yie, ni bëëde ni koora geni, nee bäŋe wec maal mo pï bäätge ki waŋcäŋ wala lääc paap mo ööa baŋge ki wäär. 'Ba koor tääe ka dïcäŋ mana täk kaci yie këël mana päth køthi.

¹¹'Ba gïna tïïc cï Cøølli ma Ricpa nyi Aya, acaan jï Deebit.

¹²Køøre Deebit aa baŋ jø Jabic-Gelät ni lwør cuu mo Cøøl ki mo Jönathan o Cøøl na no okwøŋ jø Jabic-Geläti kwal ki piny mëëth bura mar päänya cwøl ni Bëëth-Can, ni beeye kanya ö jø Pilitinni na lïërge geni yie dïcäŋa ö jø Pilitinni na 'näkge Cøøl bäät Kïn Gilböa.

¹³Kanyøgønø, Deebit cuu mo Cøøl ki mo Jönathan o Cøøl aput kälö ki kaace; ni cooŋge cuu jiy moa na abïriiø na no olïërö, ni koonyge ge.

¹⁴'Ba cuu mo Cøøl ki mo Jönathan o Cøøl akïthge yi bwöc Kic wää Cøølli pääny mana cwøl ni Cëëla po jø tuuŋ Benjamen. 'Ba luup bëët moa ö nyeya na kööm geni ki ge aputge tïïc. Køøre lam mana lam jiyi kiper paac aput Jwøki løk.

¹⁵'Ba kanya ö jø Pilitinni na cäŋge këëdö ki jø Icriel, Deebit aci baŋ leny ni cäädhi ka jø leny moe. 'Ba kanya këëtge ki jø Pilitin, Deebit aööl.

¹⁶Køøre Icbi-Banöp, nyen mo käla ri tuuŋ jøøa dëëtge døøŋŋø, mo otööyö ko opëëllö mo nyään, mo käädö ki tøŋ mo tïïc ka nywïënyö ma jwïël mo peege beeye rumme ma dïpe adäk ki yi rumi mana cwøl ni cekel,[11] atïmö ni manynya man 'näk Deebit.

¹⁷'Ba Abicay o Dheruya, Deebit aput piem cer nyï Pilitin manøgø, ni gøøc gø ni put gø 'näk. Køøre jø leny mo Deebit aput kööŋ jï Deebit, ni köge, ni «Ïïni, ï na nyeya en, ï ba cäädhi baŋ leny këët ki waani, kiper niï ba thøwï, kiper ïïna tar jï jø Icriel.»

¹⁸'Ba na tïme na køøre cään, leny mør acäŋ këëllö ki jø Pilitin Gøp. Kanyøgønø, Cibekay nyï Uca, nyen mo nyeŋŋe cwøl ni Caap mo käla ri tuuŋ jøøa dëëtge døøŋŋø aput 'näk.

¹⁹Ni ö lenynyi mør ni cäŋi këëllö ki jø Pilitin Gøp kaace thuwø. 'Ba El-Anan o Jayer nyï Bethelem, Göliat nyï Gëth, nyen mo thiir tøŋ mare caala athøra, anääe.

²⁰Køøre leny mør acäŋ këëllö Gëth; 'ba da dhaanhø kaaca mo bäär døc ni dëëre dwøŋ, mo lweet ceŋŋe abïciel abïciel ni lweet tiete thuwø abïciel abïciel, ni lweete ge bëët beege pïërariiø kurŋween; 'ba eni thuwø nywöli ka ri tuuŋ jøøa bäyö døc ni dëëtge døøŋŋø.

²¹'Ba kanya ö nyenøgø na ŋwöe bäät jø Icriel, Jönathan o Cimiy, ni beeye Cimiy cöök Deebiti, nyenøgø anääe.

²²'Ba jø Pilitin moøgø bëët na aŋween yøø, ge nywöli ka ri tuuŋ jøøa bäyö døc ni dëëtge døøŋŋø na en Gëth, 'ba geni, gena 'näk Deebiti ki jø leny moe.