Read anuak 2 Camiel 24 Bible Online

2 Camiel 24 - anuak bible

2 Camiel 24

¹'Ba Wuuö Jwøk acäŋ wëër døc ki jø Icriel, ni tïïc Deebit nee tïïe ki gïn mo duunnö ki gïn mo raac bäätge. Ni kööe jï Deebit, ni «Ciï ni kwaanï jø Icriel ki tuuŋge ma jø tuuŋ Juuda.»

²Køøre nyeya ma Deebit aköö jï Jöap, kwääy lwaa leny na en buute, ni «Ennø, ï cøø ni caathï bäät wïth tuŋi mo jø Icriel bëët, ki mano täge ki Daan këël mano këët Bëërcïïba, ni kwaanï jø leny, kiper nee kwäänge ŋääa.»

³'Ba Jöap aköö jï nyeya, ni «Beerra man ö Wuuö Jwøki na näk Jwøï ni meet jiyï kwöre ma dïpa ni kaala moi ni nut ii, ni putï gø joot ki waŋï, ï na nyeya. ?'Ba ennø, Awuuö, ï na nyeya mara, jiy manynyï gø kiper ŋø nee ge kwaan?»

⁴'Ba luum nyeya atïmö ni teek bäät Jöap ki kwääc lwaae mo leny. Kanyøgønø, Jöap ki kwääc lwaae mo leny gena put ö wøk ki baŋ nyeya, ni putge aay ni ge cøøa kuna kwaange jø Icriel.

⁵'Ba gena tïŋŋö ni ŋølge Naam Jördan, ni tïïcge twïër marge buut Aröör, pääny mana en dï gool mana en ŋööm jø tuuŋ Gaat. Køøre gena pööth Jadher.

⁶Ni pööthge Gelät ki Kadëc na en ŋööm jø Këth, ni pööthge Daan Jaan, ni løøge rege bäät caam, ni cige Caydan jï løø kur pänh-cäŋ.

⁷Ni cige pääny mana cwøl ni Tayar, na näk ogeerø ni teek, ni cige yïth päänye mo jø Ëwi ki päänye mo jø Keenan bëët, këël mana putge pïï Bëërcïïba na en Juuda jï kuna näk da tier-piny.

⁸'Ba kanya nø caathge dï ŋöömö bäre, gena duu Jerucalem køør dwäde abïŋween ki nïne ma pïërariiø.

⁹'Ba Jöap kwään jiy moa kwaane acïbe jï nyeya ma Deebit; ni jiy moa teek na näk leny løny jïge dï Icriel beege jiy ma kume ma dïpe abära; 'ba jø tuuŋ Juuda beege jiy ma kume ma dïpe abïïc.

¹⁰Køøre Deebit cwïnye apädhö ki køør mana nø kwaan jiy. Kanyøgønø, Deebit alämö jï Wuuö Jwøk ni kööe, «Wui Wuuö Jwøk, aana nø bääyö døc ki køør gïna tïïa. 'Ba ennø, beerra man wëënnï raay 'moa, a na dhaanhnhï, kiper aani gïnögø atïïa ni wïïa kära caarø.»

¹¹'Ba kanya ö Deebiti maal ka amöölla, dwør Wuuö Jwøk onø ö bäät nyikuŋ Jwøk ma Gaat,[13] ŋat wø car jammi jï Deebit ki køør man wø nyooth Jwøki jïre, ni kööe,

¹²ni «Ci baŋ Deebit ni caanï luumma jïre, ni kööï ni man beeye dwør Wuuö Jwøk, ena köö, ni ‹Aani, luup adäk cïba nyïmï, niï jëëtï ki luubö aciel rege, mo tïïa tïïö dëërï.› »

¹³Kanyøgønø, Gaat aö baŋ Deebit ni caan luummögø jï Deebit, ni kööe jïgø, «?A luubö mane ni beer røk moi? ?Beerra man ö käci paarï ki cwiiri adäk? ?Wala beerra man ö nyïïmän moï ni ŋwiecge køøru ki dwäde adäk nou rïïŋö? ?Wala beerra man ö täwi mo leth døc ni ö bäätu yi ŋöömmu ki nïne adäk? Ennø, cädï ni jierï gïno døøa ki gø jï Jwøk na jääŋ aani.»

¹⁴Kanyøgønø, Deebit aköö jï Gaat, ni «Gïïögø bëët duua bëëtö mo teek kipera. Beerra man tïmwa ni wa pätha cer Wuuö Jwøk, kiper mëër mare dwøŋ; 'ba kär wa tïmö ni wa pätha cer dhaanhø.»

¹⁵Kanyøgønø, Wuuö Jwøk täw mo leth døc aput jääŋŋö bäät jø Icriel ki mana täge ka amöölla maneca këël mana pääŋ kanya many Wuuö Jwøki; ni ö jø Icrielli ma kume ma pïërabïriiø ni putge thøø, ki mana täge ki Daan këël mana këët Bëërcïïba.

¹⁶'Ba kanya ö nyïïatwiel maalli na rwiec cere nee Jerucalem raanynye, Wuuö Jwøk cwïnye apädhö kiper gïna leth na tägö dëët jiy, ni kööe jï nyïïatwiel maal mana 'näk jiy, «Manøgø rømø nø. Ennø, jook cerï nø.» 'Ba kar kaagø, nyïïatwiel maal mar Wuuö Jwøk ena buut laara mar Arawna nyï Jeebuc.

¹⁷'Ba kanya ö Deebiti na joot nyïïatwiel maal mana 'näk jiy, ena lämö jï Wuuö Jwøk ni kööe, ni «Ka adïëri møn, beeye aani na bääyö, na tïïc gïn mo raac. ?'Ba jiy moi ni caal rööm ii, agïnaŋø na baacge? Wui Wuuö Jwøk, beerra man tïm cerï ni ena dëëra ki jø dhi øt wära.»

¹⁸Kanyøgønø, Gaat aput ö baŋ Deebit dïcäŋögø ni kööe jïgø, ni «Ciï ni tïï jï Wuuö Jwøk ki gïn wø cïp olämme bääte kaace yi laara mar Arawna nyï Jeebuc.»

¹⁹Køøre Deebit aput aay ki køør mana caan Gaati jïre, kaawat mana caani ya Wuuö Jwøki.

²⁰'Ba Arawna alwïthö piny ni joot nyeya ma Deebit ki jø kööre moe ni ge ŋunna jï kuna näk da eni; ni ö Arawna ni aa wøk baŋ nyeya ni këël cøŋŋe piny ni kuul wïïe piny ni määtha gø.

²¹Køøre Arawna aköö, «?Wui nyeya, u öömu ŋø baŋa?» 'Ba aløk Deebiti, na «A ööi kaper nee laara marï ŋeea, kiper naa tïïa jï Wuuö Jwøk ki gïn wø cïp olämme bääte, kiper nee täwa leth na nø tägö ki køør ajäl Jwøk nee aae bäät jiy.»

²²'Ba Arawna aköö jï Deebit, «Wui Awuuö, ï na nyeya, beerra man kälï gïna manynyï jaak, ni cïpï gø jï Wuuö Jwøk. Neenï, dhäk mo løny jïrï ki man cïpï ge no olämi man wø waaŋ bäre nut yøø. Këël jer dïn ki jer puur mo wø rïï ŋut dhäk yøøgø thuwø. Løny jïrï ki man wääŋï ki geni.

²³Wui nyeya, jammi bëët yøønø, acïba jïrï.» 'Ba Arawna acäŋ köö jï nyeya, ni «Beerra man ö Wuuö Jwøki ni wëëk gïna manynyï thur kare.»

²⁴'Ba nyeya aköö jï Arawna, ni «Ba løny; japï ba käla ki wat jaak. Ka adïëri møn, gïïögø ŋeea ŋeeø baŋï ki gwel, kiper aani a ba cïpi jï Wuuö Jwøk, Jwøk mara, ko olämme mo wø waaŋ bäre mo bäŋ gïn mo yaa coolø kiperge.» Kanyøgønø, Deebit laara ki dhäk aput ŋeew ki gwet-bïrö ma pïërabïïc.

²⁵Kanyøgønø, Deebit aput tïïö jï Wuuö Jwøk kaace ki gïn wø cïp olämme bääte, ni put cïpö ko olämme mo wø waaŋ bäre, ko olämme mo wø duunni ki mëër. Køøre nø, Wuuö Jwøk lam mar Deebit, mana läme ki gø kiper paac, aløøe, ni ö täwa leth na tägö bäät jø Icriel ki køør ajäl Jwøk ni put cuŋŋö.