Read anuak 2 Camiel 4 Bible Online

2 Camiel 4 - anuak bible

2 Camiel 4

¹'Ba kanya ö Icböcëthi o Cøøl na wïny gø na Abinër anø thøø Keeprön, eni bääte aput pädhö, ni ö jø Icrielli bëët ni jït wïthge ko okiera.

²'Ba Icböcëth o Cøøl jïre da jiy ariiø mo gena kwääc lwaae mo dhøgi mo leny. Ni nyeŋ dhaanhø aciel beeye Baanaa ni nyeŋ dhaanhø maya beeye Rëkap. 'Ba jagøgø beege wäät Rimön nyï Bëëröth na käl ri jø tuuŋ Benjamen, kiper Bëëröth okwaan kur jø tuuŋ Benjamen.

³'Ba jø Bëëröth geno reŋ Gitayim ni bëëtge kunece ni gena wëëlle këël dïcäŋi en.

⁴'Ba kar kaagø, Jönathan o Cøøl, da wääde ma ŋwøl. 'Ba tier ŋöödö mare beeye en. Kanya ö waac thøw Cøølli ki wääde ma Jönathan na tägö Jedhriel na wïnye, o Jönathan manøgø cwiiye oløny na abïïc. 'Ba kanya wïny waac moøgø, ŋata pïr gø, nyilaarøgø alwøre ni reŋge ki gø. 'Ba gïna tägö, kanya reŋge ni eni läädö, nyilaal manøgø apädhö ni put tïmö na ŋwøl. 'Ba nyeŋ nyilaarøgø beeye Mepiböcëth.

⁵'Ba Rëkap ki Baanaa, wäät Rimön nyï Bëëröth, gena aay ni pïïcge po Icböcëth ki dhöör ni cäŋ kwaar. 'Ba kar kaagø, Icböcëth ree ee jwömö.

⁶Køøre gena døny dï øtø kede ge ummö ki beel, ni putge Icböcëth cwøp ki yi gø; køøre Rëkap ki coki ma Baanaa gena put reeŋø.

⁷'Ba kanya ö Rëkapi ki Baanaa na dønyge yi øt Icböcëth, Icböcëth obutö bäät pëëm yi øt niine mare, ni putge Icböcëth cööbö ni 'näkge gø, ni ŋulge wï gø wøk. Køøre wï gø aputge lwør ni aacge, ni cääthge ki yi wäär bäre ni ge cøra waŋjöör dï goor Jördan ni wø cwøl na Araaba.

⁸Kanyøgønø, wï Icböcëth akälge Keeprön baŋ Deebit, ni köge jï nyeya ma Deebit, ni «Neenï, Icböcëth o Cøøl, nyimännï, ŋata many jwïëyï nee raanynye, wïïe beeye en. 'Ba dïcäŋi Wuuö Jwøk kwör marï, ï na nyeya marwa, atïïe nee cool dëër Cøøl ki nyïïkwaaye.»

⁹'Ba aløk Deebiti jï Rëkap ki coki ma Baanaa, wäät Rimön nyï Bëëröth, ni kööe jïge, «Ŋëët Wuuö Jwøk Jwøa kwøw na køny aani yïth gïïa leth bëët,

¹⁰neennu, kar kaaca da dhaanhø ma aöö ni wäänynya aani ni kööe, ni ‹Neenï, Cøøl athøw›, ni ki jïre ni eni käla waac mo beer. 'Ba ŋatøca amaa ni nääa gø Ciklak, ni beeye gïna ŋada gø ki gø na kar waac mare.

¹¹Ennø møn, u na wïthu reyø, dhaanhø mo bëëtö mare beer anø 'nägu yi øde bäät pëëm mare. ?Aŋø, gïno tïïa dëëtu ba tïmö ni kadha eni ki mana tïïa dëër ŋata wääny aani? Aani kwör rem Icböcëth coola coolø dëëtu ni dïïra wïthu bäät pinyi en.»

¹²Kanyøgønø, Deebit jø leny moe aput köömmö, ni ö jagøgø ni putge Rëkap ki Baanaa 'näk ni ŋulge ceŋge ki tietge wøk, ni lïërge dëëtge buut puul na en Keeprön. 'Ba wï Icböcëth alwørge ni kïthge gø yi bwöc Abinër na en Keeprön.