Read anuak 2 Camiel 5 Bible Online

2 Camiel 5 - anuak bible

2 Camiel 5

¹Køøre wïth tuŋi bëët mo jø Icriel aö baŋ Deebit kanya bëëde yie Keeprön ni köge, ni «Ka adïëri møn, ïïna dhaanhø ma rem dëëtwa, niï käla dëëtwa.

²Dïkwøŋ kanya bëët Cøølli na nyeya marwa, beeye ïïni na bwøth jø Icriel kany wø näk ri leny. 'Ba Wuuö Jwøk aköö jïrï, ni ‹Ï doo bëëdö ni ïïna dïkwääy mar jiya ma jø Icriel, ni tïmï ni ïïna wïth jø Icriel.› »

³Kanyøgønø, jø døøk Icriel bëët gena ö baŋ nyeya ma Deebit kanya en yie Keeprön, ni ö nyeya ni tude ki luubö ki geni Keeprön kaagø nyïm Wuuö Jwøk; ni ö geni ni thïïmge wï Deebit ki maaw ni ge røønya gø na nyeya mar jø Icriel bëët.

⁴'Ba kanya ö Deebiti na røønyi na nyeya, cwiiye oløny na pïëradäk, ni bëëde na nyeya ki cwiiri ma pïëraŋween.

⁵Ni cwiiri moa beet Deebiti ni ena nyeya mar jø tuuŋ Juuda Keeprön, beege cwiiri abïriiø ki dwäde abïciel, ni cwiiri moa beede Jerucalem ni ena nyeya mar jø Icriel ki jø tuuŋge ma jø tuuŋ Juuda bëët, beege cwiiri ma pïëradäk kurdäk.

⁶'Ba nyeya ma Deebit ki jø leny moe gena ci Jerucalem baŋ leny ki jø Jeebuc, na bëëdö yi ŋöömö manøgø. 'Ba jø Jeebuc aköö jï Deebit, ni «Ba løny jïrï ki man dunynyï yi kiir kany; këël cööye ki ŋööte jïge da teek ki man riemge ïïni,» ni köge, ni «Deebit ba duny kany na bäre.»

⁷'Ba Deebit, kanya näk kar gwøk røk mar paanøgø na en bäät Kïn Dhayan aput mak; ni beeye päänya put cwøl na Pääny Deebit.

⁸'Ba dïcäŋögø Deebit aköö, ni «Ŋat mo yie met ki man 'näk jø Jeebuc, beerra man døny kar gwøk røk marge ki jöör pïï, ni 'näk nyïïmänna, ni beege jøøa køp ni cööye ki ŋööte.» Kiper manøgønø akøp, ni «Cwør wala ŋwøl ba doo dunynya yi øtø.»

⁹Køøre Deebit abëëdö kanya näk kar gwøk røk, ni cwøl gø ni Pääny Deebit. Ni ö Deebiti ni put pääny manøgø bäre geer ni teek, ni tägi ki kanya no othørø ni wø cwøl ni Milø.

¹⁰'Ba teek mar Deebit aput bëëtö ni cäätha maal, kiper Wuuö Jwøk, Jwø wïth jammi bëët, bëëdö ka eni.

¹¹Køøre Kiram nyeny Tayar ajääk baŋ Deebit ki jiy ni ge käädö ki jer øtø moa perge leth, ki jiy ma dïjëëth opämi ki jø wø gëëdö ki kïte; ni ö jøøgø ni gëëtge ki øtø jï Deebit.

¹²'Ba aput Deebiti ŋäc ni beeye Wuuö Jwøk na këël tier nyec mare piny, nee put bëëte na nyeya mar jø Icriel; ni ŋäc gø thuwø ni beeye Wuuö Jwøk na tïŋ nyec mare maal kiper jiye ma jø Icriel.

¹³'Ba ki køør mana ö Deebiti na nø wec Keeprön ni ö Jerucalem, ena cäŋ jïtö ki mään møøk; ni ö Deebiti ni jïte ko obwöre møøk ma cwøw ki mään.

¹⁴'Ba nyeŋ obwöre moa nywøl Deebiti kanya bëëde Jerucalem beege Cimia, ki Cöbap, ki Nathan, ki Cølöman,

¹⁵ki Ibar, ki Elicua, ki Napëk, ki Japia,

¹⁶ki Elicama, ki Eliada, ki Elipelet.

¹⁷'Ba kanya wïnynyi jø Pilitinni ni Deebit onø røøny na nyeya mar jø Icriel, jø leny mo jø Pilitin bëët atïŋŋö ni cige kuna määnyge baŋ Deebit; 'ba kanya ö Deebiti na wïny gø, ena cøø ni mak kanya näk kar gwøk røk.

¹⁸'Ba jø leny mo jø Pilitin apïï ni putge dï Goor Rapayim gääbö.

¹⁹Køøre Deebit Wuuö Jwøk apëënynye ni kööe, «?Aŋø, cøøa baŋ leny baŋ jø Pilitin? ?A ni näk mo aano ci baŋge, ge cïbï cera?» 'Ba Wuuö Jwøk aköö jï Deebit, ni «Ciï; ka adïëri møn, jø Pilitin ge cïba cerï.»

²⁰Kanyøgønø, Deebit aput ci kanya caae ni Baal-Peradhim, ni put jø Pilitin böötö kaace; ni kööe, ni «Wuuö Jwøk nyïïmän 'moa abööte nyïma, ni caala pänh jwïëö kany wø räänye.» Kiper manøgønø, Deebit nyeŋ kaace aput cak ni Baal-Peradhim.

²¹'Ba jø Pilitin juu moge adööŋ piny kaace, ni ö Deebiti ki jø leny moe ni kälge juu moøgø.

²²'Ba jø leny mo jø Pilitin acäŋ duuö ni cäŋge dï Goor Rapayim gääbö.

²³'Ba kanya ö Deebiti na pëëny Wuuö Jwøk, Wuuö Jwøk aköö, ni «Ïïni, ï ba doo cøøa baŋge ni tiir jaak; 'ba ge diï ŋøønya piny ni cääthï bäätge kanya enge yie, deŋ lul.

²⁴'Ba kanyo tïme ni da dwøl mo caala tiet jø leny mo wïnynyï wïnynyö ki bäät lul, ge diï puta tuk, kiper nyootha gø ni Wuuö Jwøk onø ci nyïmmu ki man këëde ki jø leny mo jø Pilitin.»

²⁵Køøre gïnögø aput Deebiti tïïc na kare, kaawat mana ö Wuuö Jwøki na kööm eni, ni put jø leny mo jø Pilitin 'näk ki mana täge ki Gëba këël mana këët Gëdher.