Read anuak 2 Camiel 6 Bible Online

2 Camiel 6 - anuak bible

2 Camiel 6

¹'Ba Deebit jiy bëët moa no ojierø røk jø Icriel acäŋ cooŋ kanya aciel, ni beege jiy ma kume ma pïëradäk.

²Køøre Deebit aö maal ni tïŋŋe ki jiy bëët moa en buute ni ge cøøa Baala na en Juuda[3] na acanduk mar Jwøk nee kälge, ni beeye acanduk mana no ocaa ri nyeŋ Wuuö Jwøk, eni na wïth jammi bëët, ni wø nyooth ajiem nyec mare ki yïthakic gïïa no otïïö ni caala nyïïatwiet maal moa cwøl ni kirubël ni wø en bäät acanduk manøgø.

³'Ba gena öö ni lwørge acanduk mar Jwøk po Abinadap na en bäät thuur, ni cïpge acanduk bäät jääy mo nyään man wø tut dhäki, nee käärge ki bääte; ni ö Udha ka Akïïö, ni beege wäät Abinadap, ni bwøthge maal nyïm jääy.

⁴Ni lwørge jääy manøgø ka acanduk mar Jwøk na en yie, ni aacge na Akïïö cäädhö maal nyïm acanduk manøgø.

⁵'Ba kanyøgønø, Deebit ki jø Icriel bëët gena put miel døc ni yïthge met ni ge wär ki dudi ni ge pwøya Wuuö Jwøk, ni jøw pöödö ki thøme mo wø pwöt ni di roodø, ni jøw pöödö ki thøp-othïënhö, ka anëët, ka adijeege, ka athiliiŋŋi.

⁶'Ba kanya pïïcge ri laara mar Nakön, dhäk moa käär acanduk, tietge aceec ni tïmge ni manynya pädhö; ni ö Udha ni put cere tïŋ maal baŋ acanduk mar Jwøk ni jøl gø.

⁷Kanyøgønø, Wuuö Jwøk aput wëër døc ki Udha, ni put gø 'näk kaace kiper mana tïŋ cere maal bäät acanduk; ni ö Udha ni put thøø buut acanduk mar Jwøk kaace.

⁸'Ba Deebit agootø døc kiper mana ö wëëc Wuuö Jwøki na päth bäät Udha ni jääla gø. Kiper manøgønø, nyeŋ kaace aput cwøl ni Peereth-Udha këël dïcäŋi en.

⁹Kanyøgønø, Deebit aput lwäyö ki Wuuö Jwøk dïcäŋögø. Køøre ena köö, «?Aŋø, acanduk mar Wuuö Jwøk ö baŋa nidïï këët nø?»

¹⁰'Ba Deebit alwäyö ki man kïth acanduk mar Wuuö Jwøk yi Pääny Deebit;[4] 'ba acanduk manøgø akïth Deebiti yi øt Obet-Idöm nyï Gëth.

¹¹Kanyøgønø, acanduk mar Wuuö Jwøk aput bëëte yi øt Obet-Idöm nyï Gëth ki dwäde adäk, ni ö Wuuö Jwøki ni put Obet-Idöm gwïëth ki jøøa en paare bëët.

¹²'Ba acaan jï nyeya ma Deebit ni køp, ni «Wuuö Jwøk Obet-Idöm anø gwïëdhe ki jøøa en paare këël gïïa en jïre bëët, ki køør acanduk mar Jwøk.» Kanyøgønø, Deebit aput cøø ni lwør acanduk mar Jwøk po Obet-Idöm, ni kïth gø yi Pääny Deebit, ni yie met døc.

¹³'Ba gïna tägö beeye en, kanya ö jøøa käär acanduk mar Wuuö Jwøk na nø cääthge ki kääte abïciel, Deebit aput cïpö ki dhieŋ ma rwaath ki nyirøøa mo olør no olämi.

¹⁴'Ba kar kaagø, Deebit aput tägö ki meeŋ ki cwïnye bäre nyïm Wuuö Jwøk, ni eno ruyö ka abïïn wø cwøl ni ëëput [5] na näk cwääc ka waac lïïna.

¹⁵Kanyøgønø, Deebit ki jø Icriel bëët acanduk mar Wuuö Jwøk aputge kälö ni ge kwöŋŋö ni yïthge met døc, ni ge kudhö ki tuŋi.

¹⁶'Ba gïna tägö, kanya tïme na acanduk mar Wuuö Jwøk pïï dï Pääny Deebit, Mikal nyi Cøøl, na näk cï Deebit, aräŋŋö ki dha awëërnyeŋ ni joot nyeya ma Deebit ni pärö ni miel nyïm Wuuö Jwøk; ni put nyeya taak ki cwïnye.

¹⁷Køøre acanduk mar Wuuö Jwøk aputge kälö ni cïpge gø kare yo oduŋkaara mana no onø cwöth Deebiti piny kiper gø. Ni ö Deebiti ni cïpe ko olämme mo wø waaŋ bäre ko olämme mo wø duunni ki mëër nyïm Wuuö Jwøk.

¹⁸'Ba kanya løny Deebiti ki cïp olämme mo wø waaŋ bäre ko olämme mo wø duunni ki mëër, jiy agwïëdhe ki nyeŋ Wuuö Jwøk, eni na wïth jammi bëët.

¹⁹Køøre, eni dääpe[6] ki nyïïomøki mo omiinynyø na dhøgi apääŋŋe jï jø Icriel moa thööth kaagø, ni beege cwøw ki mään, ni pääŋŋe jï ŋati man nø ki ŋati man nø. Køøre jiy bëët adøø mïëcge ni ŋati man nø døøa paare.

²⁰'Ba kanya ö Deebiti na duu paan dwøŋ kuna gwïëth jø paare, Mikal nyi Cøøl aöö nee røømge ki Deebit, ni cääne ki luum apääda ni kööe, na «Aŋø, nyeny Icriel, riï ka arunynyï ka abïï miï di wøørø kipere dïcäŋi. ?Aŋø, ï bëënnï ŋø ki dëërï dïcäŋi nyïm mään mo wø tïïö jï jø tïïc moï niï nëëni keda dhaanhø ma bøøl mo wïïe ba laay ki man cäädhe ki dëëre?»

²¹'Ba Deebit aköö jï Mikal, ni «Gïna tïïa, mara beeye meeŋ nyïm Wuuö Jwøk na jier aani bäät wäru ki dhi øtø mare, na tïïc aani ni aana wïth jø Icriel ni beege jiye, eni na Wuuö Jwøk. 'Ba aani a poot bëëdö naa miel ni yia met naa pwøya Wuuö Jwøk.

²²'Ba aani, a poot tïmö naa jööt ni kaala man, ni tïm kara ni nëëni ni thiinh ki jïra; 'ba ki jï mään moø ni cäänï kiperge yøø, a wøørge wøørø.»

²³'Ba Mikal nyi Cøøl aput bëëtö ni bäŋ nyilaal jïre këël mana thøøe.