Read anuak 2 Camiel 9 Bible Online

2 Camiel 9 - anuak bible

2 Camiel 9

¹'Ba dïcäŋ aciel, Deebit apëëö ni kööe, na «?Aŋø, da dhaanhø mo odööŋ ni kwøw røk nyïïkwaac Cøøl, nee mëër mara nyoodha jïre ki køør mëër mana en yïthakicwa ki Jönathan?»

²'Ba kar kaagø, da dhaanhø mo bëëdö na ŋat tïïc jï jø dhi øt Cøøl mo nyeŋŋe Dhiba; ni cwøli, ni ö baŋ nyeya ma Deebit. Ni kö nyeya jïgø, na «?Aŋø, beeye ï Dhiba møn en?» Ni kö Dhiba, ni «Beeye aani, a na dhaanhnhï.»

³Køøre nyeya aköö, na «?Aŋø, da dhaanhø mo poot no odööŋ ni kwøw røk nyïïkwaac Cøøl nee mëër mar Jwøk nyoodha jïre?» 'Ba Dhiba aköö jï nyeya, ni «Da wär Jönathan mo tiete karge riet otøyø, mo odööŋ ni poot kwøw.»

⁴Kanyøgønø, nyeya aköö jï Dhiba, «?Aŋø, en ka ennø?» Ni løgi ya Dhiba jï nyeya, «Ka adïëri møn, eni nutö po Makir wär Amiel paana cwøl ni Lödebaar.»

⁵Køøre nyeya aput jääk baŋe Lödebaar po Makir wär Amiel, ni put öö.

⁶'Ba kanya ö Mepiböcëthi o Jönathan, nyikwaar Cøøl, na pïïe baŋ Deebit, cøŋŋe aput këël piny ni kuul wïïe piny ni määtha gø. Ni cwøli ya Deebiti, ni «Mepiböcëth.» Ni løk gø, ni «Aani en, a na dhaanhnhï.»

⁷Køøre Deebit aköö jïgø, ni «Kärï lwäyö; ka adïëri møn, mëër mara nyoodha nyoodhø jïrï ki køør mëër mana en yïthakicwa ki wäru ma Jönathan; ni ö pwöthi bëët moa näk mo kwaru ma Cøøl ni duua ge jïrï. 'Ba ïïno put bëëtö niï cämö ki aani cooth.»

⁸Kanyøgønø, Mepiböcëth cøŋŋe acäŋ këël piny ni kuul wïïe piny ni kööe, «?Wui nyeya, a na dhaanhnhï, a ba caal gwök mo othøw? ?A mëër man ni dwøŋ bäre en, orømø ki man nyoothï gø jïra?»

⁹Køøre nyeya, Dhiba na bëëdö na ŋat tïïc mar Cøøl acwøle, ni kööe jïgø, ni «Jammi bëët moa näk mo Cøøl, këël moa näk mo jø dhi øde bëët, anø cïba jï nyikwaar ŋata bëënnï na kwäärö marï.

¹⁰'Ba ïïni ki wäätï ki jø tïïc moï, u doo purö ki pwödhö jï Mepiböcëth, ni ö caammi mo ociek ni kälu ge jï nyikwaar ŋata bëënnï na kwäärö marï, nee jïte ki cam. 'Ba Mepiböcëth puta bëëtö ni cämö ki aani cooth.» 'Ba kar kaagø, Dhiba jïre da wääte ma apaar kurbïïc ki jø tïïc ma pïërariiø.

¹¹Køøre Dhiba aköö jï nyeya, ni «Ki køør luup bëët moa nø carï, ï na nyeya mara, na köömmï aani, a na dhaanhnhï, tïïa tïïö na karge.» Kanyøgønø, Mepiböcëth aput bëëtö ni cämö ka nyeya ma Deebit ni caala o nyeya aciel røk wääte.

¹²'Ba Mepiböcëth jïre da wääde mo poot thiinh mo nyeŋŋe Mika. 'Ba jiy bëët moa bëëdö po Dhiba gena put bëëtö na jø tïïc mo Mepiböcëth.

¹³Kanyøgønø, Mepiböcëth aput bëëtö yi Jerucalem, ni eni cämö ka nyeya cooth. 'Ba ena ŋwøl ni tiete karge riet otøyø.