Read anuak 1 Nyeye 12 Bible Online

1 Nyeye 12 - anuak bible

1 Nyeye 12

¹'Ba Reeyöböm aci Cekam, kiper jø Icriel bëët[10] onø ci Cekam nee eni tïïcge na nyeya.

²'Ba Jeröbäm o Nebat na wïny gïnögø, ena duuö ki Ijep, ni beeye kanya reŋ yie ni eni ŋwieya nyeya ma Cølöman.

³Køøre gena jääk baŋ Jeröbäm nee ööe; ni ö Jeröbämmi ki lwaa Icriel bäre ni öge ni cäänge ki Reeyöböm ni köge,

⁴ni «Wäru bëëtö marwa atïïe ni caala tëër mo peek bäätwa. 'Ba ennø, bëëtö mana teek na caal tëër mo peek na wara tïïc wäru bäätwa, tïïyï ni jööt; køøre nø, ï tïnywa tïnynyö.»

⁵'Ba Reeyöböm aköö jïge, ni «Døøgu nø, ni bëëdu ki nïne adäk; køøre uuno duu baŋa.» Køøre jøøgø gena døøk.

⁶Kanyøgø nyeya ma Reeyöböm acaara mar jø døøŋŋø apëënynye, ni beege jøøa wara tïny wänni ma Cølöman kanya bëët wänni ni poot kwøw, ni kööe, na «?Acaara mo nyïëdi noo cïpu jïra naa jïta ki øtjöö man dwøga luum jøøi ki gø?»

⁷Køøre adwøk jøøgø jïre ni köge, ni «Ni näk mo luum jøøgø wïnynyï wïnynyö dïcäŋi, ni jïëyï ki man tïnynyï geni, ni dwøgï luubö marge niï cara luup mo beyø jïge, ge tïmö ni gena jiy mo tïnynya ïïni na bäre bäre.»

⁸'Ba acaara mana cïp jø døøŋŋø jïre awiie, ni tïme ni pëënynya acaara mar obwöre moa piith ki eni na aciel, na tïny eni.

⁹Ni kööe jïge, na «?Acaara mo nyïëdi noo cïpu jïra kiper nee luubö dwøgø jï jøøi ii na cäänö ki aani na köö, ni ‹Bëëtö marwa na caal tëër mo peek na wara tïïc wäru bäätwa, tïïyï ni jööt›?»

¹⁰'Ba obwöre moa piith ki eni na aciel adwøkge jïre ni köge, ni «?Köö jøøgø ni bëëtö marge mana tïïc wäru ni teek bäätge, tïïyï jïge ni jööt? Ennø, caanï jïge, ni ‹Lweeta man ni thiinh en otïmö ni dwøŋŋa eni ki pier wära.

¹¹'Ba kaawat mana ö wära na tïïc bëëtö maru ni teek ni caala tëër mo peek, aani bëëtö maru cäŋa ka tïïyö ni teek døc ni kaala mana tïïc wära. Wära u pwönynye ka alaŋŋe, 'ba aani u pwönynya pwönynyö ka alaŋŋe mo lethe caala leth dha agarap.› »

¹²'Ba kanya tïme na ri dää nïne, Jeröbäm ki jiy bëët gena duu baŋ nyeya ma Reeyöböm kaawat mana caane na kööe, ni «Uuno duu baŋa ri dää nïne.»

¹³'Ba nyeya luummögø aput dwøk baŋ jøøgø ni teek, kiper ena kweer ka acaara mana cïp jø døøŋŋø jïre,

¹⁴ni caan gø jïge ki køør acaara mana cïp obwöre jïre, ni kööe, ni «Wära bëëtö maru atïïe ni teek ni caala tëër mo peek bäätu; 'ba aani bëëtö maru cäŋa ka tïïyö ni teek døc ni kaala mana tïïc wära. Wära u pwönynye ka alaŋŋe; 'ba aani u pwönynya pwönynyö ka alaŋŋe mo lethe caala leth dha agarap.»

¹⁵'Ba nyeya luum jøøgø käre wïnynyö, kiper gïnögø beeye gïn mo käla baŋ Wuuö Jwøk, nee luubö mana caan Wuuö Jwøki jï Jeröbäm o Nebat ki dha Akiya nyï Cëëlö thur kare.

¹⁶'Ba kanya ö jø Icrielli bëët na jootge gø ni marge kär wïny nyeya, adwøkge jï nyeya, ni köge, «?Aŋø, waani, da kurwa ri Deebit? Waani, kee bäŋ gïn mo dooŋ na kurwa ki røk jap o Jeci. Wui jø Icriel, ŋati man nø døø paare. 'Ba ï na nyikwaar Deebit, dööŋï keerï ki jø dhi ødï.» Kanyøgø jø Icriel gena put døø mïëcge.

¹⁷'Ba Reeyöböm abëëdö na nyeya mar jø Icriel moa bëëdö yïth päänye mo Juuda.

¹⁸Køøre nyeya ma Reeyöböm, Adöram na bëëdö na wïth jø tïïc mo wø mak ki teek ajääŋŋe baŋ jø Icriel, ni ö jø Icrielli ni këërge gø ki kïte, ni put thøø. Køøre nyeya ma Reeyöböm alaar eth yi jääne man wø tut okweenynyi ni reŋ Jerucalem.

¹⁹Kanyøgø jø Icriel gena put tïmö ni ge gëëmö ki jø dhi øt Deebit këël dïcäŋi.

²⁰'Ba kanya ö jø Icrielli na wïnyge gø ni Jeröbäm aduuö ki Ijep, gena jäägö ni cwølge eni nee ö kar acooŋa, ni tïïcge eni na nyeya bäät jø Icriel. 'Ba bäŋ wï tuuŋ mør mo odwätö ki dhi øt Deebit, 'ba beege jø tuuŋ Juuda keere na dwätö ki dhi øt Deebit.

²¹'Ba kanya ö Reeyöbömmi na pïïe yi Jerucalem, jø leny moa teek døc mo jø tuuŋ Juuda ki jø tuuŋ Benjamen acooŋe, ni beege jø leny ma kume ma dïpa ki pïërabära, nee këëtge ki jø Icriel, kiper nee buc nyec duu baŋ Reeyöböm o Cølöman.

²²'Ba dwør Jwøk aö bäät nyikuŋ Jwøk ma Cemaya ni kööe,

²³ni «Caanï jï nyeny Juuda ma Reeyöböm o Cølöman, ki jø tuuŋ Juuda, ki jø tuuŋ Benjamen, ki jø møga,

²⁴ni mana caan Wuuö Jwøki beeye en, ena köö, ni ‹Käru cøø nou këëdu ki nyïïmëëgu ma jø Icriel. Ŋati man nø døø paare, kiper gïnögø käla baŋa.› » Køøre luum Wuuö Jwøk aputge wïnynyö, ni døøge mïëcge, kaawat mana caan Wuuö Jwøki.

²⁵'Ba nyeya ma Jeröbäm, Cekam, na en yïth mïëya en bäät kïte na en kur jø tuuŋ Ipariem, acäŋ geerrø ni teek, ni bëëde kaace. Ni cøøe ni cäŋ Peniël geerrø ni teek.

²⁶'Ba Jeröbäm acädö ki cwïnye, ni «Ennø, nyec duua dhi øt Deebit;

²⁷kiper ni näk mo jøøi ge cøø cooth ni cïpge ko olämme yi Øt Wuuö Jwøk Jerucalem, cwïnyge døøa baŋ nyenyge ma Reeyöböm nyeny Juuda; ni ö geni ni 'näkge aani, ni døøge baŋ Reeyöböm nyeny Juuda.»

²⁸'Ba nyeya acädö bäät luummögø. Køøre ena tïïö ki nyïïrøøe ariiø mo tïïc ka warkey, ni kööe jï jiy, ni «U na jø Icriel, ciin Jerucalem atïmö ni teek jïïu. Neennu, juu mou beege ii, na käl u wøk ki yi ŋööm Ijep.»

²⁹Køøre eni røk juugögø aciel acwöth Bëthël, ni cwöth maya Daan.

³⁰'Ba gïnögø aput tïmö na raay jï jø wø wøør ge, ni wø aay këël Daan.

³¹Køøre ena gëëdö ki uut lam bäät thuuri, ni röönye ki dïlämme røk jiy bëët jaak, këël na bëëtge ni ge patha jø tuuŋ Libay.

³²Ni ö Jeröbämmi ni cïp piny ki dïcäŋ ajwöma mo di wøørø ni nïr dwää abära apaar kurbïïc, kaawat dïcäŋ ajwöma man wø wøør jø Juuda. Ni ö eni ni cïpe ko olämme bäät gïn wø cïp olämme bääte Bëthël jï nyïïrøøe moa näk ee tïïö. Ni cïp Bëthël ki dïlämme yïth uut lam moa näk ee geer bäät thuuri.

³³'Ba kanya tïme ni nïr dwää abära apaar kurbïïc, ni beeye dwääy mana näk ee jierø ki cwïnye keere, ena cïpö ko olämme bäät gïn wø cïp olämme bääte mana tïïe Bëthël, ni eni tïïya dïcäŋ manøgø nee wøør jø Icrielli.