Read anuak 1 Nyeye 15 Bible Online

1 Nyeye 15 - anuak bible

1 Nyeye 15

¹'Ba kanya tïme na ri cwiiri apaar ka abära moa beet Jeröbämmi o Nebat ni ena nyeny Icriel, Abaaja atïmö na nyeya Juuda yi Jerucalem,

²ni bëëde ni ena nyeya ki cwiiri adäk. 'Ba nyeŋ menni beeye Maika nya Abicalöm.

³'Ba Abija abëëdö ni caatha køør gïïa reyø bëët moa tïïc wänni, ni bëëde ni cwïnye bäre käre cïp køør Wuuö Jwøk, Jwøk mare, kaawat mana bëët cwïny kwari ma Deebit ni ena køør Wuuö Jwøk.

⁴'Ba kiper Deebit, ena mooc Wuuö Jwøki, Jwøk mare, ki wïïe mo dööŋ Jerucalem, ni jïte ki wääde mo läw kar gø na nyeya køøre, nee Jerucalem bëëde ni teek.

⁵Kiper Deebit abëëdö ni tïïya gïï mo nëëni ni beyø ki jï Wuuö Jwøk, ni käre gaa wøk ki gïïa köömmi ya Wuuö Jwøki ki geni bëët, yïth nïne moa beede bëët; 'ba beeye luum Uria nyï Këth keere na gaa wøk ki gø.

⁶'Ba yïth nïne moa beet Abija bëët, Reeyöböm ki Jeröbäm ge bëëdö ni ge këëdö ki dëëtge cooth.

⁷'Ba luum tïïe møga moa tïïc Abaaja ogöör piny yi Wëël Luup Nyec Juuda. 'Ba yïthakic Abija ki Jeröbäm aput bëëtö ni da leny.

⁸Køøre Abaaja athøw ni läp køør kwäcge, ni koonyi yi Pääny Deebit. Ni ö wääde ma Aca ni läw kar gø na nyeya.

⁹'Ba kanya tïme na ri cwiiri ma pïërariiø moa beet Jeröbämmi ni ena nyeny Icriel, Aca atïmö na nyeya Juuda yi Jerucalem.

¹⁰Ni bëëde ni ena nyeya yi Jerucalem ki cwiiri ma pïëraŋween ka aciel. 'Ba nyeŋ waŋi beeye Maika nya Abicalöm.

¹¹'Ba Aca abëëdö ni tïïya gïï mo nëëni ni beyø ki jï Wuuö Jwøk, kaawat moa tïïc kwari ma Deebit.

¹²Eni kääpe moa näk mään ki cwøw mo wø tïïö kwör wø lam juu møøk yïthge ariemme yïth ŋøøm moe, ni wet gïï wø lam bëët moa tïïc kwäye.

¹³'Ba eni teek gwac mar waŋi ma Maika akäl wøk cer gø, kiper waŋi atëëŋö ki jaath mo di lamø mo ec raac ki gø, mo ocaa ri jwøa cwøl na Acara; ni ö eni ni käl jaath waŋi manøgø no otieŋø enø wøk, ni waaŋ gø waŋ Naam Kidaran.

¹⁴'Ba kwör lam moa no otïïö maal bäät thuuri käre raanynyø, 'ba Aca abëëdö ni cwïnye bäre ee cïp køør Wuuö Jwøk ki yïth nïne bëët moa beede.

¹⁵Ni käl jammi mo wänni ki moe moa no ocïp kur keerge na mo Jwøk, ni beege gwel-bïrö ki warkey ki jap paac, ni kïth geni yi Øt Wuuö Jwøk.

¹⁶'Ba yïth nïne bëët moa beet Aca nyeny Juuda ki Baaca nyeny Icriel, ge bëëdö ni ge këëdö ki dëëtge cooth.

¹⁷'Ba Baaca nyeny Icriel acøø ni këëde ki jø Juuda, ni ö päänya cwøl ni Reema ni geer gø ni teek, ni gëëŋa jöö, kiper nee bäŋe dhaanhø mo pöötha baŋ Aca nyeny Juuda, nee bäŋe dhaanhø mo duny wøk ki Juuda.

¹⁸'Ba Aca gwel-bïrö ki warkey moa dööŋ yi øt kän jammi mo Øt Wuuö Jwøk, ki moa dööŋ yi øt kän jammi mar øt nyec, akäle ni cïp ge ceŋ jø kööre moe, ni jääŋ ge baŋ Ben-Adat o Thabrimön nyïkwaar Ëdhyön nyeny jø Aram na bëëdö Damacka, ni kööe,

¹⁹ni «Beerra man ö ïïni ki aani ni tudø ki luubö yïthakiyø, kaawat mana en yïthakic wära ki wäru. 'Ba ennø, aana jääk baŋï ki muuy, ni beeye gwel-bïrö ki warkey; ciï ni raanynyï luubö mana näk iï tuudö ki Baaca nyeny Icriel, kiper nee eni ö wøk paara.»

²⁰Køøre Ben-Adat luum nyeya ma Aca awïnynye, ni jääŋ kwääc lwaae mo leny moe, ni cige ni tukge päänye mo jø Icriel, ni makge Ijöön, ki Daan, ka Abël-Bëëth-Maika, ki mïëya en buut puur Kinërët,[12] këël ŋøøp Naptali bäre.

²¹'Ba kanya ö Baaca na wïny gïnögø, Reema aput wec ki man geer gø, ni døø Tirja.

²²Køøre nyeya ma Aca acïpö ki dwøl jï tiet mïëc Juuda bëët, ni bäŋgø mo ee wiiø. Køøre gena aay ni jwïëkge kïte ki jer geer moa ö Baaca na dee Reema geerø ki ge. Ni ö nyeya ma Aca ni geer Gëba na en yi ŋööm Benjamen, ki Micpa ki ge.

²³'Ba luum tïïe møga moa tïïc nyeya ma Aca, ki luum teek mare, ki luum päänye moa geere, ogöör piny yi Wëël Luup Nyec Juuda. 'Ba kanya jale, ena tïmö ni eni tuu ki tiete.

²⁴Køøre Aca athøw ni läp køør kwäcge, ni koonyi buut kwäcge yi Pääny Deebit. Ni ö wääde ma Jøcapat ni läw kar gø na nyeya.

²⁵'Ba kanya tïme na ri riet cwiiri moa beet Aca na nyeny Juuda, Nadap wär Jeröbäm atïmö na nyeya Icriel, ni bëëde na nyeya ki cwiiri ariiø bäät jø Icriel.

²⁶'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni caatha køør gïïa reyø na tïïc wänni na wëëk jø Icriel tïïc ki raay.

²⁷'Ba Baaca wär Akiya, na käl røk jø tuuŋ Icakar, agëëmö ki Nadap, ni 'näk gø Gibetön, pääny mar jø Pilitin, kanya bëëde ni Nadap ki jø leny mo Icriel bëët Gibetön ege ciel dïër.

²⁸'Ba Nadap anäk Baaca ni läw kar gø na nyeya ri dää cwiiri moa beet Aca na nyeny Juuda.

²⁹'Ba kanya tïm Baaca na nyeya ennø, jø dhi øt Jeröbäm bëët aput 'näk, ni bäŋ jiy mo ee wiiø mo kwøw dhi øt Jeröbäm. Gena put 'näk bëët, ki køør luubö mana caan Wuuö Jwøki ki dhi dhaanhnhe ma nyikuŋ Jwøk ma Akiya nyï Cëëlö.

³⁰Gïnögø atägö kiper raay moa tïïc Jeröbämmi, na wëëk jø Icriel tïïc ki raay, këël tïïe moa tïïe ni tïïya Wuuö Jwøk, Jwø Icriel, nee goote.

³¹'Ba luum tïïe møga moa tïïc Nadapi ogöör piny yi Wëël Luup Nyec Icriel.

³²'Ba yïth nïne bëët moa beet Aca nyeny Juuda ki Baaca nyeny Icriel, ge bëëdö ni ge këëdö ki dëëtge cooth.

³³'Ba kanya tïme na ri dää cwiiri moa beet Aca na nyeya Juuda, Baaca wär Akiya atïmö na nyeya Icriel yi Tirja, ni käär paac ki cwiiri ma pïërariiø kurŋween.

³⁴'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni caatha køør gïïa reyø na tïïc Jeröbäm, na wëëk jø Icriel tïïc ki raay.