Read anuak 1 Nyeye 18 Bible Online

1 Nyeye 18 - anuak bible

1 Nyeye 18

¹'Ba ni jøw onø bëëdö ki nïne mo thööth, kanya tïme na ri dää cwiiri, dwør Wuuö Jwøk aö bäät Ilaaja ni kööe, ni «Ci nyooth dëërï jï nyeya ma Akap; aani køth jääŋŋa jääŋŋö piny.»

²Kanyøgø, Ilaaja aput ci kuna nyooth dëëre jï Akap. 'Ba kar kaagø, käc oløny ni raac døc Cameria pääny Akap.

³Køøre Akap, Øbadiya kwääy paan dwøŋ acwøle. 'Ba Øbadiya bëëdö ni Wuuö Jwøk ee wøørø døc;

⁴kiper kanya ö Jedhebelli na 'näk nyïïkuk Jwøk mo Wuuö Jwøk, Øbadiya nyïïkuk Jwøk ma dïpa akäle ni kan ge yïth uut kïte na pïërabïïc pïërabïïc, ni bëëde ni møya geni ki cam ki pïï.

⁵'Ba Akap aköö jï Øbadiya, «Waa cøø dï paap kuna määnynyö ki jøør ki nyeŋ näm. Kanymør ø jïtö ki luum mo kwøø okwëënyi ki gääŋŋe ki gø. Køøre nø, lääc paac ba nääø këët.»

⁶Kanyøgønø, paap aputge pääŋŋö yïthakicge nee cige baŋ määnyö. 'Ba Akap acør jöö mør kur keere, ni ö Øbadiya ni cør jöö mør kur keere.

⁷'Ba kanya cääth Øbadiya waŋjöö, ena put røømmø ki Ilaaja, ni put Ilaaja ŋec, ni gøø ree piny ni kööe, ni «?Man beeye ï kwäärö mara ma Ilaaja?»

⁸'Ba Ilaaja aköö jïre, ni «Beeye aani. Ciï, ni caanï gø jï nyeya marï, ni ‹Neenï, Ilaaja nut kany.› »

⁹'Ba Øbadiya aköö, na «?Agïnaŋø ni yaa baaø ni cïbï aani, a na dhaanhnhï, cer Akap, naa nääe en?

¹⁰Ŋëët Wuuö Jwøk, Jwøï na kwøw, bäŋ tier paac mo odööŋ ni nyeya mara kär jääk yie kuna many ïïni. 'Ba kany wø köge, ni ‹Ilaaja tøør kany,› eni jø paaneca wø pute ka tïïc nee kööŋge niï kärge joodø.

¹¹Ni ennø, köö ïïni ni cøøa ni caana gø jï nyeya mara ni Ilaaja nut kany.

¹²A kanymør kanyo daa raa buutï, Jwïëc Wuuö Jwøk puta öö ni käl ïïni, ni kïth ïïni kany mo kuua. 'Ba kanyo cøøa noo caana gø jï Akap, no ööe noo ba joot ïïni, eni a pute ka 'näk. Kee ŋäyï ni aani, a na dhaanhnhï en, a bëëdö naa lwär ki Wuuö Jwøk ki mana täga naa poot thiinh.

¹³?Aŋø, gïna tïïa kär caanø jïrï? Kanya ö Jedhebelli na 'näk nyïïkuk Jwøk mo Wuuö Jwøk, aani nyïïkuk Jwøk mo Wuuö Jwøk ma dïpa akana yïth uut kïte na pïërabïïc pïërabïïc, ni bëëda ni ge møya møyø ki cam ki pïï.

¹⁴Ennø, köö ïïni ni cøøa ni caana gø jï nyeya mara ni Ilaaja nutö. 'Ba kanyo ööe noo ba joot ïïni, a pute ka 'näk.»

¹⁵'Ba Ilaaja aköö, ni «Ŋëët Wuuö Jwøk, Jwøa kwøw, eni na wïth jammi bëët ni wø tïnynya, ka adïëri møn, aani dëëra nyoodha nyoodhø jïre dïcäŋi.»

¹⁶Kanyøgø Øbadiya aput cøø ni røømge ka Akap, ni caan gø jïgø; ni ö Akapi ni ööe nee røømge ki Ilaaja.

¹⁷'Ba kanya ö Akapi na joot Ilaaja, Akap aköö jïre, ni «?Man beeye ïïni, ï na kier wïth jø Icriel?»

¹⁸'Ba Ilaaja aköö, ni «Paa aani na kier wïth jø Icriel, 'ba beeye ïïni ki jø dhi øt wäru, kiper luup moa cem Wuuö Jwøki aweyu, ni caathu køør juuga cøøri ni Baal.

¹⁹'Ba ennø, jäägï, nee jø Icriel bëët öge nee rege cooŋge buuta bäät Kïn Karmël, ge ki nyïïkuk Baal moa näk dïpe aŋween ki pïërabïïc, ki nyïïkuk jwøa cwøl na Acara moa näk dïpe aŋween ni wø caam Jedhebelli.»

²⁰Køøre Akap aput jäägö ki dwøl baŋ jø Icriel bëët, ni käl nyïïkuk juu moøgø kanya ciel bäät Kïn Karmël.

²¹Køøre Ilaaja aö baŋ jiy ni kööe, na «?A këël kany mo nyïëdi noo bëëdu nou wïdö yïthakic acaare ariiø? Ni näk Wuuö Jwøk beeye Jwøka eni, caathu køøre; 'ba ni näk Baal beeye Jwøka eni, putu køøre caath.» 'Ba bäŋ dhaanhø mo odwögö jïgø ki luubö.

²²'Ba Ilaaja aköö jïge, ni «Beeye aani keera na dööŋ na nyikuŋ Wuuö Jwøk; 'ba nyïïkuk Baal gena jiy ma dïpe aŋween ki pïërabïïc.

²³'Ba ennø, mooyu waani ki rwädhe ariiø. Køøre ge jëëtö ki rwaath aciel kiper dëëtge, ni ŋørge gø, ni cïpge gø bäät jen mo waaŋi ki gø bäät gïn wø cïp olämme bääte. 'Ba bäŋ maac mo äpge tier gø. 'Ba aani thuwø rwaath maya jiiŋŋa jiiŋŋø, ni peedha gø bäät jen, ni tiere ba ämma ki maac.

²⁴'Ba u na nyïïkuk Baal, kwayu jwøk maru. Aani, Wuuö Jwøk kwaa kwaaø. Køøre Jwøk mano cïpi ki maac, beeye eni na Jwøk.» Kanyøgø, aløk jiyi bëët ni köge, ni «Manøgø beeye acaara mo beer.»

²⁵Køøre Ilaaja aköö jï nyïïkuk Baal, ni «Kwøŋu jëëtö ki rwaath kiper dëëtu, ni jiiŋŋu gø, kiper u thööth; ni kwayu jwøk maru. 'Ba tier rïŋö maru kär ämmu ki maac.»

²⁶Køøre, geni rwaath mana no ocïbö jïge alwørge ni jiiŋge gø; ni kwaacge Baal ki mana täge ka amöölla këël mana këët dhöör, ni ge köö, «Wui Baal, løk kwac marwa.» 'Ba bäŋ dwøl mo owïnyö ni bäŋ gïn mo oløø jïge. 'Ba ge bëëdö ni ge miel deŋ gïn wø cïp olämme bääte mana tïïcge.

²⁷'Ba kanya tïme na dhöör, gena buu Ilaaja ni kööe, ni «Kwayu ni döötu ena maal. ?Aŋø, eni paa jwøk maru? Kanymør wïïe ena baŋ luubö mør, wala eno aa wøk ŋää kiir, wala eni cäädhö jöö, wala kanymør eno butö ni manynya man jiec eni.»

²⁸Kanyøgø, gena kwöŋŋö ni döötge ege tïŋ maal, ni cööpge dëëtge ko opëëlle ki tøøŋi kaawat man wø tïïcge cøøn ki køør kööŋŋö marge, këël mana cwëëc dëëtge ki rem.

²⁹'Ba kanya tïme ni kur dhöör opöödhö, gena göö ko oduuru këël mana këët abøøya yi caan wø cïp olämi yie mar abøøya; 'ba bäŋ dwøl mo owïnyö, ni bäŋ gïn mo oløø jïge, ni bäŋe ŋat mo ïthe ee ciiø ki gïrge.

³⁰Køøre Ilaaja aköö jï jiy bëët, ni «Ööu buuta.» Kanyøgø jiy bëët aö buute. Ni cäŋ gïn wø cïp olämme bääte mar Wuuö Jwøk mana no oraanynyø dwøk kare.

³¹'Ba Ilaaja alwötö ki kïte apaar kurriiø ki køør kwään wïth tuŋi mo wäät Jeekap, ŋata ö dwør Wuuö Jwøki bääte na kö Wuuö Jwøki, ni «Nyeŋŋï ocwøl ni Icriel.»

³²Ni ö eni ni tïïc gïn wø cïp olämme bääte ki kïte moøgø ki nyeŋ Wuuö Jwøk, ni kunye ki øøl mo deŋ gïn wø cïp olämme bääte ee wïrö ki gø, mo løny ki man røm köödhi ma yïth opïri ariiø yie.

³³Køøre eni jen acïp bäät gïn wø cïp olämme bääte, ni ŋør rwaath na thäŋi ni cïp ge bäät jen. Ni kööe jïge, ni «Pääŋŋu yïth dääe aŋween ki pïï ni kønynyu gø bäät olämi ki bäät jen.»

³⁴Køøre ena köö, ni «Cäŋu öömmö ki pïï.» Ni cäŋge öömmö ri rietge. Ni cäŋ köö, ni «Cäŋu öömmö ri dääge.» Ni cige ni öömge gø.

³⁵Kanyøgønø, pïï aput tïmö ni muulö deŋ gïn wø cïp olämme bääte, ni pääŋge yi øøl.

³⁶'Ba kanya tïme na yi caan wø cïp olämi yie mar abøøya, nyikuŋ Jwøk ma Ilaaja anyänh buut gïn wø cïp olämme bääte, ni läme ni kööe, «Wui, Wuuö Jwøk, Jwø Eeberam ki Aydhak ki Icriel, dïcäŋi beerra man ö jiyi ni ŋäcge ïïni ni ïïna Jwøk Icriel, ni ŋäcge gø ni aana dhaanhnhï, ni gïï bëët ii tïïa ka køør dwørï.

³⁷Wui, Wuuö Jwøk, løk kwac mara, nee ŋäc jøøi ni ï na Wuuö Jwøk, ïïna Jwøk møn, ni cäŋï cwïnyge luu baŋï.»

³⁸Køøre Wuuö Jwøk maac aput jääŋŋö, ni put olämi, ki jen, ki kïte, ki ŋøøm waaŋ, ni put pïï moa en yi øøl taal.

³⁹'Ba kanya ö jiyi bëët na jootge gø, dëëtge aputge gøø piny, ni köge, ni «Wuuö Jwøk beeye Jwøk møn! Wuuö Jwøk, ena Jwøk møn!»

⁴⁰Kanyøgø Ilaaja aköö jïge, ni «Magu nyïïkuk Baal. Kär dee gø mo weyu nee päär wøk.» Køøre gena makge. Ni ö Ilaaja ni käl geni bäät waŋ Naam Kicön, ni 'näk geni kaace.

⁴¹'Ba Ilaaja aköö jï Akap, ni «Ciï ni cämï; kiper da dwør køth mo dwøŋ mo wïnyö.»

⁴²Kanyøgø, Akap aput cøø ni cäme. 'Ba Ilaaja aci wï Kïn Karmël, ni këël cøŋŋe piny ni kuul wïïe piny.

⁴³Køøre ena köö jï ŋat tïïc mare, ni «Ciï ni neenï jï kuna näk da naama dwøŋ.» Kanyøgø, ena cøø ni neen jï kunece, ni kööe, ni «Bäŋ gïrpiny.» Køøre ena jääŋ Ilaaja kwöre abïriiø.

⁴⁴'Ba kanya tïme na ri bïriet jääk, ŋat tïïc mare aköö, ni «Neenï, nyi pöölö mo thiinh mo caala cera dagø mo ööa maal ki yi naama dwøŋ.» Ni kö Ilaaja, ni «Ciï ni caanï gø jï Akap, ni ‹Jiiŋ jääy marï man wø tut okweenynyi ni ciï piny kunece, kiper niï ba mak køthi man ööi ni dwøŋ en.› »

⁴⁵'Ba ki kany mo thiinh, maal aput tïmö ni cøl ki pöölö, ni ö jame, ni päth køthi mo dwøŋ døc. 'Ba Akap aput aay ni ci Jedhriel.

⁴⁶Kanyøgønø, teek Wuuö Jwøk aput ö bäät Ilaaja, ni ö Ilaaja ni twöö abïïne piere, ni put reŋ maal nyïm Akap ni reŋ Jedhriel.