Read anuak 1 Nyeye 4 Bible Online

1 Nyeye 4 - anuak bible

1 Nyeye 4

¹'Ba nyeya ma Cølöman aput bëëtö na nyeya mar jø Icriel bëët.

²Ni nyeŋ jiy moe moa kwörge døøŋŋø beege ii: Adhariya o Dhadök beeye Kwääy Lam Mana Dwøŋ.

³'Ba Eliörëp ka Akiya wäät Cica beege jø wø göör luup akwöma piny, ni Jøcapat wär Akilut beeye nyikugö.

⁴'Ba Benaya o Jööda beeye kwääy lwaa leny, ni Dhadök ka Abiethaar beege dïlämme moa døøŋŋø.

⁵'Ba Adhariya o Nathan beeye wïth jøøa no ocuumö na kwääri yïth mïëc jø Icriel bëët, ni dïlämi ma Dhabut o Nathan beeye nyawat nyeya.

⁶'Ba Aycar beeye wïth jø wø tïïö paan dwøŋ, na Adöniram wär Abda beeye wïth jø tïïc moa näk mak ka teek.

⁷'Ba Cølöman jïre da jiy apaar kurriiø mo ee cuumö yïth mïëc jø Icriel bëët, ni beege jø wø känni ki cam jïre, eni ki jiy mo wø bëëdö paare; ni ŋati man nø dëët jøøgø kännö ki cam ma kar dwääy aciel ki yi cwiir.

⁸'Ba nyeŋ jøøka beege ii: Ben-Ur beeye na bëën mïëya en bäät kïte na en kur jø tuuŋ Ipariem;

⁹ni Ben-Deker beeye na bëën päänye moa cwøl ni Maakac ki Caalbim ki Bëëth-Camic ki Ëlön-Bëëth-Anan;

¹⁰ni Ben-Ëcëd beeye na bëën päänye moa cwøl ni Aruböth, ki Cökö, ki mïëri moa en ŋøøp Ëpër ge bëët;

¹¹ni Ben-Abinadap, na nywøm Thapath nyi Cølöman, beeye na bëën mïëri moa en bäät kïnna cwøl ni Dör;

¹²ni Baana wär Akilut beeye na bëën päänye moa cwøl ni Tanak ki Megidø ki Bëëth-Can, ki mïëri bëët moa en buute na en buut pääny Carthan jï løø tier-piny ki pääny Jedhriel, ni tägi ka Bëëth-Can këël mana këët Abël-Mööla ni pïïe løø mïëri moa en buut Jökimiam;

¹³ni Ben-Gëbër beeye na bëën päänya cwøl ni Ramöth-Gelät, ki päänye moa therø mo Jayer o Maneeca moa en Gelät, ki päänye moa en kanya cwøl na Argöp na en Baacan, ni beege päänye moa näk pïërabïciel na døøŋŋø na näk ogeerø ki kiiri mo dhøkge da dïdëëte mo tïïc ka nywïëny;

¹⁴na Akinadap wär Idö beeye na bëën kanya cwøl ni Maanayim;

¹⁵na Akimaath, na nywøm Bacimat nyi Cølöman, beeye na bëën jø tuuŋ Naptali;

¹⁶ni Baana wär Ucay beeye na bëën jø tuuŋ Acer ki päänya cwøl ni Bealöt;

¹⁷ni Jøcapat o Paruy beeye na bëën jø tuuŋ Icakar;

¹⁸ni Cimiy wär Ëla beeye na bëën jø tuuŋ Benjamen;

¹⁹ni Gëbër wär Uri beeye na bëën jøøa en yi ŋööm Gelät, ni beeye ŋøøpa kwøŋ bëëtö na mo Cëëwön nyeny jø Amör ki Ög nyeny jø Baacan. 'Ba Gëbër keere beeye ŋata bëëdö no ocuumö yïth ŋøøpøgø.

²⁰'Ba jø Juuda ki jø Icriel ge thööth døc ni ge caala nyeŋ akwöny deŋ naama dwøŋ; ni ge bëëdö ni ge cämö ni ge mädhö ni yïthge met.

²¹'Ba Cølöman abëëdö na nyeya, ni wïth juurre bëët ena cere ki mana täge ki Naam Upareeti, këël mana këët yi ŋööm jø Pilitin, ni pïïe waŋ keew ki jø Ijep. Ni ö wïth juurre moøgø ni cïpge ka ajwäk jï Cølöman ni tïnyge eni ki yïth nïr kwøw moe bëët.

²²'Ba caammi mo wø jiiŋŋi jï Cølöman ki jiye ki dïcäŋ aciel beege møø mo otiit ma rumme ma pïëradäk mo røm ka rumi mana cwøl ni kör,[5] ka auya ma rumme ma pïërabïciel mo røm ka rumi manøgø,

²³ki dhäk apaar mo olør, ki dhäk ma pïërariiø mo caamma yi pwöla, ki dïëk ma dïpa; ni röönne ki bup ka aŋeri ki gwïën mo olør kär kwaan rege.

²⁴'Ba Cølöman jïre da teek bäät jiy bëët ki nyeye moge, ki mana täge ki bäät Naam Upareeti päänya cwøl ni Tipca, këël mana këët päänya cwøl ni Geedha; ni eni bëëdö ki bëët-mëër ki mïëri moa en deŋŋe bëët.

²⁵'Ba yïth cwiiri moa beet Cølömanni ni ena nyeya, jø Juuda ki jø Icriel gena put bëëtö ni bäŋ gïn mo lääŋge, ni jøw opï piny jaak ni cam päl, ki mana täge ki Daan, paana en jï løø wï-piny, këël mana këët Bëërcïïba na en jï løø tier-piny.

²⁶'Ba kar kaaca Cølöman jïre da lwääge ma kume aŋween mo wø bëët okwëënyi mo wø tut jïëth leny yïthge, ko okwëënyi mo leny ma kume apaar kurriiø.

²⁷'Ba jøøa no ocuumö bäät mïëc jø Icriel, ge wø kännö ki caammi jï nyeya ma Cølöman ki jï jiy bëët mo wø bëëdö paare, ni ŋati man nø känni ki kany wø päŋ dwääyi man wø känne yie, ni bëëde ni bäŋ gïn cange.

²⁸Ni känge thuwø ki beel ki luum kiper okwëënyi mo wø tut jïëth leny, ko okwëënyi møga, ni kïthge ge kanya wäŋŋi ni kïth yie. Ni ŋati man nø känni ka køør mana caan jïre.

²⁹'Ba Jwøk Cølöman amooe ki leec wïc mo dwøŋ døc, ni tïme ni gïn mo beer ki gïn mo raac ŋääe, ni ŋäc jammi mo thööth mo ba løny ki kwaan.

³⁰'Ba leec wïc mar Cølöman aput tïmö ni kaala leec wïc mar jiy bëët mo wø bëëdö jï løø kur tuul-cäŋ, ki leec wïc mar jø Ijep bëët.

³¹Eni wïïe leer ni kaala leec wïc mar jiy bëët, këël leec wïc mar Ëtan nyï Edhera, ki leec wïc mar wäät Mööl, ni beege Ëman ki Kalköl ki Darda; ni ö nyeŋŋe ni wïnye dï wïth juurre bëët moa en deŋŋe.

³²Eni thuwø, ena kän wøk ka aŋaade ma kume adäk mo pwöc leec wïc, ni cääe ki dudi mo kaala kuma.

³³Ena cäänö thuwø kiper bëët jenni, ni tägi ka jenni moa døøŋŋø na en yi lur Libaanø këël mana këët ri moa thenh thenh ni wø tuy ri kiir; ni cääne kiper bëët lääy ki weny ki gïï wø muuli ki piny, ki rec bëët.

³⁴Ni ö jiyi ki røk wïth juurre bëët kuna wïnyge luup mo wø caan Cølömanni ki køør leec wïc mare, ni ge jääŋŋa nyeye bëët mo bäät piny moa wïny leec wïc mare.