Read anuak 1 Nyeye 5 Bible Online

1 Nyeye 5 - anuak bible

1 Nyeye 5

¹'Ba kanya ö Kiram nyeny Tayar na wïny gø ni Cølöman wïïe anø thïïmmi ki maaw ni røønyi na nyeya kar wänni, jø kööre moe ajääŋŋe baŋ Cølöman, kiper eni na Kiram, ge wø bëëdö ni gena nyïïawäädi ki Deebit.

²Køøre Cølöman ajääk baŋ Kiram ki dwøl, ni kööe,

³ni «Ŋäyï ni wära ma Deebit kär løny jïre ki man gëëde ki øtø jï Wuuö Jwøk, Jwøk mare, kiper lenye moa näk eni ege ciel dïër, këël mana ö Wuuö Jwøki na kïth nyïïmän moe tiete.

⁴'Ba ennø, Wuuö Jwøk, Jwøk mara, aana nø mooe ki jwöm, ni tïme ni bäŋ lenye kun ki kun; ni ennø, bäŋ nyïïmän jïra, ni bäŋ gïn mo raac.

⁵'Ba ka adïëri møn, aani, a manynya man gëëda ki øtø jï Wuuö Jwøk, Jwøk mara, kaawat mana caani ya Wuuö Jwøki jï wära ma Deebit na kööe, ni ‹Wäädï mano tïïa nee pï piny bäät wälu marï noo läw karï, eno gëëdö ki øtø kiper nyeŋŋa.›

⁶«'Ba ennø, caanï jï jiyï nee ge ŋutge ki jenni moa perge leth jïra yi lur Libaanø, ni ge tïïö ka jø tïïc 'moa na aciel; 'ba aani a cïpö ki jammi jï jø tïïc moï ki køør mano caanï; kiper ŋäyï ni bäŋ ŋat mo ŋøt jaath ŋääe røkwa mo caala jiyï ma jø Caydan.»

⁷'Ba kanya ö Kiram na wïny luum Cølöman, eni yie aput mïnnö døc, ni kööe, ni «Pwøc en jï Wuuö Jwøk dïcäŋi, na mooc Deebit ki wääde mo wïïe leer ki man käär jøøi ni thööth ii.»

⁸Køøre Kiram aput jäägö ki dwøl jï Cølöman ni kööe, ni «Dwøl mana jääŋŋï baŋa awïnynya; aani, jenni moa manynyï, ni beege dhigba ki thït,[6] jääŋŋa jääŋŋö jïrï.

⁹Ni ö jø tïïc 'moa ni kälge geni ki yi lur Libaanø këël bäät naama dwøŋ; ni tïïa geni nee twöc na wïdhi ni käli ki yi naama dwøŋ nee ge kïth kanyo caanï jïra. Køøre ge tïïa tïïö nee ge pät kaace, ni ööu ni lwørru geni. 'Ba ïïni, gïno manynya baŋï beeye ki man mooyï jø wø bëëdö paara ki cam.»

¹⁰Kanyøgønø Kiram, Cølöman aput mooc ki jer dhigba ki thït moa manynye jaak.

¹¹'Ba Cølöman, Kiram amooe ki beel ma rumme ma kume ma pïërariiø mo røm ka rumi mana cwøl ni kör, [7] nee cam jø wø bëëdö paare, ki maaw mana tøŋ ma rumme ma pïërariiø mo røm ka rumi manøgø; ni gïïögø cïp Cølömanni cïbö jï Kiram ki yi cwiir cooth.

¹²'Ba Wuuö Jwøk leec wïc acïbe jï Cølöman ki køør mana caan gø jïgø, ni ö Kirammi ki Cølöman ni jït yïthakicge ki bëët-mëër, ni ö geni na ariiø yøø ni tutge ki luubö yïthakicge.

¹³Køøre nyeya ma Cølöman acwötö ki jø tïïc mo maae ka teek ki dï Icriel bäre, ni ö kwään jø tïïci moøgø na mak ki teek yøø ni tïmge na jiy ma kume ma pïëradäk.

¹⁴Ni ö eni ni jääŋ geni yi lur Libaanø, ni jääŋŋe na jiy ma kume apaar ni rege welge wellø ki yi dwääy cooth; ni moi nø bëëdö yi lur Libaanø ki dwääy aciel, ni bëëtge paac ki dwäde ariiø. 'Ba Adöniram bëëdö na wïth jø tïïc moø no omaaø ki teek yøø.

¹⁵'Ba Cølöman jïre da jiy ma kume ma pïërabïriiø ma jø tëër, ki jiy ma kume ma pïërabära ma jø tøk ki kïte bäät kïte,

¹⁶ni da jic Cølöman møøk ma kume adäk ki dïpe adäk mo geno cuum Cølömanni na kwääri mo käär tïïc manøgø.

¹⁷'Ba køøre nyeya ma Cølöman acïpö ki dwøl, ni ö jø tïïci ni tööge ki kïte mo døøŋŋø, ni beege kïte moa perge leth, ni kïte moøgø tøkge ni tiir na mo täk tier Øt Wuuö Jwøk ki geni.

¹⁸'Ba jø geer mo Cølöman ki jø geer mo Kiram ki jø Gëbal, kïte ki jenni mo geerge Øt Wuuö Jwøk ki ge ajiiŋge.