Read anuak 1 Nyeye 6 Bible Online

1 Nyeye 6 - anuak bible

1 Nyeye 6

¹'Ba kanya tïme na køør cwiiri ma dïpe aŋween ki pïërabära ni jø Icriel onø ö wøk ki Ijep, ri ŋweer cwiiri moa beet Cølömanni ni ena nyeya mar jø Icriel, yi dwääy mana cwøl ni Jïp, ni beeye dwää ariiø, Cølöman atägö ki man geer Øt Wuuö Jwøk.

²'Ba øtø manøgø na geer nyeya ma Cølömanni jï Wuuö Jwøk enø, bär mare mar piny beeye gööye ma pïërabïciel, ni dööŋ yie beeye gööye ma pïërariiø, ni bär mare mar maal beeye gööye ma pïëradäk, mo røm ka cenø.

³'Ba agööl Øt Jwøk, na dïët ki thääŋ øtø mana cwøl ni thääŋ øtø mana en kur keere, bär mare mar piny caala rumi mar dööŋ yi Øt Jwøk, ni beeye gööye ma pïërariiø, ni dööŋ yie beeye gööye apaar.

⁴'Ba øtø manøgø dëër gø amooe ka awëërnyeŋŋi mo ni neeni ki wøk, dhøkge thenh thenh, 'ba cäätha yie ni døøŋŋø.

⁵Køøre ena cäŋ gëëdö ki uudi ni ee dwödö, ni maya ee geer bäät maya, ni maya ee cäŋ geer bäät maya; ni uudi moøgø ee rep ri øtø mana dwøŋ ni deŋŋe man ki deŋŋe man ki ŋää gø ee wïrö ki ge, ni beeye deŋ thääŋ øtø mana en kur keere ki deŋ thääŋ øtø mana en kur keere na pere leth.

⁶'Ba uudi moøgø na geere yøø ni ee rep dëër øtø mana dwøŋ, cööthe moge atïïe ni ee rep dëër ødøgø wøk, kiper nee peedhe moa rïï bäätge nee dëër Øt Wuuö Jwøk mana dwøŋ ba thuthge. 'Ba dööŋ yi øtø mana en piny beeye gööye abïïc, ni dööŋ yi øtø mana näk riet uudi maal beeye gööye abïciel, ni dööŋ yi øtø mana näk dää uudi maal beeye gööye abïriiø, ni gööye moøgø røm ka cenø.

⁷'Ba Øt Wuuö Jwøk kanya geeri, geer ka kïte moa käli no onø jiiŋŋø ki kanya tøk ge yie, ni bäŋe dwør guduum ki ley ki nywïënyö man wø töö ki gø ki kïte mo owïnynyö kanya geer øtø.

⁸'Ba dhi øtø mar øtø mana en piny, na näk orep dëër øtø mana dwøŋ, ena jï løø tier-piny. 'Ba kany wø cige maal yi øtø mana en dïër ki mana en maal, ge dønyi ka dhi øtø mana en piny ni ge edhi ka bäät ogat.

⁹'Ba kanya ö Cølömanni na thöör dëër øtø ki geer, wï gø akïthe ki dhigba mo otieŋø no opämi.

¹⁰'Ba uudi moa geere ni ee dwödö, ni maya ena bäät maya, no orep dëër øtø mana dwøŋ, bär mar øtø man nø ki maal beeye gööye abïïc, ni tïïc no odii ri øtø mana dwøŋ ki dhigba mo otieŋø no opämi.

¹¹'Ba dwør Wuuö Jwøk aö bäät Cølöman ni kööe,

¹²ni «Øtø man ni geerï en, ni näk mo ciik 'moa ki luup ŋøl 'moa ki gïïa cema bëët gwøgï gwøø, ni tïïyï ge na karge, aani luumma caana jï wäru ma Deebit puta ka tïïc nee thur kare jïrï.

¹³Ni puta bëëtö dï jiya ma jø Icriel ni ge ba wiia.»

¹⁴'Ba kanya ö Cølömanni na thöör øtø ki geer,

¹⁵dëër øtø ki yie akïthe ki dhigba mo otieŋø no opämi, ni tägi ka piny këël mana këët nyeŋ øtø, ni kïth dï øtø ki thït mo otieŋø no opämi.

¹⁶'Ba ki jï kuna näk da tääŋtiel, øtø aŋøle ki dï gø, ni kanya ŋøle beeye gööye ma pïërariiø, ni ŋøle ka dhigba mo otieŋø no opämi, ni tägi ka piny këël mana këët nyeŋ øtø maal, ni tïïc thääŋ øtø manøgø ni beeye kanya en kur keere na pere leth, ni puti cwøl ni thääŋ øtø mana en kur keere na pere leth.

¹⁷'Ba thääŋ øtø mana en kur keere na en nyïm thääŋ øtø mana en kur keere na pere leth, bär mare mar piny beeye gööye ma pïëraŋween.

¹⁸'Ba yi øtø bäre dëëre okïthö ki dhigba mo otieŋø no opämi mo dëëtge otëëŋŋö ki gïï mo mïërö mo lømløme, ki jenni mo oŋøøk. 'Ba opämi moøgø otïïö no onyääyö, ni kïte moa geer øtø ki ge ba nëëni.

¹⁹'Ba Cølöman thääŋ øtø mana en kur keere na pere leth ajiiŋŋe kiper nee acanduk man wø nyooth luumma tuut Wuuö Jwøki ki jiy nee tïme ni bëëdö yie.

²⁰'Ba thääŋ øtø mana en kur keere na pere leth, bär mare mar piny beeye gööye ma pïërariiø, ni dööŋ yie beeye gööye ma pïërariiø, ni bär mare mar maal beeye gööye ma pïërariiø. Ni puuc dëër gø bäre ki warkey mo tøŋ. Ni kïth dëër gïn wø waaŋ gïn wø jïye ŋwääi ni met bääte ko opämi mo dhigba.

²¹Køøre Cølöman yi øtø bäre apuue ki warkey mana tøŋ. Ni tïïe ki tiimme mo tïïc ka warkey, ni twöc gø ni ee rïïö nyïm thääŋ øtø mana en kur keere na pere leth. Ni ö opämi moa näk øtø oŋølø ki ge ki dï gø, ni lëëny dëëtge bäre ki warkey.

²²'Ba Cølöman Øt Jwøk apuue ki warkey këël mana put yie gääbö bäre. 'Ba eni thuwø gïn wø waaŋ gïn wø jïye ŋwääi ni met bääte mana en buut thääŋ øtø mana en kur keere na pere leth, dëër gø bäre alëënynye ki warkey.

²³'Ba Cølöman thuwø atïïö ki gïï ma ariiø mo caala nyïïatwiet maal mo wø cwøl ni kirubëlli, mo tïïc ka jaath man wø nyïïe wel na maaw, nee bëëtge thääŋ øtø mana en kur keere na pere leth. 'Ba bär mar aciel man nø ki maal beeye gööye apaar.

²⁴Ni bööm kirubël aciel man nø beeye gööye abïïc; ki mana täge ko olwenh böömmö maya këël mana pïïe yo olwenh böömmö maya beeye gööye apaar.

²⁵'Ba kirubël maya bär mar bwöpe poot na gööye apaar, ni kirubëlli moøgø na ariiø yøø, rumme moge ki kïdö marge aciel.

²⁶'Ba bär mar kirubël man nø ki maal beeye gööye apaar.

²⁷Køøre kirubëlli moøgø akïth dï thääŋ øtø mana en kur keere na pere leth ni bwöpge opeerø, ni maya dëër øtø ee gudö ki böömme, ni ö maya ni gut dëër øtø maya ki böömme maya, ni ö bwöpge moa no odööŋ ni gutge rege dï øtø.

²⁸Eni thuwø dëët kirubëlli moøgø bäre alëënynye ki warkey.

²⁹'Ba Cølöman dëët uudi moa en yi øtø bäre, ni beeye thääŋ øtø mana en kur keere ki thääŋ øtø mana en kur keere na pere leth, atëëŋŋe ki kirubëlli ki tuue ki jenni mo oŋøøk.

³⁰Ni puuc yi øtø ki warkey, ni beeye thääŋ øtø mana en kur keere ki thääŋ øtø mana en kur keere na pere leth.

³¹Køøre ena tïïö ko odhuule, mo tïïe ka jaath man wø nyïïe wel na maaw, kiper dhi øtø mar thääŋ øtø mana en kur keere na pere leth. 'Ba jenni moa no ocwöth dhi øtø kiper nee odhuulu gur dëëtge, ki mana no orïï wïïe, otieŋø na bare abïïc.

³²'Ba odhuule moa na ariiø na tïïe kiper dhi øtø, ni tïïe ka jaath man wø nyïïe wel na maaw, dëëtge atëëŋŋe ki kirubëlli ki twöe ki jenni mo oŋøøk; ni lëëny dëëtge bäre ki warkey.

³³Køøre thuwø ena tïïö ki jenni mo cwöth dhi thääŋ øtø mana en kur keere, mo otieŋø na bare aŋween, mo tïïc ka jaath man wø nyïïe wel na maaw.

³⁴Ni tïïe ko odhuule kiper dhi øtø manøgø mo tïïc ka thït mo otieŋø no opämi, ni beege odhuule aŋween, na ariiø moi nø okuubö na aciel, ni kany wø jabi, ariiø rege bange løøk aciel, ni ö ariiwi møga ni bange rege løøk maya.

³⁵Ni tëëŋ dëët odhuule moøgø ki kït kirubëlli ki tuue ki jenni mo oŋøøk; ni lëëny dëëtge bäre ki warkey.

³⁶'Ba Cølöman kal mar Øt Jwøk ageere ki kïte mo otieŋø; ni kany wø cäämmö nø ki kïte ma tëëŋŋe adäk, bäät gø di pëënhnhö ki dhigba mo otieŋø no opäm.

³⁷'Ba Øt Wuuö Jwøk kanya tääi ki geer, täk ka ri ŋweer cwiiri moa beet Cølömanni ni ena nyeya, yi dwääy mana cwøl ni Jïp.

³⁸'Ba kanya tïme na cwiiri apaar kurciel moa beet Cølömanni ni ena nyeya, yi dwääy mana cwøl ni Bul, ni beeye dwää abära, Øt Jwøk ki gïïa kïth dëëre bëët aløny ki geer ki jöö mana caan ni tïïc ki gø. 'Ba Cølöman, cwiiri moa beede ni eni gëëdö ki Øt Wuuö Jwøk beege cwiiri abïriiø.