Read anuak 1 Nyeye 7 Bible Online

1 Nyeye 7 - anuak bible

1 Nyeye 7

¹'Ba Cølöman abëëdö ni gëëdö ki øt nyec mare ki cwiiri apaar kurdäk; køøre øtø manøgø athööre ki geer.

²'Ba thääŋ øtø mana geere ki jer lur Libaanø enø, na put cwøl ni Lur Libaanø, bär mare mar piny beeye gööye ma dïpa, ni dööŋ yie beeye gööye ma pïërabïïc, ni bär mare mar maal beeye gööye ma pïëradäk, ni wïth were moe moa no ocaanø na tëëŋŋe aŋween, bäätge okïthö ki rïwe ma dhigbae.

³Ni bäät were moøgø okïthö ki rïwe ma pïëraŋween kurbïïc ma tëëŋŋe apaar kurbïïc, mo bäätge ogunnö ko opämi ma dhigbae.

⁴Ni deŋ øtø løøi ki løøi da dhøk awëërnyeŋŋi mo raŋŋa rege ma tëëŋŋe adäk adäk.

⁵Ni dhøk uudi moe ki dhøk awëërnyeŋŋi moe otïïö na bøømi, ni dhøk awëërnyeŋŋi ge bëëdö ni ge raŋŋa rege ki moa en løøga, ni gena tëëŋŋe adäk adäk.

⁶'Ba thääŋ øtø man wø cwøl ni Øt Were, bär mare beeye gööye ma pïërabïïc, ni dööŋ yie beeye gööye ma pïëradäk, ni dhee da agööla mo okïthö ki jøøde mo bäätge ogunnö ko opämi.

⁷'Ba thääŋ øtø mana geer na kany bëët wälu yie, ni wø cwøl ni Kar Løøk, ni beeye kany wø ŋøl luup yie, dëëre ogunnö ko opämi ma dhigbae ki mana täge ki maal këël mana këët piny.

⁸'Ba ki töök øt nyec, ŋää thääŋ øtø man wø ŋøl luup yie, da kal mo øt Cølöman ogeer yie, no ogeerø ni caala thäk uudi møga mo øt nyec. Eni thuwø eno gëëdö ki øtø mo caala øde jï nyi Peerø na näk ee nywømø.

⁹'Ba uudi moøgø bëët geer ka kïte moa perge leth, ni beege kïte moa no otøø no orømø, ni dïŋäthge ki yïthge oŋørø ki mukcäär, ni ge geer ka kïte moøgø ki mana täge ki tier øtø këël mana këët maal. Këël kal mana dwøŋ thuwø poot geer ka kïte mo perge leth.

¹⁰'Ba tier øtø tïïc ka kïte mo døøŋŋø mo perge leth, ni kïte moøgø bär marge beeye gööye apaar ni møøk beege gööye abära.

¹¹Ni bäät kïte moøgø da kïte mo perge leth mo otøø no orømø, ko opämi ma dhigbae.

¹²'Ba kal mana dwøŋ geer ki kïte mo otieŋø, ni kany wø cäämmö nø ki kïte ma tëëŋŋe adäk, bäätge di pëënhnhö ko opäm mar dhigba, ni geer ni caala kal mar Øt Wuuö Jwøk ka agööla mare.

¹³'Ba nyeya ma Cølöman ajääk baŋ nyen mo cwøl ni Kuram, nee ööe ki Tayar.

¹⁴'Ba Kuram, ena o nyijø ma ci thøø ma nyi jø tuuŋ Naptali, ni wänni beeye dhaanhø ma nyï Tayar, ma rëëm nywïënyö mana cwøl ni jwïël. 'Ba Kuram jïre da leec wïc ka acaara ki riek waŋ mar tïï nywïënyö ma jwïël. Køøre Kuram aput ö baŋ nyeya ma Cølöman ni bëëde ni tïïya tïïe moe bëët.

¹⁵Ni ö Kurammi ni tïïe ki gïï ma ariiø mo caala dïkweeye, mo tïïc ka nywïënyö ma jwïël, ni bär mar aciel man nø beeye gööye apaar ka abära, ni dööŋ dëëtge beeye gööye apaar kurriiø.

¹⁶Ni tïïe ki gïï ma ariiø mo mïërö mo tïïc ka nywïënyö ma jwïël mo oleenyø, nee cïp wïth gïïögø ni caal dïkweeye yøø; ni bär mar gïnögø aciel beeye gööye abïïc, ni bär mar maya beeye gööye abïïc thuwø.

¹⁷'Ba gïïögø dëëtge akïthi ki jap mïërö mo odwøø mo caala tiimme, na abïriiø okïth dëër maya, ni ö abïriiø møga ni kïthi dëër maya, nee cïp wïth dïkweeye.

¹⁸Ni buut tiimme moi nø okïthö ki gïï mo caala nyïïadïkwäle ma tëëŋŋe ariiø ariiø.

¹⁹'Ba gïïögø ni mïërö no ocïp bäät gïïögø ni caal dïkweeye yøø moa en nyïm agööla, otïïö ni caala apiite, ni bär marge beeye gööye aŋween.

²⁰'Ba gïïa näk mïërö na en wïth gïïa näk caala dïkweeye moa na ariiø, bäätge maal buut kanya näk ogul na en buut tiimme, da nyïïadïkwäle ma dïpe ariiø mo ocaanø na tëëŋŋe ariiø ariiø mo ena bäät man nø.

²¹'Ba eni gïïa näk caala dïkweeye na en gïïa mïërö wïthge, acïp nyïm agööla mana en dhi Øt Jwøk, ni cïp aciel bäät cwïïc, ni cak nyeŋ gø ni Jaakin, ni cïp maya bäät caam, ni cak nyeŋ gø ni Böeeth.

²²Ni gïïa mïërö na en bäätge otïïö ni caala apiitu mo oŋøøk. Køøre tïïc mar gïïa näk caala dïkweeye athum.

²³Køøre Kuram atïïö ki gïr pïï mo dwøŋ mo ogul, mo tïïc ka nywïënyö ma jwïël mo othiiø, ma gööye apaar ki mana täge deŋŋe man këël deŋŋe maya, ni bär mare mar maal beeye gööye abïïc, ni dööŋ dëëre beeye gööye ma pïëradäk.

²⁴'Ba nyäär gïr pïï manøgø owïrö ki gïï mo caala nyïï arööt ni geno mun deŋŋe bäre, ni yi gööyö aciel da nyïï arööt apaar, ni deŋ gïr pïï ege wïrö na tëëŋŋe ariiø.

²⁵'Ba gïr pïï manøgø ocïp bäät gïï mo caala dhäk ma apaar kurriiø, ni dhäk adäk nyïmge oløø jï løø wï-piny, ni dhäk adäk nyïmge oløø jï løø kur pänh-cäŋ, ni dhäk adäk nyïmge oløø jï løø tier-piny, ni dhäk adäk nyïmge oløø jï løø kur tuul-cäŋ. 'Ba gïr pïï manøgø ocïp bäätge, ni ŋäthge oløø baŋ gø.

²⁶'Ba odhïŋ gïr pïï beeye rumi aciel mo røm ka lweedi moa na aŋween mo cenø, ni deŋŋe caala deŋ ogubayu ki deŋ apiito mo oŋøøk; 'ba yie kädö ki pïï ma yïth caapiie ma kume ariiø.

²⁷'Ba ena tïïö ki jïëthe apaar mo wø käär pïï ki ge mo tïïc ka nywïënyö ma jwïël, ni bär mar man nø mar piny beeye gööye aŋween, ni dööŋ yi man nø beeye gööye aŋween, ni bär mar man nø mar maal beeye gööye adäk.

²⁸'Ba tïïc mana tïïc jïëthe moøgø ki gø beeye en, ki bööpge deŋŋe cooth oroodhø ki gïn mo wiit.

²⁹'Ba bööpge moø ni en yïthakic gïïa no oroodhø ki deŋge enø, da ŋuuwe, ki dhäk, ki nyïïatwiet maal mo wø cwøl ni kirubëlli mo ogöör dëëtge, ni gïïa no oroodhø ki deŋge dëëtge ogöönnö ki jap mïërö mo tïïc ni di tieŋø.

³⁰'Ba jïëthe moøgø, man nø da tiete ma aŋween mo tïïc ka nywïënyö ma jwïël, ki nywïëny mo wø bëët tielli bäätge, ni jääy man nø bääte da gïï ma aŋween mo jøla gïn mo caala areba. 'Ba dëët gïïögø ogöönnö ki jap mïërö mo ena løøi ki løøi.

³¹'Ba areba manøgø ni en bäät gïïögø na aŋween yøø, ni wø bëët gïr pïïyi bääte, bär mare mar maal beeye gööyö aciel, ni tier gïr pïï opööth piny ki tier areba manøgø ki thääŋ gööyö, ni dëër areba manøgø ogöörö ki gïï mo mïërö. 'Ba gïïögø na aŋween yøø na en areba bäätge, otïïö na bøøm, ni paa ogul.

³²'Ba tiet jääy moa na aŋween, bär marge mar maal beeye gööyö aciel ki thääŋö, ni gïï wø bëët tielli bäätge omaa dëër jääy.

³³'Ba tiel moøgø otïïö ni caala tiel mo jääy man wø tut okweenynyi, ni dëët tiel moøgø bëët tïïc ka nywïënyö ma jwïël mo oleenyø.

³⁴'Ba gïïa na aŋween, na näk areba ege jølø, omaa dëër jääy.

³⁵'Ba areba mana en bäät jääy, da areba mør mo ocwää dëëre, mo bär mare mar maal beeye thääŋ gööyö. 'Ba gïïa jøl areba manøgø ni en bäät jääy enø, ocwää dëër areba.

³⁶'Ba dëët gïïa jøl areba, ki dëër jääy, kany mo ŋaam jaak ogöönnö ki kirubëlli, ki ŋuuwe, ki twöe, ki jap mïërö, ni beeye deŋŋe manø bäre.

³⁷'Ba manøgø beeye jöö mana tïïc jïëthe moa na apaar mo wø käär pïï ki ge. Ge bëët geno tïïö ni röömi, ni rumme moge ki kïtge aciel.

³⁸Køøre Kuram atïïö ki jap peny ma apaar mo caala athääe, mo tïïc ka nywïënyö ma jwïël, ni man nø käädö ki pïï ma caapiie ma pïëraŋween, ni bär mar man nø, ki mana täge ki deŋŋe man këël deŋŋe maya, beeye gööye aŋween; ni jääy man nø bääte da gïr pïï aciel nø.

³⁹'Ba eni jïëth pïï abïïc acïp deŋ Øt Jwøk jï løø tier-piny, ni cïp abïïc møga deŋ Øt Jwøk jï løø wï-piny, ni cïp gïr pïï mana dwøŋ na näk tïïc ka nywïënyö ma jwïël nyïm Øt Jwøk yïthakic jï løø kur tuul-cäŋ ki jï løø tier-piny.

⁴⁰'Ba Kuram atïïö thuwø ki dääe, ka akaape, ki cäänne. Kanyøgønø, Kuram tïïe bëët moa tïïe kiper nyeya ma Cølöman yi Øt Wuuö Jwøk aput thöör ki tïïc,

⁴¹ni beege gïïa näk caala dïkweeye na näk ariiø, ki gïï mïërö moa na ariiø na en bäätge, ki tiimme moa no odwøø ma ariiø na mo rïëp gïïa näk mïërö moa na ariiø ki ge;

⁴²ki gïïa näk caala nyïïadïkwäle ma dïpe aŋween na kïth bäät tiimme moa no odwøø, na aciel man nø dëëre da nyïïadïkwäle ma tëëŋŋe ariiø, na mo rïëp gïïa näk ogul na näk ariiø na mïërö na en wïth gïïa caal dïkweeye;

⁴³ki jïëthe apaar mo wø käär jap peny ki ge, ki jap peny ma apaar mo ena bäätge;

⁴⁴ki gïr pïï mana dwøŋ, mo tiere da gïï pinyi apaar kurriiø mo otïïö ni caala dhäk;

⁴⁵ki dääe, ka akaape, ki cäänne. 'Ba jammi moøgø bëët na tïïc Kurammi jï nyeya ma Cølöman kiper Øt Wuuö Jwøk, ge tïïc ka nywïënyö ma jwïël mo othoodhø.

⁴⁶'Ba Cølöman japøgø bëët atïïe nee tïïc ni thiia yïth odhöönhe mo yïthge okølø yi Goor Jördan yïthakic Cuköt ki Carthan.

⁴⁷'Ba Cølöman jammi moøgø bëët peek marge käre rømø, kiper gena tïmö ni thööth døc; ni ö peek mar nywïënyö mana näk jwïël moa tïïc japøgø ki ge ni käri ŋääö këët.

⁴⁸'Ba Cølöman jammi bëët moa en yi Øt Wuuö Jwøk atïïe, ni beege tharabëëta man wø waaŋ gïn wø jïye ŋwääi ni met bääte, mo dëëre bäre olëënynyö ki warkey, ki tharabëëta mo dëëre bäre olëënynyö ki warkey man wø bëët muunni moa näk nyuuthe bääte;

⁴⁹ki gïï wø bëët lambae bäätge mo tïïc ka warkey mana tøŋ, mo dëëtge otëëŋŋö ki jenni mo oŋøøk, ni gïïögø abïïc ena bäät cwïïc na abïïc møga ena bäät caam nyïm thääŋ øtø mana en kur keere na pere leth; ki lambae mo tïïc ka warkey, ki dïkwänynye mo maac mo tïïc ka warkey;

⁵⁰ko ogubääye, ki jap wø 'näk lambae ki ge, ki kuure, ka apät, ka athääe mo wø käär mäc ki ge; ni gïïögø bëët tïïc ka warkey mo tøŋ. Ni tïïe ki gïï wø gur odhuulu dëër dhi øtø ki geni mo tïïc ka warkey, mo dhi thääŋ øtø mana en dïër, ni beeye øtø mana en kur keere na pere leth, ki dhi Øt Jwøk man wø døny yie ki gø, ni beeye thääŋ øtø mana en kur keere.

⁵¹'Ba jammi bëët moa tïïc nyeya ma Cølöman kiper Øt Wuuö Jwøk athum ki tïïc. Ni ö Cølömanni ni käl jammi bëët moa näk ocïp wänni ma Deebit kur keerge na mo Wuuö Jwøk yi øtø, ni beege gwet-bïrö, ki warkey, ki jammi bëët, ni kïth geni yïth uut kän jammi mo Øt Wuuö Jwøk.