Read anuak 1 Nyeye 8 Bible Online

1 Nyeye 8 - anuak bible

1 Nyeye 8

¹Køøre nyeya ma Cølöman jø døøk Icriel, ki dïbwöthe mo wïth tuŋi bëët, ki dïbwöthe mo dhøk uudi mo jø Icriel acooŋ yi Jerucalem, kiper na acanduk man wø nyooth luumma tuut Wuuö Jwøki ki jiy nee øømge yi Pääny Deebit,[8] ni beeye Dhayan.

²Ni ö jø Icrielli bëët ni cooŋge rege buut nyeya ma Cølöman, ni beeye yïth nïne mo ajwöma man wø tïïc yi dwääy mana cwøl ni Itanim, ni beeye dwää abïriiø.

³Kanyøgønø jø døøk Icriel bëët gena öö, ni ö dïlämme ni lwørge acanduk;

⁴ni kälge acanduk mar Wuuö Jwøk ko oduŋkaara man wø røøm Wuuö Jwøki yie ki jiy, ki jammi bëët moa no ocïp kur keerge na mo Wuuö Jwøk, na en yo oduŋkaara; ni ö dïlämme ki jø tuuŋ Libay ni kälge gïïögø yi Øt Wuuö Jwøk.

⁵'Ba nyeya ma Cølöman ki lwaa Icriel bäre, moa näk rege ege cooŋ nyïm acanduk, gena cïpö ko olämme, ni beege dïëk ki dhäk mo thööth mo ba løny ki kwaan.

⁶Kanyøgø, dïlämme acanduk man wø nyooth luumma tuut Wuuö Jwøki ki jiy akälge kare, yi thääŋ Øt Jwøk mana en tääŋtiel, ni beeye thääŋ øtø mana en kur keere na pere leth, ni cïpge gø tiet bwöp gïïa no otïïö ni caala nyïïatwiet maal mo wø cwøl ni kirubëlli.

⁷Kiper kirubëlli bwöpge otïïö no opeerø bäät kanya en acanduki yie, ni ö bwöp kirubëlli ni bëëtge maal, na acanduk ki jenni moa kääri ki geni ege rïëbö.

⁸'Ba jenni moøgø bäyö døc, ni wïthge løny ki man neeni ni dhaanhø cuŋŋa thääŋ øtø mana en kur keere na en nyïm thääŋ øtø mana en kur keere na pere leth, 'ba ba løny joot ki wøk; 'ba ge poot nut kaace këël dïcäŋi en.

⁹'Ba ya acanduk bäŋ gïrpiny yie, 'ba beege opäp kïte moa na ariiø keerge na no ocïp Modhe yie kanya en tier Kïn Körëp, kanya ö Wuuö Jwøki na tude yie ki luubö ki jø Icriel, kanya öge wøk ki yi ŋööm Ijep.

¹⁰'Ba kanya tïme ni dïlämme ööa wøk ki Øt Wuuö Jwøk, ødøgø aput pöölö pääŋ.

¹¹Køøre atïmö ni ba løny jï dïlämme ki man tïïcge tïïc marge, kiper pöölö mana en yie, kiper ajiem mar Wuuö Jwøk Øt Wuuö Jwøk apääŋe.

¹²Køøre Cølöman aköö, ni «Wuuö Jwøk onø köö ni eni bëëdö yi pöölö mo odhïŋ.

¹³'Ba ennø, ï na Wuuö Jwøk, aana gëëdö ki øt ajiem na kar bëëtö jïrï na bäre bäre.»

¹⁴'Ba kanya bëëde ni lwaa Icriel bäre cuŋŋö kaagø, nyeya ma Cølöman nyïme aløø baŋge ni gwïëth geni bëët.

¹⁵Ni kööe, ni «Pwøc en jï Wuuö Jwøk, Jwø Icriel, na cäänö ki dhee jï wära ma Deebit, ni put gïna caane wëëk thur kare, ni kööe,

¹⁶ni ‹Ki mana täge ki dïcäŋ mana käla jiya ma jø Icriel wøk ki Ijep, aani, bäŋ pääny mo yaa jierø røk päänye mo wïth tuŋi mo jø Icriel bëët naa gëënni yie ki øtø nee nyeŋŋa cwøl ree; 'ba Deebit beeye na jiera nee bëëde na wïth jiya ma jø Icriel.›

¹⁷«'Ba wära ma Deebit, gïnögø nut cwïnye cøøn ki man gëëde ki øtø kiper nyeŋ Wuuö Jwøk, Jwø Icriel.

¹⁸'Ba Wuuö Jwøk aköö jï wära ma Deebit, ni ‹Kiper mana bëët cwïnyï ni manynya man gëëde ki øtø kiper nyeŋŋa, beeye gïn mo beer na caarï ki cwïnyï.

¹⁹'Ba paa ïïni noo geer øtø manøgø; 'ba beeye wäädï mano nywølï, noo geer gø kiper nyeŋŋa.›

²⁰«'Ba ennø, Wuuö Jwøk luubö mare mana caane anø wëëk thur kare; kiper aana nø ci kar wära ma Deebit ni pïïa bäät wälu mar jø Icriel, kaawat mana caani ya Wuuö Jwøki, ni nø gëëda ki øtø kiper nyeŋ Wuuö Jwøk, Jwø Icriel,

²¹ni nø jiiŋŋa kar acanduk kaace, ni beeye acanduk mana en luumma tuut Wuuö Jwøki ki jiy yie, ni beeye luumma tuude ki kwäyø kanya käl geni wøk ki yi ŋööm Ijep.»

²²Kanyøgø, Cølöman acuŋŋö nyïm gïn wø cïp olämme bääte mar Wuuö Jwøk, ni thaaŋ ceŋŋe maal, ni lwaa Icriel bäre nut.

²³Ni kööe, «Wui Wuuö Jwøk, Jwø Icriel, bäŋ Jwøk mo caala ïïni maalø wala bäät piny, mo luumma tuude ki jiy ee gwøø, ni nyooth mëër mare ni wø ba jøøl jï jiye mo wø tïïö ka adïëri nyïme ki cwïnyge bäre.

²⁴Luumma caanï jï dhaanhnhï ma wära ma Deebit agwøgï, ni beeye mana caanï ki dhiï na wëëgï thur kare, kaawat man bëëde dïcäŋi en.

²⁵«'Ba ennø, wui, Wuuö Jwøk, Jwø Icriel, luumma caanï jï dhaanhnhï ma wära ma Deebit put gwøk, na kööï, ni ‹Ni näk mo jiy moo käl dëërï wïthge koorge koorø ki bëëtö marge, ni bëëtge ni ge tïïya adïëri nyïma, kaawat mana tïïyï, ï ba can ki dhaanhø mo pï piny bäät wälu mar jø Icriel.›

²⁶'Ba ennø, wui, Jwø Icriel, beerra man ö luummï mana caanï jï dhaanhnhï ma wära ma Deebit ni wëëgï gø thur kare.

²⁷«?Aŋø, Jwøk bëëdö bäät piny møn? Ka adïëri møn, ï na Jwøk, maal këël maal kuya kunece, ï ba røm yie. ?A øtø man ni yaa geerø en, ïïno rømï yie nidïï?

²⁸Wui Wuuö Jwøk, ï na Jwøk mara, wïny lam mara, a na dhaanhnhï, ni cegï ïthï ki kwac mara ki lam mara man kwaa ïïni ki gø dïcäŋi en.

²⁹Raŋ Øt Jwøk man ki waŋcäŋ ki wäär, øda kööï ni nyeŋŋï doo wøørø yie, kiper nee lam mara wïnynyï kany wø läma, a na dhaanhnhï, ni nyïma yaa luu Øt Jwøk kany.

³⁰Beerra man wïnynyï kwac mara, a na dhaanhnhï, ki kwac mar jiyï ma jø Icriel, kany wø lämge ni nyïmge ege luu Øt Jwøk kany. Beerra man wïnynyï gø kany wø bëëdï yie maalø; beerra man wïnynyï gø møn, ni wëënnï waani.

³¹«Ni näk mo dhaanhø obääyö dëër ŋat atut mare, ni tïïi nee kööŋe, ni näk mo öö ni kööŋe nyïm gïn wø cïp olämme bääte marï yi Øt Jwøk man,

³²beerra man wïnynyï gø ki maal ni ŋølï mar jiyï, ni jäälï ŋata mare raac, ni dwøgï gïna raac wïïe keere na tïïe, ni ŋunnï ŋata mare beer, ni duunnï jïre ki køør mare na beer.

³³«'Ba kanyo näk mo jiy moï ma jø Icriel bööt nyïïmänni böötö, kiper mana tïïge ki raay dëërï, ni näk mo ge cäŋa duu baŋï ni cøørge nyeŋŋï, ni lämge ni kwacge ïïni yi øtø man,

³⁴beerra man wïnynyï gø ki maal, ni wëënnï raay mo jiyï ma jø Icriel, ni duuï ge yi ŋöömma cïpï jï kwäcge.

³⁵«'Ba kany wø näk mo maal ocuŋŋö ni tïme ni bäŋ køth, kiper mana tïï jiyï ki raay dëërï, ni näk mo ge lämö ni nyïmge ege luu Øt Jwøk kany, ni cøørge nyeŋŋï, ni løkge rege ni wecge raay moge kanyo caannï geni,

³⁶beerra man wïnynyï gø ki maal ni wëënnï raay mo jiyï ma jø Icriel, ni pwönynyï geni ki jöö mana beer man cääthge ki gø, ni jääŋŋï køth bäät ŋøøm moï moa cïpï jï jiyï na mo dööŋ jïge na moge.

³⁷«Ni näk mo da käc paac, wala täw mo leth, wala cäŋ wala twöŋi mo raanynya beel, wala bäänyö, wala adïtwie, wala ni näk mo ge ciel nyïïmänni ciel dïër yïth päänye moge, këël ööa gïï mo leth ki täwe mo nyïëdi cøøn,

³⁸ni näk mo dhaanhø aciel wala jiyï ma jø Icriel bëët lämö ni kwacge ïïni, ni ŋati man nø gïna leth na tägö dëëre ŋääe ki cwïnye, ni thaaŋ ceŋŋe jï kuna en Øt Jwøki man yie,

³⁹beerra man wïnynyï gø kany wø bëëdï yie maalø, ni wëënnï ŋati man nø, ni cunnï gø ki køør moa tïïe bëët, ni beege jøøa cwïnyge ŋäyï, kiper bee ï keerï ni ŋäc cwïny jiy bëët,

⁴⁰nee ge lwäcge ki ïïni ki yïth nïne bëët moo beetge yïth ŋøøm moa cïpï jï kwäcwa.

⁴¹«Këël jur thuwø mo ba käl røk jiyï ma jø Icriel, kany wø ööe ki paac mo bäär døc kiper nyeŋŋï,

⁴²kiper man wø wïny dööŋö mar nyeŋŋï ki teek badï; kany wø ööe ni läme ni nyïme ee luu Øt Jwøk kany,

⁴³beerra man wïnynyï gø kany wø bëëdï yie maalø, ni tïïyï gø ki køør gïïa pëënynye bëët, nee nyeŋŋï ŋäc jø bäät pinynyi bëët, niï lwäärge kaawat man wø tïïc jiyï ma jø Icriel, nee ŋäcge møn ni øtø man ni yaa geerø en, cwøla ri nyeŋŋï.

⁴⁴«'Ba kany wø ö jiyï wø cige baŋ leny baŋ nyïïmän moge, ni këël ge jääŋŋï ka waŋjööra ŋø cøøn, kany wø lämge jïrï, ï na Wuuö Jwøk, ni nyïmge ege luu yi pääny mana näk iï jierø ki øtø mana näk yaa geerø kiper nyeŋŋï,

⁴⁵beerra man wïnynyï lam marge ki maal ki kwac marge, ni kønyï geni.

⁴⁶«'Ba kany wø bääcge dëërï, kiper mana näk mo bäŋ dhaanhø cøøn mo ba bääyi, ni wëërï ki geni ni cïbï geni ceŋ nyïïmän, ni ö geni ni magi ya nyïïmänni ki tøŋ ni kïthge geni yïth ŋøøpge, kany mo bäär wala kany mo cään,

⁴⁷ni näk mo ge cätö yi ŋöömö mana kïth ge yie ni ge mak ka tøŋ, ni løkge cwïnyge ni kwacge ïïni yi ŋööm jøøa mak ge ki tøŋ, ni köge, ni ‹Waana bääyö, ni nø tïïwa ki gïn mo reyø døc,›

⁴⁸ni näk mo ge duua baŋï ki cwïnyge bäre ka acaacge bäre yïth ŋøøp nyïïmän moge na mak geni ki tøŋ, ni lämge jïrï ni nyïmge ege luu yi ŋöömö marge na cïpï jï kwäcge, ki pääny mana jierï, ki øtø mana geera kiper nyeŋŋï,

⁴⁹beerra man wïnynyï lam marge ki kwac marge kany wø bëëdï yie maalø, ni kønyï geni,

⁵⁰ni wëënnï jiyï moa no obääyö dëërï, ni weyï gïïa näk ege baaø dëërï, ni tïïyï ge nee jøøa mak geni ki tøŋ mëërge ki geni,

⁵¹kiper gena jiyï ni beege moa näk moï, na kälï wøk ki Ijep na caal këën thäth mo liel.

⁵²«Wui Wuuö Jwøk, beerra man raŋï kwac mara, a na dhaanhnhï, ki kwac mar jiyï ma jø Icriel, ni wïnynyï marge kany wø kwacge ïïni,

⁵³kiper gena jierï na moi røk jø bäät piny bëët, kaawat mana caanï gø ki dhi dhaanhnhï ma Modhe, kanya kälï eni ki kwäcwa wøk ki Ijep.»

⁵⁴'Ba kanya ö Cølömanni na lønye ki lam manøgø bäre ki kwac mana kwac Wuuö Jwøk ki gø, ena ö maal ki nyïm gïn wø cïp olämme bääte mar Wuuö Jwøk, kanya näk cøŋŋe ee këël piny yie, ni ceŋŋe ee thaaŋ maal;

⁵⁵ni cuŋŋe ni gwïëth lwaa jø Icriel bäre ni dwøre ee tïŋ maal, ni kööe,

⁵⁶«Pwøc en jï Wuuö Jwøk, na mooc jiye ma jø Icriel ki jwömö, ki køør gïïa caane bëët, ni bäŋ luubö aciel mo odööŋ ni kär thur kare røk gïïa beyø bëët na caane ki dhi dhaanhnhe ma Modhe.

⁵⁷'Ba ennø, beerra man ö Wuuö Jwøki, Jwøk marø, ni bëëde ki øøni, kaawat mana bëëde ki kwäyø; ni ba wec øøni ni ba kwier øøni.

⁵⁸Beerra man ö eni ni løø cwïnynyø baŋe, nee ø cäädhö ki jööre ni gwøø luup moa ceme, ki ciik moe, ki luup ŋøl moe, na kööm kwäyø ki geni.

⁵⁹Beerra man ö luupi 'moa bëët moa kwaaya Wuuö Jwøk, Jwøk marø, ki geni, ni bëëtge ni lääŋ Wuuö Jwøki lääŋŋö ki waŋcäŋ ki wäär, ni ö eni ni køny aani, a na dhaanhnhe, ki jiye ma jø Icriel, ki køør man wø manyge ki yi cäŋ cooth,

⁶⁰kiper nee ŋäc jø bäät pinynyi bëët ni Wuuö Jwøk beeye Jwøk, ni bäŋ Jwøk mør këët.

⁶¹Beerra man ö cwïnynyu ni cïbu gø køør Wuuö Jwøk, Jwøk marø, ni caathu køør ciik moe ni gwøgu gïïa ceme, kaawat man bëëde dïcäŋi en.»

⁶²Kanyøgønø, nyeya ma Cølöman ki jø Icriel bëët moa en buute, gena put cïpö ko olämme nyïm Wuuö Jwøk.

⁶³Ni ö Cølömanni ni cïpe ko olämme mo wø duunni ki mëër jï Wuuö Jwøk, no olämme moa cïbe beege dhäk ma kume ma pïërariiø kurriiø, ki dïëk ma kume ma dïpa ki pïërariiø; ni ö nyeya ki jø Icriel bëët ni putge Øt Wuuö Jwøk cïp kur keere na mar Jwøk.

⁶⁴'Ba ni poot na dïcäŋögø, nyeya thääŋ dïkal mana en dïër na en nyïm Øt Wuuö Jwøk, acïp kur keere na mar Jwøk, ni cïp yi gø ko olämme mo wø waaŋ bäre, ko olämme mo beel, ki dwäälö mar olämme mo wø duunni ki mëër, kiper gïn wø cïp olämme bääte mana näk tïïc ka nywïënyö ma jwïël na en nyïm Øt Wuuö Jwøk atïmö ni thiinh ki man cïp olämme moøgø bëët bääte, ni beege olämme mo wø waaŋ bäre, ko olämme mo beel, ki dwäälö mar olämme mo wø duunni ki mëër.

⁶⁵'Ba kar kaaca, Cølöman dïcäŋa cïp Øt Jwøk kur keere na mar Jwøk awøøre ki jø Icriel bëët, ni beeye lwaak mana dwøŋ na öö ki Libö-Amath na en jï løø wï-piny, këël mana këët waŋ Naam Ijep na en jï løø tier-piny, ni wøørge dïcäŋögø nyïm Wuuö Jwøk, Jwøk marø, ki nïne abïriiø, ni wøørge Ajwöma Man Wø Wøør Ni Jøw Bëëdö Yïth Abïle ki nïne abïriiø, ni päŋ nïne na apaar kurŋween.

⁶⁶'Ba na tïme na ri bäc nïne, nyeya jiy awëëk wääth, ni ö jiyi ni gwïëthge eni. Køøre gena aa mïëri moge ki kanynyø ki met cwïny mo dwøŋ kiper jammi moa beyø bëët na tïïc Wuuö Jwøki jï dhaanhnhe ma Deebit, ki jiye ma jø Icriel.