Read anuak 1 Nyeye 9 Bible Online

1 Nyeye 9 - anuak bible

1 Nyeye 9

¹'Ba kanya ö Cølömanni na thöör Øt Wuuö Jwøk ki øt nyec mare ki geer, ki gïïa met yie ki ge bëët nee tïïc,

²Wuuö Jwøk ree acäŋ nyoothø jï Cølöman kaawat mana kwøŋ ree nyooth jï gø Gibien.

³Ni kö Wuuö Jwøki jïre, ni «Lam marï ki kwac mana kwayï aani ki gø awïnynya; 'ba Øt Jwøk mana geerï enø, anø cïba kur keere na mara, naa tïïya nyeŋŋa nee bëëde ni ŋäc kaace na bäre bäre, ni bëëda naa raŋŋa øtø manøgø cooth ki cwïnya bäre.

⁴«'Ba ïïni, ni näk miï bëëdö niï tïïya adïëri nyïma, kaawat mana tïïc wäru ma Deebit, ni cwïnyï thïïŋ, ni tïïyï jammi bëët moa köömma ïïni ki ge, ni gwøgï ciik 'moa ki luup ŋøl 'moa,

⁵aani tier nyec marï këëlla piny bäät jø Icriel na bäre bäre, kaawat mana caana gø jï wäru ma Deebit ni kööa, ni ‹Ï ba cännï ki dhaanhø mo pï piny bäät wälu mar jø Icriel.›

⁶«'Ba ni näk miï gaa wøk, wala jø okäl dëërï gaa wøk, ni køøra ba caathu, ni ba gwøgu gïïa cema ki ciik 'moa na köömma uuni ki ge, ni cou ni tïnynyu juu møøk ni lammu geni,

⁷aani jø Icriel käla wøk ki yïth ŋøøm moa cïba jïge, ni ö øtø mana näk yaa nø cïp kur keere kiper nyeŋŋa ni leeŋa gø wøk nyïma. Køøre nø, jø Icriel ge tïmö ni gena jø wø ŋäät dëëtge, ni bëëtge ni gena gïr waac yïthakic wïth juurre bëët.

⁸'Ba øtø manøgø oniruuth ni ränynye; ni ö jiyi moo cør deŋŋe ni thäŋ yïthge ni buuge gø ni köge, na ‹?Aperŋø na ö Wuuö Jwøki na tïïc gïn dëër ŋöömö man ki øtø man?›

⁹Køøre oløk jiyi ni köge, ni ‹Beeye kiper mana kweerge ki Jwøge ma Wuuö Jwøk, na käl kwäcge wøk ki yi ŋööm Ijep, ni cïpge cwïnyge køør juu møøk, ni lamge geni, ni tïnyge geni. Kiper manøgønø, beeye tiere na ö Wuuö Jwøki na kïth gïnögø ni leth enø bäre bäätge.› »

¹⁰'Ba cwiiri moa thöör Cølömanni kanya bëëde ni gëëdö ki uudi moa na ariiø, ni beege Øt Wuuö Jwøk ki øt nyec mare, beege cwiiri ma pïërariiø.

¹¹'Ba Kiram nyeny jø Tayar beeye na cïpö jï Cølöman ki dhigba ki thït na jer geer, ki warkey, ki køør gïïa many Cølömanni bëët; køøre nyeya ma Cølöman acïpö jï Kiram ki päänye ma pïërariiø røk päänye moa en yïth ŋøøp Galili.

¹²Køøre Kiram aö wøk ki Tayar ni ci kuna raŋ päänye moa cïp Cølömanni jïre; 'ba eni yie kär mïnnö ki geni.

¹³Ni kööe, «?Nyie coka, a teeŋ päänye mo nyïëdi na cïpï jïra ii?» Køøre eni ŋøøpa bëët päänye moøgø yïthge aput cwøl ni Kabul, na näk tiere beeye ŋøøm mo bäŋ gïn mo duuge, këël ni poode ni di cøørø na enønø këël dïcäŋi en.

¹⁴'Ba Kiram onø jääk baŋ nyeya ma Cølöman ki warkey ma kikarri[9] ma dïpa ki pïërariiø.

¹⁵'Ba nyeya ma Cølöman Øt Wuuö Jwøk ki øt nyec mare, ki kanya no othørø ni wø cwøl na Milø, ki kiir mar Jerucalem, ki päänye moa cøøri na Adhör, ki Megidø, ki Gëdher, tïïe ka jø tïïc moa mak ki teek.

¹⁶'Ba Peerø nyeny jø Ijep, eno kwøŋ ci Gëdher ni mak gø ni waaŋ gø, ni 'näk jø Keenan moa bëëdö yi päänyögø, ni cïp päänyögø na muuy jï nyaare kanya nywømi ya Cølömanni.

¹⁷Køøre Cølöman Gëdher acäŋ geerrø, ni geer Bëëth-Örön mana en jï piny,

¹⁸ki Baalath, ki Tamar na en dï paap Juuda,

¹⁹ki päänye moe bëët mo cuŋ yïthge ki caammi, ki päänye mo bëët jïëth leny moe yïthge mo wø tut okwëënyi, ki päänye mo bëët jø okwëënyi moe yïthge, ki gïïa manynye bëët nee geere yi Jerucalem, ki yi Libaanø, ki yi ŋöömö mana en tiere bäre.

²⁰'Ba jiy bëët moa näk patha jø Icriel na bøth ki thøø røk jø Amör, ki røk jø Këth, ki røk jø Përec, ki røk jø Ëwi, ki røk jø Jeebuc,

²¹ni beege jøøa näk kär løny jï jø Icriel ki man dïïrge wïthge bëët, nyïïkwaacge moa dööŋ yïth ŋøøpøgø, Cølöman wø cwötö røkge ki jø tïïc moa näk maae ka teek kiper tïïc, këël man bëëde dïcäŋi en.

²²'Ba Cølöman, bäŋ jø Icriel mo ee tïïö na laaŋe; 'ba gena tïïe na jø leny, na jø kööre moe, na cuumme mo wïth kwääc leny, na kwääc leny, na kwääc jïëth leny mo wø tut okwëënyi, na jø wø këëdi ki bäät okwëënyi.

²³'Ba da jø Icriel møøk mo ocuumö na jø wø käär tïïe mo Cølöman, ni beege jiy ma dïpe abïïc ki pïërabïïc mo wø raŋ jø tïïc.

²⁴'Ba kanya ö nyi Peerø ki yi Pääny Deebit, ni eni ööa paare mana no ogeer Cølömanni jïre, Cølöman kanya no othørø ni wø cwøl na Milø atïïe.

²⁵'Ba kany wø tïme na yi cwiir cooth, Cølöman wø cïpö ko olämme kwöre adäk bäät gïn wø cïp olämme bääte mana tïïe jï Wuuö Jwøk, ni beege olämme mo wø waaŋ bäre ko olämme mo wø duunni ki mëër, ni waaŋe ka gïn wø jïye ŋwääi ni met na aciel bäät gïn wø cïp olämme bääte nyïm Wuuö Jwøk. Køøre gïna geer Øt Wuuö Jwøk kipere athur kare.

²⁶Nyeya ma Cølöman thuwø athädhö ki baabuure Edhiyön-Gabir na en buut päänya cwøl ni Ëlath, na en yi ŋööm Ëdöm bäät Naama Kwaar.

²⁷'Ba nyeya ma Kiram jø tïïc moe, ni beege jø wø käär baabuure, na ŋäc bëët naam, ajääŋŋe ki jø tïïc mo Cølöman na aciel.

²⁸Ni cige Öpïr ni känge ki warkey mo peek mare beeye rumme ma dïpe aŋween ki pïërariiø mo røm ka rumi mana cwøl ni kikar, ni kälge gø baŋ nyeya ma Cølöman.