Read anuak 2 Nyeye 1 Bible Online

2 Nyeye 1 - anuak bible

2 Nyeye 1

¹'Ba kanya tïme na køør thøw Akap nyeny Icriel, jø Möap gena këëyö ni öge maal bäät jø Icriel.

²Kanyøgø, nyeya ma Akadhiya wär Akap apänh piny ki dha awëërnyeŋ mar øtø mana en maal na en Cameria, ni put dëëre jïtö ki ŋwellø. Køøre ena jäägö ki jiy ni kööe jïge, ni «Cou ni pëënynyu dwør Baal-dhabul, jwø jø Akarön, man näk mo dëëra pïïa piny ki ŋwellø man.»

³'Ba nyïïatwiel maal mar Wuuö Jwøk aköö jï Ilaaja nyï Ticbi, ni «Ö maal ni ciï kuna røømmi ki jiy moa jääŋ Akadhiya nyeny Cameria, ni kööï jïge, na ‹?Aŋø, bäŋ Jwøk Icriel, ni tïme nou cøøa kun pëënynyu dwør Baal-dhabul, jwø jø Akarön en?›

⁴'Ba ennø, man beeye dwør Wuuö Jwøk, ena köö, ni ‹Ïïni, ï ba ö maal ki bäät pëëm; 'ba ka adïëri møn, ï thøw.› » Ni ö Ilaaja ni put aay.

⁵'Ba kanya ö jiyi moa jääŋ Akadhiya na duuge baŋe, ena köö jïge, na «?Aŋø, u duu kiperŋø?»

⁶'Ba gena köö jï Akadhiya, ni «Da dhaanhø ma aöö ni røømme ki waani ni caan gø jïwa, ni ‹Cou døøu baŋ nyeya mana jääŋ uuni, ni caannu gø jïre, ni man beeye dwør Wuuö Jwøk, ena köö, na «?Aŋø, bäŋ Jwøk Icriel, ni tïme niï jäägö ki jiy kuna pëënynyï dwør Baal-dhabul, jwø jø Akarön en? Kiper manøgønø, ï ba ö maal ki bäät pëëm; 'ba ka adïëri møn, ï thøw.» › »

⁷'Ba Akadhiya aköö jïge, na «A teeŋ dhaanhø mo nyïëdi cøøn na ö kuna røømme ki uuni na car luupögø yøø jïïu?»

⁸Køøre aløkge jïgø, ni «Beeye dhaanhø mo käära gälla mo ree da jïër, mo piere ee töönynyö ki kaw.» Køøre nyeya aköö, ni «Beeye Ilaaja nyï Ticbi.»

⁹Kanyøgø kwääy jø leny ma pïërabïïc ki jiye moa näk pïërabïïc aput nyeya jääŋŋö baŋ Ilaaja. Køøre kwääc jø leny manøgø aci baŋ Ilaaja, ni Ilaaja opï piny bäät thuur; ni kööe jï Ilaaja, «Wui, nyikuŋ Jwøk, nyeya aköö ni ööï.»

¹⁰'Ba aløk Ilaaja ni kööe jï kwääy jø leny manøgø, ni «Ni näk mo aana nyikuŋ Jwøk møn, beerra man ö maaci ki maal ni dïïr wïïï ki jiyï moø na pïërabïïc yøø.» Kanyøgønø, maac aput öö ki maal ni dïïr wï kwääyögø ki jiye moa näk pïërabïïc.

¹¹Køøre kwäärö mør mar jø leny ma pïërabïïc ki jiye moa näk pïërabïïc acäŋ nyeya jääŋŋö baŋ Ilaaja. Køøre kwääy jø leny manøgø aköö jï Ilaaja, ni «Wui, nyikuŋ Jwøk, nyeya aköö ni laar öö.»

¹²'Ba aløk Ilaaja ni kööe jï kwääy jø leny manøgø, ni «Ni näk mo aana nyikuŋ Jwøk møn, beerra man ö maaci ki maal ni dïïr wïïï ki jiyï moø na pïërabïïc yøø.» Køøre maac mar Jwøk aput öö ki maal ni dïïr wïthge.

¹³'Ba nyeya acäŋ jäägö ri dääge ki kwäärö mør mar jø leny ma pïërabïïc ge ki jiye moa näk pïërabïïc. 'Ba kanya ö kwääy jø leny manøgø ni ci maal bäät thuur baŋ Ilaaja, eni cøŋŋe akëël piny ni kuul wïïe piny nyïm Ilaaja, ni kwac gø ni kööe jïgø, ni «Wui, nyikuŋ Jwøk, beerra man ö jwïëya ki jwïëc jiy moï ii ni tïm perge ni leth jïrï.

¹⁴Neenï, maac aöö ki maal ni dïïr wïth kwääc jø leny moa dïkwøŋ na näk ariiø ni wø käär jiy ma pïërabïïc, ki jicge moa näk pïërabïïc pïërabïïc; 'ba ennø, beerra man tïm jwïëya ni perge leth jïrï.»

¹⁵'Ba nyïïatwiel maal mar Wuuö Jwøk aköö jï Ilaaja, ni «Ci piny kunece ki eni; kär niï lwäyö ki eni.» Kanyøgø, Ilaaja aput ö maal ni ci piny baŋ nyeya ki eni na aciel.

¹⁶Køøre Ilaaja aköö jï nyeya ma Akadhiya, ni «Man beeye dwør Wuuö Jwøk, ena köö, na ‹?Aŋø, bäŋ Jwøk Icriel mo luumme pëënynyï pëënynyö, ni tïmï niï jäägö ki jiy kuna pëënynyï dwør Baal-dhabul, jwø jø Akarön en? Kiper manøgønø, ïïni, ï ba ö maal ki bäät pëëm; 'ba ka adïëri møn, ï thøw.› »

¹⁷Kanyøgønø, Akadhiya aput thøø ki køør dwør Wuuö Jwøk mana caane ki dhi Ilaaja. 'Ba kiper mana näk ma Akadhiya bäŋ wääde, Jeyöram wär Akap aläw kar gø na nyeya, ni beeye kanya tïme na ri riet cwiiri moa beet Jöram o Jøcapat ni ena nyeya Juuda.

¹⁸'Ba luum tïïe møga moa tïïc Akadhiya ogöör piny yi Wëël Luup Nyec Icriel.