Read anuak 2 Nyeye 11 Bible Online

2 Nyeye 11 - anuak bible

2 Nyeye 11

¹'Ba kanya ö Athaliya mii Akadhiya na joot gø ni wääde othøw, ena ö maal ni 'näk jiy bëët moa en dhi øt nyec.

²'Ba Jeyöcaba, nyi nyeya ma Jöram, cöök Akadhiya, Jöac wär Akadhiya akwäl wøk ki yïthakic wäät nyeya moa näk di nääö, ni kïth gø yi øt niine mana en yi Øt Wuuö Jwøk, ge ki ŋata pïr gø, ni eni kana gø nee ba joot Athaliya; ni ö eni ni käri nääö këët.

³'Ba nyilaal manøgø ki ŋat pïr aput bëëtö no okanø yi Øt Wuuö Jwøk ki cwiiri abïciel, kanya bëët Athaliya ni paac ena cere.

⁴'Ba kanya tïme na ri bïriet cwiiri, Jööda[12] na bëëdö na Kwääy Lam Mana Dwøŋ ajäägö ki jiy nee kwääc lwaa dïpe mo wø koor nyeya ki mo wø koor paan dwøŋ nee cwöl baŋe yi Øt Wuuö Jwøk. Ni ö eni ni tude ki luubö ki geni ni tïïc geni nee ge kööŋge yi Øt Wuuö Jwøk. Køøre nø, eni Jöac o nyeya ma Akadhiya anyoodhe jïge;

⁵ni kööm geni ni kööe, ni «Man beeye gïno tïïyu; ki ri lwaae adäk mo wø ci baŋ koor ki cäŋ jwömö, aciel rege doo bëëdö ni koora øt nyeya,

⁶ni ö acielli maya ni bëëde ni koora dhi kiir Cuur, ni ö acielli maya ni bëëde ni koora dhi kiir mana en töök jø koor, ni koora Øt Wuuö Jwøk.

⁷'Ba lwaae ariiø mo wø ö wøk ki bäät koor ki cäŋ jwömö, geni thuwø Øt Wuuö Jwøk dege koorø jï nyeya.

⁸'Ba uuni, nyeya wär cielu dïër, ni ŋati man nø jap leny moe ena cere; 'ba ŋat onyänh buutu jaak wär putu 'näk. Ni bëëdu nou cäädhi ka nyeya kany wø ci yie jaak.»

⁹Kanyøgønø, gïïögø bëët aput kwääc lwaae tïïc ki køør mana ö Jööda na näk Kwääy Lam Mana Dwøŋ na kööm geni ki ge. Ni ö ŋati man nø dëëtge ni lwør jiye moa doo ö baŋ koor ki cäŋ jwömö ki moa doo ö wøk ki bäät koor ki cäŋ jwömö, ni öge baŋ Jööda na näk Kwääy Lam Mana Dwøŋ.

¹⁰Ni ö Kwääy Lam Mana Dwøŋ ni mooc kwääc lwaa dïpe ki tøøŋi ki kööt leny moa näk mo nyeya ma Deebit, na en yi Øt Wuuö Jwøk.

¹¹Ni ö jø koorri ni cuŋge ni ŋati man nø jap leny moe ena cere, ni rege ege caanø ki ri Øt Jwøk ki mana täge ki jï løø bäät cwïïc këël mana këët løø bäät caam, ki deŋ gïn wø cïp olämme bääte ki deŋ øtø cooth, ni nyeya ege ciel dïër.

¹²Kanyøgønø, Jööda, Jöac o nyeya akäl wøk, ni cïp adun nyec wï gø, ni cïp wëël ciik Jwøk jïgø; ni thïïm wï gø ki maaw ni røøny gø na nyeya. Ni ö jiyi ni paŋge ceŋge ni kwöŋge, ni «Nyeya puta bëëtö na bäre bäre!»

¹³'Ba kanya ö Athaliya na wïny dööt jø koor ki dööt jiy bëët, ena put ci baŋge yi Øt Wuuö Jwøk.

¹⁴'Ba na lwïthe, ka adïëri møn, nyeya mana nyään aput joot ni cuŋŋö buut gïna näk caala dïkweeri mana en dhi Øt Jwøk, ki køør kööŋŋö marge, ni kwääc lwaae ki jø wø kooth tuŋi ena deŋŋe; ni jø paac bëët yïthge omïnnö ni ge kudhö ki tuŋi. Køøre Athaliya abïï mare aput jeec ki pänh cwïny, ni jwöŋe, ni «Wui, maru ageem öy! Maru ageem öy!»

¹⁵'Ba Jööda na näk Kwääy Lam Mana Dwøŋ, kwääc lwaa dïpe na näk ojierø bäät jø leny aköömme ni kööe jïge, ni «Kälu nyijøøgø wøk ki yïthakic jiy moa näk rege ege caanø; 'ba ŋato läp køør gø jaak wär putu 'näk ko opëëllö.» Kiper onø caan Dïlämi, ni «Eni kär nää yi Øt Wuuö Jwøk.»

¹⁶Kanyøgø nyijøøgø aputge mak; 'ba kanya tïme ni eni pïï dhi kal man wø døny okwëënyi ki yie deŋ øt nyeya, ena put 'näk kaace.

¹⁷Kanyøgønø, Jööda aput tudö ki luubö yïthakic Wuuö Jwøk ki nyeya ki jiy, nee ge bëëtge ni gena jic Wuuö Jwøk; ni ö eni ni tude ki luubö thuwø yïthakic nyeya ki jiy.

¹⁸Køøre jiy bëët gena ci øt jwøk mar Baal, ni nyaage gø piny; ni ö gïï wø cïp olämme bäätge mo Baal ki gïïa no otieŋø ni ŋwaalla kïte ni tøcge ge na thäŋi; ni 'näkge Matan na näk dïlämi mar Baal nyïm gïï wø cïp olämme bäätge. 'Ba Jööda na näk Kwääy Lam Mana Dwøŋ acïp Øt Wuuö Jwøk ki jø gwøk gø.

¹⁹Ni ö Jööda ni lwør kwääc lwaa dïpe, ki jø wø koor nyeya, ki jø wø koor paan dwøŋ, ki jø paac bëët; ni öge ni kälge nyeya piny ki Øt Wuuö Jwøk, ni ge cura waŋjöör dhi kiir jø wø koor øt nyeya. Ni ö nyeya ni pï piny bäät wälu mar nyec.

²⁰Kanyøgø jø paac bëët yïthge aput mïnnö, ni ö päänynyi ni neebäc, kiper mana 'näkge Athaliya ko opëëllö deŋ øt nyeya.

²¹'Ba kanya tïm Jöaci na nyeya, cwiic dööŋö moe abïriiø.